ھەممىمىزگە مەلۇملۇق، ھامىلدارلىق مەزگىلىنىڭ دەسلەپكى ئۈچ ئېيى خەتەرلىك مەزگىل ھىسابلىنىدىغان بولۇپ، بۇ مەزگىلدە، ھامىلدار ئايالنىڭ ھەرقايسى تەرەپلەردە ئالاھىدە دىققەت قىلىشى لازىم بولىدۇ. بىراق، ھامىلدارلىق مەزگىلىدىنىڭ يەتتىنچى ئېيىغا قەدەم قويغاندا، يەنى 28ھەپتىلىك بولغاندىن كىيىن، ھامىيلە گەرچە يىتىلىپ بولغان بولسىمۇ، ئەمما بۇ مەزگىل، ھامىلدارلىق مەزگىلىنىڭ دەسلەپكى ئۈچ ئېيىدىن باشقا، ھامىيلىنىڭ ئەڭ ئاجىز ۋاقتى بولۇپ ھىسابلىنىدۇ؛ شۇنىڭ ئۈچۈن، بۇ مەزگىلدە ھامىلدار ئايال، يەنە دەسلەپكى ئۈچ ئايدىكى ئىھتىياتچانلىقىنى ساقلىمىقى لازىمدۇر. ئۇندىن باشقا، بۇ ۋاقىتتا ھامىلدار ئايال ھۇرۇنلۇق قىلماي، چوقۇم نورمال تەرتىپ ۋە ۋاقىت بويىچە تۇغۇت تەكشۈرۈشى قىلدۇرۇشى كىرەك. بۇنىڭدا، ئەگەر قوساقتىكى بالىدا بىرەر بىنورماللىق كۆرۈلسە، ئانا بىرىنچى ۋاقىتتا خەۋەر تاپالايدۇ.

بۇ مەزگىلدە ھامىيلىنىڭ ئاجىز بولىدۇ دىيىشتىكى ئاساس:
    1. بۇ ۋاقىتتا، ھامىيلە ئاساسى جەھەتتىن يىتىلىپ شەكىلگە كىرىپ بولغان بولىدۇ؛ بىراق، بۇ ۋاقىتتا ھامىيلە تۇلۇق يىتىلىش باسقۇچىغا يىتىپ قالغان بولغاچقا، ئۇنىڭ قوساقتىكى ھەرىكەت بوشلۇقى كىچىكلەپ قالىدۇ. شۇڭا بۇ ۋاقىتتا ئاسانلا ھامىيلىگە ئوكسىگىن يىتىشمەسلىك ئەھۋالى كىلىپ چىقىشى مۇمكىن.
     2. بۇ مەزگىلدىن باشلاپ، بوۋاقنىڭ كىندىك بېغىنىڭ ئۇنىڭ بوينىغا يۆگىلىپ قېلىش ئىھتىماللىقى تېخىمۇ ئاشىدۇ؛ بۇنداق ئەھۋالدا، ئانىلار ھەر ۋاقىت قوساقتىكى بالىنىڭ مىدىرلاش ئەھۋالىغا دىققەت قىلىپ تۇرىشى كىرەك.

     3. ھامىيلە ئورنى توغرا بولماسلىق. ھامىيلە ئورنى ھامىلدار ئايالنىڭ ئۆزى تەبىئى تۇغۇشى ياكى ئوپراتسىيە قىلدۇرۇپ تۇغىشىغا تەسىر كۆرسىتىپلا قالماي، بوۋاقنىڭ بالىياتقۇ ئىچىدىكى تۇرمۇشى بىلەنمۇ زىچ مۇناسىۋەتلىك بولىدۇ.
    4. بالدۇر تۇغۇلۇپ قېلىش خەۋپى بار. بالدۇر تۇغۇلۇپ قېلىشنىڭ سەۋەپلىرى نۇرغۇن؛ بالدۇر تۇغۇلۇپ قېلىشنىڭ مىدىتسىنادىكى ئىنىقلىمىسى بولسا، ھامىيلىنىڭ 28ھەپتىلىكتىن ئاشقان ئەمما 37ھەپتىگە يەتمىگەن ئارىلىقتا تۇغۇلۇپ قېلىشنى كۆرۈسىتىدۇ. شۇڭا، 7ئايلىق بولغان بۇ مەزگىلدىن باشلاپ، ھامىلدار ئاياللار ئالاھىدە دىققەت قىلمىقى لازىمدۇر.
     5. ھامىلدار ئايالنىڭ بەدىنىنىڭ سەۋەبىدىن، قوساقتىكى ھامىيلە شەكىلگە كىرىش باسقۇچىغا يەتكەن ۋاقىتتا، بەدەنگە ئېلىپ كىلىدىغان بېسىم ئېغىرلاپ، ھامىيلىگە تەسىر كۆرسىتىدۇ.

    نۇرغۇن كىشىلەر بەلكىم ھازىرقى ئاياللار بارغانسىرى جېنى ئاجىز بولۇپ كىتىپتۇ، ئىلگىرى ھېچنىمىگە دىققەت قىلمىسىمۇ ئاياللار يەنىلا ئوڭۇشلۇق تۇغىۋىرەتتى دىيىشى مۇمكىن. ئەمىلىيەتتە، بۇنداق سېلىشتۇرۇش توغرا ئەمەس. ھازىرقى تۇغۇت ئەھۋالى ۋە تۇرمۇش مۇھىتى ئىلگىرىكىگە ئوخشىمايدۇ، ئۇنىڭ ئۈستىگە ھامىلدار مەزگىلىدە كۈتۈلمىگەن  ئەھۋاللار كىلىپ چىقىدىغان ئىشلارمۇ كۆپ ئۇچرايدۇ. شۇنىڭ ئۈچۈن، قوساقتىكى بالىنىڭ  ئوڭۇشلۇق ھالدا ساق-سالامەت تۇغۇلىشى ئۈچۈن، يەنىلا كۆپرەك دىققەت قىلغان ياخشى.