يېقىندا، چىچەكسەينىڭ يىڭى بىر خىل تەييارلاش ئۇسۇلىنى بايقاپ قالدىم: چىچەكسەيگە باشقا كۆكتاتلاردىن قوشۇپ، ئۇنىڭغا يەنە ئالاھىدە تەييارلانغان قىيامنى ئارىلاشتۇرسىڭىز، ئازراق جۇڭگۇ ئۇسلۇبىدىكى سالاتقا ئوخشاپ قالىدىغان بولۇپ، ئىنتايىن يىيىشلىك بولىدۇ.

كىتەرلىك ماتىريال
   چىچەكسەي، سەۋزە، خوڭگا، سامساق، تۇخۇم
كىتەرلىك تەم خۇرۇچى
    يىمەكلىك مېيى، تۇز، شىڭچوۋ جىياڭيۇسى، ئاچچىقسۇ، كۈنجۈت مېيى، شىكەر

 

 

    چىچەكسەينى كىچىك پارچە قىلىپ توغرايمىز.

    سەۋزىنى يانتۇ تۆت بۇرجەك قىلىپ نىپىز توغرايمىز.

    خوڭگىنى كىچىك پارچە ھالەتتە توغرايمىز.

    قازانغا سۇ قۇيۇپ قاينىتىپ، بىر قۇشۇق ماي، بىر قوشۇق تۇز قۇيىمىز.

    چىچەكسەينى سېلىپ، ئىككى مىنۇت قاينىتىمىز.

    چىچەكسەي پىشىپ قالاي دىگەندە سۈزىۋىلىپ، چوڭراق بىر قاچىغا سېلىپ قويىمىز.

    كەينىدىن سەۋزىنى قازانغا سېلىپ، ئوخشاشلا قاينىتىپ پىشۇرۋالغاندىن كىيىن، چىچەكسەينى سالغان قاچىغا سالىمىز.

    قازانغا ئازراق ماي قۇيۇپ قىزىتقاندىن كىيىن، چېقىپ ئارىلاشتۇرۋەتكەن ئىككى تۇخۇمنى قۇيىمىز

    ئىككى تەرىپى ئالتۇن سېرىق بۇلغۇچە قاتۇرىمىز.

    قاتۇرۇپ بولغاندىن كىيىن قەلەمچە قىلىپ توغرايمىز.

    توغراپ بولغاندىن كىيىن، چىچەكسەي ۋە سەۋزە سېلىنغان قاچىغا سالىمىز.

    بۇ ۋاقىتتا، قىيام تەييارلاشقا تۇتۇش قىلىمىز: بىر قاچىغا چانالغان سامساقنى سېلىپ، ئۈستىگە ئىككى قوشۇق شىڭچۇۋ جىياڭيۇسى قۇيىمىز.(ئەگەر ياقتۇرسىڭىز، بىر قۇشۇق مۇچ تالقىنى قوشۇۋەتسىڭىز بولىدۇ)

    كەينىدىن ئۈستىگە بىر قۇشۇق ئاچچىقسۇ، بىر قۇشۇق كۈنجۈت مېيى، بىر قۇشۇقتىن ئازراق تۇز، بىر قۇشۇقتىن ئازراق شىكەر قوشىمىز.

    ئاخىرىدا بىر چۈمۈچ قىزىتىلغان ماي قۇيۇپ، تەكشى ئارىلاشتۇرۋەتسەك، قىيام تەييار بولىدۇ.

    چىچەكسەي، سەۋزە ۋە تۇخۇم قەلەمچىسىنىڭ ئۈستىگە، توغراپ تەييار قىلغان خوڭگىنى سېلىپ، ئالدىدا تەييار قىلغان قىيامنى ئۈستىگە تۆكىمىز.

    تەكشى ئارىلاشتۇرساق، بۈگۈنكى سۇغۇق سەي تەييار بولغان بولىدۇ.