بۆلجۈرگەن، كۆپ يىللىق سامان غوللۇق ئۆسۈملۈك بولۇپ، 40-10سانتىمىتىر ئەتراپىدا ئۆسىدۇ. بۆلجۈرگەن ئەڭ دەسلەپ جەنۇبى ئامرىكا قىتئەسىدىن تارالغان، ھازىر دۆلىتىمىزنىڭ ھەرقايسى جايلىرىدا ۋە ياۋرۇپا قىتئەسىدە كۆپ ئۆستۈرىلىدۇ. بۆلجۈرگەننىڭ ئۇزۇقلۇق قىممىتى بىرقەدەر يۇقىرى بولۇپ، بەلگىلىك دەرىجىدە ساغلاملاشتۇرۇش ئۈنۈمى بار.
خەنزۇچە ئاتىلىشى: 草莓
لاتىنچە ئاتىلىشى: Fragaria ananassa Duch.
تەۋەلىكى: ئۆسۈملۈكلەر دۇنياسى—يېپىق ئۇرۇقلۇق ئۆسۈملۈكلەر دۇنياسى—جۈپ پەللىلىك ئۆسۈملۈكلەر سىنىپى—ئەتىرگۈل ئەترىتى—ئەتىرگۈل ئائىلىسى—بۆلجۈرگەن ئۇرۇقدىشى

ئۇزۇقلۇق تەركىبى
   بۆلجۈرگەننىڭ ئۇزۇقلۇق تەركىبى مول بولۇپ، "مىۋە خانىشى" دەپ نام ئالغان. ئۇنىڭ تەركىبىدە ۋىيتامىن C، ۋىيتامىن A، ۋىيتامىن E، ۋىيتامىن PP، ۋىيتامىن B1، ۋىيتامىن B2، كاروتىن، تاننىك كىسلاتا، ئاسپارتىك كىسلاتاسى، مىس، پىكتىن، تالا ماددىسى، فولىن كىسلاتاسى، تۆمۈر، كالتسىي، ئېللاگىك كىسلاتا ۋە سېئانىدىن قاتارلىقلار بار.
   بۆلجۈرگەن تەركىبىدىكى ۋىيتامىن Cنىڭ مىقدارى، ئالما، ئۈزۈم قاتارلىقلارنىڭ 10-7 ھەسسىسىگە توغرا كىلىدۇ؛ تەركىبىدىكى ئالما كىسلاتاسى، لىمون كىسلاتاسى، ۋىيتامىن B1، ۋىيتامىن B2 ۋە كاروتىن، كالتسىي، فوسفور، تۆمۈر قاتارلىقلارنىڭ مىقدارىمۇ ئالما، نەشپۈت، ئۈزۈم قاتارلىق مىۋىلەرگە قارىغاندا 4-3 ھەسسە يۇقىرى بولىدۇ.

ساغلاملاشتۇرۇش رولى
   1. بۆلجۈرگەن تەركىبىدىكى مىقدارى بىرقەدەر بولغان كاروتىن ۋە ۋىيتامىن A قاتارلىق ئۇزۇقلۇق تەركىبلەر، كىچىسى كۆرەلمەسلىك كىسەللىكىنى ياخشىلايدىغان بولۇپ، ئېپتىلىيە توقۇلمىسىنىڭ ساغلاملىقىنى قوغداش، كۆزنى روشەنلەشتۈرۈپ جىگەرنى قۇۋۋەتلەش، ئۆسۈپ-يىتىلىشنى ئىلگىرى سۈرۈش قاتارلىق روللىرى بار.
   2. بۆلجۈرگەن تەركىبىدىكى تالا ماددىسىنىڭ مىقدارى مول بولۇپ، بۇ ئاشقازان-ئۈچەينىڭ قىمىرلىشىنى ھەمدە بۇ ئارقىلىق ئاشقازان-ئۈچەيدىكى يىمەكلىكلەرنىڭ ھەزىم بولۇشىنى ئىلگىرى سۈرۈپ، قەۋزىيەتنى ياخشىلايدۇ ۋە بۇۋاسىر، ئۈچەي راكى قاتارلىقلارنىڭ ئالدىنى ئالىدۇ.