بۈگۈن كۆپچىلىكنىڭ دىققىتىگە، ئۆزگىچە بىر خىل قورىما—داغلىما پۇرچاق ئۇيۇتمىسى تەييارلاش ئۇسۇلىنى تونۇشتۇرۇپ ئۆتىمىز.
   كىتەرلىك ماتېرىيال: ئۇن، پۇرچاق ئۇيۇتمىسى(دۇفۇ)، تۇخۇم، غولپىياز، كۆك-قىزىلمۇچ

   تەم خۇرۇچلىرى: تۇز، تېتىتقۇ، توخۇ تەم جەۋھىرى، ئاقمۇچ، كۈنجۈت مېيى

   تەييارلاش ئۇسۇلى: پۇرچاق ئۇيۇتمىسىنى تۆت بۇرجەك شەكىلدە توغرىۋالىمىز؛ غولپىيازنىڭ يېرىمىنى ۋە كۆك-قىزىلمۇچنى قەلەمچە قىلىپ توغرىۋالىمىز؛ غولپىيازنىڭ قالغان يېرىمىنى ئۇششاق توغرايمىز.
   تۇخۇمنى چىنىگە چېقىپ قوچۇپ تەييارلايمىز، يەنە بىر چىنىگە ئازراق ئۇن ئېلىپ تەييار قىلىمىز.

   قورۇش ئۇسۇلى: قازانغا ئازراق ماي قۇيۇپ قىزىتقاندىن كېيىن، توغراپ تەييارلىغان پۇرچاق ئۇيۇتمىسىنى ئاۋۋال ئۇنغا چىلىۋەتكەندىن كېيىن تۇخۇم سۇيۇقلۇقىغا بىر چىلىۋىتىپ قازاندىكى مايغا سېلىپ داغلايمىز؛ داغلاپ ھەر ئىككى يۈزى سارغىيىپ قاتقاندا سۈزۈپ ئېلىۋالىمىز.
   قازانغا قايتىدىن ئاز مىقداردا ماي قۇيۇپ، ئۇششاق توغرالغان غولپىيازنى سېلىپ قورۇم تەم چىقارغاندىن كېيىن، مۇۋاپىق مىقداردا سۇ قۇيىمىز؛ سۇ قاينىغاندىن كېيىن ئالدىدا داغلاپ تەييارلىغان دۇفۇنى سېلىپ، ئۈستىگە ئازراق تۇز، تېتىتقۇ، توخۇ تەم جەۋھىرى، ئاقمۇچ قاتارلىقلارنى قوشۇپ تەم تەڭشەيمىز؛ بىر ئىككى مىنۇت قاينىتىپ سۈيى ئاز قالغاندا، ئۈستىگە نەچچە تېمىم كۈنجۈت مېيى تېمىتىپ تەخسىگە ئۇسۇپ ئالغاندىن كېيىن، ئۈستىگە توغراپ تەييارلىغان غولپىياز ۋە كۆك-قىزىلمۇچ قەلەمچىسىنى قويۇپ ئىستېمال قىلساق بولىدۇ.