بانان—بانان ئائىلىسى بانان ئۇرۇقدىشىدىكى ئۆسۈملۈك بولۇپ، ئادەتتە ئۇنىڭ مىۋىسىمۇ بانان دەپ ئاتىلىدۇ. بانان ئۆزى تەملىك ئۇزۇقلۇق تەركىبى يۇقىرى بولۇپ، ئىسسىق بەلباغ رايونلىرىدا كەڭ تېرىلىدۇ ھەم ئىستىمال قىلىنىدۇ.
خەنزۇچە ئاتىلىشى:  香蕉
لاتىنچە ئاتىلىشى: Musa nana Lour.
ئىنگىلىزچە ئاتىلىشى:  Banana
تەۋەلىكى: ئۆسۈملۈكلەر دۇنياسى—يېپىق ئۇرۇقلۇق ئۆسۈملۈكلەر تىپى—تاق پەللىلىك ئۆسۈملۈكلەر سىنىپى—بانان ئەترىتى—بانان ئائىلىسى—بانان ئۇرۇقدىشى

ئۇزۇقلۇق تەركىبى
    ھەر 100 گىرام بانان تەركىبىدە 91 كىلوكالورىيە ئىنىرگىيە، 20 گىرام كاربون سۇ بىرىكمىلىرى، 1.2 گىرام ئاقسىل، 0.6 گىرام ياغ، ئاز دىگەندىمۇ 15 گىرام قەنت، 0.3 گىرام كىسلاتا، 53 مىللىگىرام فوسفور، 19 مىللىگىرام كالتسىي، 400مىللىگىرام كالىي، 24 مىللىگىرام ۋىيتامىن C قاتارلىقلار بار بولۇپ، بۇلاردىن باشقا يەنە بەلگىلىك مىقداردا ۋىيتامىن A، پىكتىن، كۆپ خىل ئىنىزىم تىپىدىكى ماددىلار ۋە باشقا مىكرو ئىلمىنتلار بار.

ئىستىمال قىممىتى
     1. بانان تەركىبىدە مول بولغان كالىي ۋە ماگنىي بار بولۇپ، كالىي قان بېسىمنىڭ ئېشىپ كىتىشى ۋە مۇسكۇل تارتىشىپ قېلىشنىڭى ئالدىنى ئالىدۇ؛ ماگنىي بولسا ھارغىنلىقنى تۈگىتىش ئۈنۈمىگە ئىگە.
     2. بانان تەركىبىدىكى ۋىيتامىن Aنىڭ بەدەننىڭ كىسەلگە قارشى تۇرۇش كۈچىنى ئاشۇرۇش رولى بار بولۇپ، كۆپىيىش ئىقتىدارى ۋە كۆرۈش قۇۋۋىتى نورمال ساقلاشقا پايدىلىق.
    3. بانان تەركىبىدىكى تىئامىن بىلەن رىبوفلاۋىننىڭ پۇت پۇراش كىسىلىگە قارشى تۇرۇش، ئىشتىھانى ئىلگىرى سۈرۈش، ھەزىم قىلىشقا ياردەملىشىش، نىرۋا سېستىمىسىنى قوغداش، ئادەم بەدىنىنىڭ نورمال ئۆسۈپ يىتىلىشىنى ئىلگىرى سۈرۈش قاتارلىق رولى بار.
    4. باناننىڭ كىراخماللىق تەركىبى يۇقىرى بولۇپ، تەبىئىتى سۇغۇق كىلىدۇ؛ بانان ئۈچەينى سىلىقلاشتۇرۇپ، ئاشقازان ئۈچەينىڭ قىمىرلىشىنى ئىلگىرى سۈرىدۇ ھەمدە بۇ ئارقىلىق قەۋزىيەتنىڭ ئالدىنى ئالىدۇ ۋە ياخشىلايدۇ.
    5. كۈنلۈك ئۈچ ۋاخ تاماقتا، ھەر ۋاختا بىر تال بانان يەپ بەرگەندە، ئادەم بەدىنى ئۈچۈن زور مىقداردا كالىي ماددىسى تولۇقلاپ بىرەلەيدىغان بولۇپ، بۇ ئارقىلىق چوڭ مىڭىدە قان ئۇيۇشۇش ئىھتىماللىقىنى %21 ئەتراپىدا تۆۋەنلىتەلەيدۇ.
    6. گىرمانىيىلىك تەتقىقاتچىلارنىڭ بىلدۈرۈشىچە، بانان چوڭ مىڭىنىڭ ئىچكى ئاخراتمىلىق خېمىيىلىك ماددا ئاجرىتىپ چىقىشىنى ئىلگىرى سۈرەلەيدىغان بولغاچقا، بۇ ئارقىلىق خامۇشلىشىش ۋە كەيپىياتى تۇراقسىز بولۇشنى داۋالاشقا بولىدىكەن.