بۈگۈن كۆپچىلىكنىڭ دىققىتىگە، ئاددىي ئەمما تەملىك بولغان يېمەكلىك—قىياملىق تەملەشتۈرۈلگەن سوغۇق سەي تونۇشتۇرۇپ ئۆتىمىز. قىياملىق تەملەشتۈرۈلگەن بۇ سەينى ئەتىگىنى ناشتىدا ئىستېمال قىلىشقا بولىدۇ، ئۇنىڭ ئۈستىگە ئۆزىڭىزنىڭ خاھىشىغا ئاساسەن،ھەرخىل كۆكتاتلارنى ماسلاشتۇرۇپ تەييارلىسىڭىز بولىدۇ. بۈگۈن مەن، ئۆزۈم ياخشى كۆرىدىغان كۆكتاتلارنى ماسلاشتۇرۇپ تەييارلاش ئۇسۇلىنى تونۇشتۇرۇپ ئۆتىمەن.

خام ماتېرىيال
   نىلوپەر غولى، كەرەپشە، چىچەكسەي، كۆكمۇچ، قىزىلمۇچ، ئاق تۇرۇپ
تەم خۇرۇچلىرى
   قاقمۇچ، كاۋاۋىچىن، شاكال بەدىيان، زەنجىۋىل، سامساق، شېڭچوۋ جىياڭيۇسى، لاۋچوۋ جىياڭيۇسى، تۇز، ئاق شېكەر، ئاق كۈنجۈت، يۇمغاقسۈت
تەييارلاش ئۇسۇلى

   نىلوپەر غولىنى ياپراقچە توغرايمىز؛ كەرەپشىنى بۆلەك ھالىتىدە توغرايمىز؛ چىچەكسەينى ئۇششاقراق قىلىپ توغرايمىز؛ كۆكمۇچنى بۆلەك ھالىتىدە توغرايمىز؛ قىزىلمۇچنى بۆلەك ھالىتىدە توغرايمىز.

   ئاق تۇرۇپنى نىپىز ياپراقچە قىلىپ توغرىغاندىن كېيىن، مۇۋاپىق مىقداردا تۇز ئارىلاشتۇرۇپ، ئازراق ۋاقىت قويۇپ قويىمىز.

  توغراپ تەييار قىلغان كۆكتاتلارنى قايناقسۇدا ئىككى مىنۇت قايناتقاندىن كېيىن، سۈزۈپ ئېلىپ سۇۋۇتىمىز.

   قازاندا ماي قىزىتىپ، كاۋاۋىچىن، شاكال بەدىيان، قىزىلمۇچ قاتارلىقلارنى سېلىپ قورۇپ تەم چىقارغاندىن كېيىن، 30مىللىلىتىر شىڭچوۋ جىياڭيۇسى، 30مىللىلىتىر لاۋچوۋ جىياڭيۇسى، بىر چىنە سۇ، مۇۋاپىق مىقداردا تۇز، شىكەر قاتارلىقلارنى قوشۇپ ئارىلاشتۇرۇپ، قاينىغاندىن كېيىن ئوتنى ئۆچۈرۈپ سۇۋىتىمىز.
تەملەشتۈرۈش ئۇسۇلى

   كۆكتاتلارنى ۋە تۇزلاپ تەييار قىلغان ئاق تۇرۇپنى بىر قاچىغا سېلىپ، ئۈستىگە توغرالغان زەنجىۋىل، سامساق ۋە ئالدىدا تەييار قىلغان قىيامنى قوشۇپ، قاچىنىڭ ئېغىزىنى ھىم ئىتىپ بىر ئاخشام قويۇپ قويىمىز.

   ئىككىنچى كۈنى ئەتىگەندە كۆكتاتلارنى قىيامدىن تەخسىگە سۈزۈپ ئېلىپ ئىستىمال قىلساقلا بولىدۇ.