ئالما، ئەتىرگۈل ئائىلىسىدىكى ئۆسۈملۈك بولۇپ، ئالما دەرىخى يۇپۇرماق تاشلايدىغان دەرەخكە تەۋە. ئالمىنىڭ ئۇزۇقلۇق قىممىتى ئىنتايىن يۇقىرى، تەركىبىدە مىنرالنى ماددىلار ۋە ۋىتامىنلار، كالتسىي قاتارلىق مىنرالنى ئىلمىنتلار مول؛ شۇڭلاشقا، ئالما بەدەندىكى ئارتۇق تۇز تەركىبلىرىنى مىتابولىزىملاپ بەدەن سىرتىغا چىقىرىۋىتىشكە پايدىلىق. بۇندىن باشقا، ئالما يەنە بەدەندىكى ئېنېرگىيەنى مىتابولىزىملاپ، بەدەننىڭ ئاستى قىسىمىنىڭ سەمىرىپ كېتىشىنىڭ ئالدىنى ئالىدۇ.

خەنزۇچە ئاتىلىشى: 苹果
لاتىنچە ئاتىلىشى: Malus domestica、
تەۋەلىكى: ئۆسۈملۈكلەر دۇنياسى—يېپىق ئۇرۇقلۇق ئۆسۈملۈكلەر تىپى—يېپىق ئۇرۇقلۇق ئۆسۈملۈكلەر كەنجى تىپى—قوش پەللىلىك ئۆسۈملۈكلەر سىنىپى—ئەتىرگۈل كەنجى سىنىپى—ئەتىرگۈل ئەترىتى—ئەتىرگۈل ئائىلىسى—ئالما كەنجى ئائىلىسى—ئالما ئۇرۇقدېشى
تارقالغان رايونلىرى: شىمالى يېرىم شاردىكى مۆتىدىل بەلباغ رايونلىرى

ئۇزۇقلۇق تەركىبى
   ھەر 100گىرام ئالما تەركىبىدە، 50كىلوكالورىيە ئېنېرگىيە، 0.2گىرام ئاقسىل، 0.2گىرام ياغ، 13.5گىرام كاربون سۇ بىرىكمىلىرى، 1.2گىرام تالا ماددىسى، 3مىكرو گىرام ۋىتامىنA، 20مىكروگىرام كاروتىن، 0.06مىللىگىرام ۋىتامىنB1، 0.02مىللىگىرام ۋىتامىنB2، 0.2مىللىگىرام نىكوتىن كىسلاتا، 4مىللىگىرام ۋىتامىنC، 2.12مىللىگىرام ۋىتامىنE، 4مىللىگىرام كالتسىي، 12مىللىگىرام فوسفور، 119مىللىگىرام كالىي، 1.6مىللىگىرام ناترىي، 4مىللىگىرام ماگنىي، 0.6مىللىگىرام تۆمۈر، 0.19مىللىگىرام سىنىك، 0.12مىكروگىرام سېلىن، 0.06مىللىگىرام مىس، 0.03مىللىگىرام مانگان بار.

ئۇزۇقلۇق قىممىتى
   ئالما تەركىبىدە كالىي نىسبەتەن كۆپ بولۇپ، ئادەم بەدىنىدىكى ئارتۇق ناترىي بىلەن بىرىكىپ، ناترىنى بەدەن سىرتىغا چىقىرىۋېتىدۇ. ئادەم بەدىنى زىيادە كۆپ ناترىي قوبۇل قىلغاندا، ئالما يەپ بەرسە، بەدەندىكى ئېلېكترولىتلارنى تەڭپۇڭلاشتۇرۇشقا پايدىلىق بولىدۇ. ئالما تەركىبىدىكى فوسفور ۋە تۆمۈر قاتارلىق ماددىلار، ئاسانلا ئۈچەي دىۋارى تەرىپىدىن سۈمۈرۈلۈپ، مېڭىنى قۇۋۋەتلەپ قاننى جانلاندۇرۇش ۋە نېرۋىنى تىنچلاندۇرۇپ ئۇيقۇنى ياخشىلاش رولىنى ئۆتەيدۇ.