ئون ئايال كىشىنىڭ توققۇزى سەمىرىپ قېلىشتىن قورقىدۇ. سېمىزلىككە قارىتا، مۇتەخەسسىسلەر ئىلمى ئۇسۇلدا ئۇزۇقلىنىپ، مۇۋاپىق تۈردە ھەرىكەت قىلىش تەكلىپىنى بەرگەن. بىزمۇ بۈگۈن كۆپچىلىكنىڭ دىققىتىگە، بەدەندىكى مايلارنى ئىرىتىپ ئۇرۇقلىتىدىغان بىر خىل قورىمىنى—تەرخەمەك تۇخۇم قورىمىسىنى تەييارلاش ئۇسۇلىنى تونۇشتۇرۇپ ئۆتىمىز.    كىتەرلىك ماتېرىيال: تەرخەمەك، تۇخۇم، غولپىياز مايسىسى، تۇز، كۈنجۈت مېيى، توخۇ تەم جەۋھىرى
تەييارلاش ئۇسۇلى
   ئالدى بىلەن تەرخەمەكنى پاكىزە يۇيۇپ تازىلاپ، ياپراقچە ھالىتىدە توغرىۋالىمىز؛ غولپىياز مايسىسىنى بۆلەك ھالىتىدە توغراپ تەييارلايمىز.    تۇخۇمدىن ئۈچنى بىر چىنىگە چېقىپ، ئازراق تۇز، كۈنجۈت مېيى ۋە قارىمۇچ قوشۇپ قوچۇيمىز. قورۇش ئۇسۇلى
   قازانغا ماي قۇيۇپ قىزىتىپ، تۇخۇمنى سېلىپ داغلاپ قاتۇرۋالغاندىن كېيىن، قاچىغا ئۇسۇپ ئېلىپ قويۇپ تۇرىمىز.    قازانغا قايتىدىن ماي قۇيۇپ قىزىتىپ، تەرخەمەكنى سېلىپ قورۇيمىز؛ تەرخەمەك پىشقاندىن كېيىن ئۈستىگە ئالدىدا قاتۇرۇپ ئېلىپ قويغان تۇخۇمنى سېلىپ، ئۈستىگە يەنە تەرتىپ بويىچە مۇۋاپىق مىقداردا توخۇ تەم جەۋھىرى، تۇز، غولپىياز مايسىسى قاتارلىقلارنى قوشۇپ، كىچىك ئوتتا ئازراق قورىغاندىن كېيىن تەخسىگە ئۇسۇپ ئالساق بولىدۇ.    ئالاھىدىلىكى: تەرخەمەك تۆت پەسىلنىڭ ھەممىسىدە ئىستېمال قىلىشقا ماس كېلىدىغان كۆكتات بولۇپ، ئۇنىڭ ۋىتامىن C تەركىبى ئىنتايىن مول، ئېنېرگىيە تەركىبى يۇقرى ئەمەس؛ شۇڭا، تەرخەمەكنى كۆپرەك يەپ بەرگەندە، بەدەندىكى مايلارنى ئىرىتىپ مىتابولىزىمنى تېزلىتىش رولىنى ئوينايدۇ.