نۇرغۇن ھامىلدار ئاياللار، ئۆزى تۇغۇش ۋە ئوپراتسىيە قىلدۇرۇپ تۇغۇش توغرىسىدا ئىككىلىنىپ قالىدۇ. ئۇنداقتا بۇ ئىككى خىل ئۇسۇلدا تۇغۇشنىڭ زادى قانداق پەرقى بار؟

ئوپراتسىيە قىلدۇرۇپ تۇغۇشقا قارىغاندا ئۆزى تۇغسا ئەسلىگە كىلىشى تىزراق بولىدۇ
    ئادەتتىكى ئەھۋالدا، ھامىلدار ئاياللار ئۆزى تۇغسا، ئوپراتسىيە قىلدۇرۇپ تۇغقانغا قارىغاندا تىزراق ئەسلىگە كىلىدۇ؛ ئۆزى تۇغقان ئاياللار ئاساسى جەھەتتىن بىرىنچى كۈنىلا كارۋاتتىن چۈشۈپ، مۇۋاپىق تۈردە سۇيۇق تاماق يىسە بولىدۇ. ئەمما ئوپراتسىيە قىلدۇرۇپ تۇغقان ئاياللار ئاز دىگەندىمۇ بىرەر ھەپتە كارۋاتتىن چۈشەلمەيدۇ، ئۇنىڭ ئۈستىگە پەقەت "يەل يۈرۈشكەن"دىن كىيىن ئاندىن سۇ ئىچىپ نەرسە-كىرەك يىسە بولىدۇ.

ئۆزى تۇغقاندا، تۇغۇلغان بوۋاقلار تېخىمۇ بەكرەك بىخەتەرلىك تۇيغۇسى بار بولىدۇ
    ئىلگىرى ئېلىپ بېرىلغان مەلۇم بىر تىببى تەتقىقات دوكلاتىدا كۆرسىتىلىشىچە، ئاياللار ئۆزى تۇغقاندا، ئوپراتسىيە قىلدۇرۇش ئارقىلىق تۇغۇلغان بوۋاقلارغا قارىغاندا تېخىمۇ بەكرەك بىخەتەرلىك تۇيغۇسىغا ئىگە كىلىدىكەن. چۈنكى، ھامىلدار ئايال ئۆزى تۇغقان ئەھۋالدا، بوۋاق ئۆزىنىڭ ئانىسىنىڭ قورسىقىدىن چىققىلىۋاتقانلىقىنى تەخمىنەن ھىس قىلالايدىكەن ھەمدە بۇ سەۋەپلىك ئازدۇر-كۆپتۇر "ئىدىيىۋى تەييارلىقى" بار بولىدىكەن؛ ئەمما ئوپراتسىيە قىلدۇرۇش ئارقىلىق تۇغۇلغان بوۋاقلار بولسا، ھېچقانداق ئىدىيىۋى تەييارلىق يوق ئەھۋال ئاستىدا ئۆزىنىڭ ئىللىق "ئۇۋىسى" ئىچىدىن ئېلىپ چىقىلىدىغان بولغاچقا، بۇنداق ئىككى خىل ئەھۋال ئاستىدا، بوۋاق ئوخشاش بولمىغان تەسىرگە ئۇچرايدۇ. شۇڭا ئوپراتسىيە قىلدۇرۇش ئارقىلىق تۇغۇلغان بوۋاقلاردا بىخەتەرلىك تۇيغۇسى نىسبەتەن كەمچىل بولۇپ، بىرقەدەر كۆپرەك يىغلاپ خاپا قىلىدىغان بولۇشى مۇمكىن؛ ئانىسى ئۆزى تەبىئى تۇغقان بوۋاق ئەكسىچە، بىر قەدەر خاپا قىلمايدىغان، مۇلايىم كىلىشى مۇمكىن.

ئۆزى تۇغۇشقا چىقىم ئازراق كىتىدۇ
   ئادەتتىكى دوختۇرخانىلاردا، ئۆزى تۇغۇشقا ئادەتتە بىر-ئىككى مىڭ يۈەن ئەتراپىدا پۇل كىتىشى مۇمكىن؛ بىراق، ئوپراتسىيە قىلدۇرۇپ تۇغۇشقا بولسا، ئۈچ-تۆت مىڭ يۈەن ئەتراپىدا چىقىم كىتىشى ھەمدە ئەگەر ئالاھىدە ئەھۋاللار كۆرۈلۈپ قالسا، بۇ ئاساستا يەنە ئۆلچەمدىن ئارتۇق چىقىم قوشۇلۇشى مۇمكىن.

ئوپراتسىيە ئارقىلىق تۇغۇشتا، ھامىلدار ئايال ئۆزى تەبىئى تۇغقاندىكىدەك قىينالمايدۇ
    ھەممىمىزگە مەلۇملۇق، ھامىلدار ئايال ئۆزى تەبىئى تۇغۇشتا، كىتەرلىك ۋاقىتقا ئىنىق بىرنەرسە دىگىلى بولمايدۇ؛ بەزىدە نەچچە سائەتتىلا ئوڭۇشلۇق تۇغۇۋىتىشى مۇمكىن، بەزىدە بولسا بىرەر ئىككى كۈنگە سوزۇلۇپ كىتىشى مۇمكىن؛ ئىنىقكى، بۇ جەرياندا، ھامىلدار ئايال چوقۇم قىينىلىپ جاپا تارتىپ كىتىدۇ. ئەمما ئوپراتسىيە قىلدۇرۇپ تۇغۇشتا، پۈتكۈل جەرياندا ناركوز قىلىنىدۇ، شۇڭا ھامىلدار ئايال ئاغرىق ھىس قىلمايدۇ؛ ئۇنىڭ ئۈستىگە دوختۇرلار كونتىرول قىلىپ تۇرىدىغان بولغاچقا، ۋاقىت نىسبەتەن قىسقا بولىدۇ. ئۆزى تۇغقانغا قارىغاندا، ئوپراتسىيە قىلدۇرۇپ تۇغۇشتا تاساددىبى ھادىسە كۆرۈلۈش نىسبىتى تېخىمۇ تۆۋەن بولۇپ، ھامىلدار ئايال ۋە بوۋاق تېخىمۇ بىخەتەر بولىدۇ.
    ئەمىلىيەتتە، مەيلى ئۆزى تۇغۇش بولسۇن ياكى ئوپراتسىيە قىلدۇرۇپ تۇغۇش بولسۇن، مەقسەت پەقەت بىرلا، ئۇ بولسىمۇ بالىنى سالامەت تۇغۇشتۇر؛ شۇڭا ھامىلدار ئاياللار بۇ جەرياننىڭ ئۆزىدىن كۆپ ئەنسىرەپ كەتمىسىمۇ بولىدۇ.