پىنتوزا، تۇرمۇشىمىزدا كۆپ ئۇچرايدىغان يېمەكلىكلەرنىڭ بىرى بولۇپ، تاتلىق ياڭيۇ قاتارلىق يېمەكلىك ماتېرىياللىرىنى خام ماتېرىيال قىلىپ پىششىقلاپ ئىشلەپ چىقىرىلغان ئەنئەنىۋى يېمەكلىكتۇر.

   بۈگۈن كۆپچىلىكنىڭ دىققىتىگە، ئائىلىدە ئۆزگىچە بىر خىل پىنتوزا قورۇش ئۇسۇلىنى تونۇشتۇرۇپ ئۆتىمىز.
   خام ماتېرىيال: پىنتوزا، تۇخۇم، پىياز، غولپىياز
   تەم خۇرۇچى: تۇز، لاۋچوۋ جىياڭيۇ، قارىمۇچ، توخۇ تەم جەۋھىرى
تەييارلاش ئۇسۇلى
   پىنتوزىنى قايناقسۇغا 15مىنۇت چىلاپ قويىمىز.

   پىيازنى نىپىزراق قىلىپ توغرايمىز.

   غولپىيازنى ئۇششاق توغراپ تەييارلايمىز.

   تۇخۇمدىن ئىككىنى چېقىپ، قوچۇپ تەييارلايمىز.

   15مىنۇت توشقاندىن كېيىن، پىنتوزىنى سۈزۈپ ئېلىپ قورۇما قورۇشنى باشلايمىز.

   قازانغا ماي قۇيۇپ قىزىتىمىز.

   ماي بەش ئۈلۈش قىزىغاندىن كېيىن قوچىغان تۇخۇمنى سېلىپ داغلاپ قاتۇرىمىز.

   قازانغا قايتىدىن ئازراق ماي قۇيۇپ، پىيازنى سېلىپ قورۇيمىز؛ كەينىدىن پىنتوزىنى سېلىپ نەچچە ئارىلاشتۇرغاندىن كېيىن، ئوتنى پەسەيتىپ تەم تەڭشەشكە تۇتۇش قىلىمىز.

   مۇۋاپىق مىقداردا تۇز، توخۇ تەم جەۋھىرى، قارىمۇچ، لاۋچوۋ جىياڭيۇسى قاتارلىقلارنى قوشۇپ، ئوتنى قايتا ئېچىپ تېز سۈرئەتتە ئارىلاشتۇرۇپ قورۇيمىز؛ قاتۇرغان تۇخۇم بىلەن غولپىيازنى سېلىپ 15سىكونت قورىغاندىن كېيىن، ئوتنى ئۆچۈرۈپ تەخسىگە ئۇسۇپ ئالساق بولىدۇ.

   ۋاقتىڭىز چىققاندا، ئۆيىڭىزدە تەييارلاپ سىناپ بېقىڭ، تەمىدىن ئۈمىدسىزلىنىپ قالمايسىز.