ھازىر نۇرغۇن كىشىلەر، ئۇزۇقلۇقنىڭ تەڭپۇڭ بولىشىغا ئىنتايىن ئەھمىيەت بىرىدۇ؛ شۇڭا ھەممەيلەن، قايسى خىل يىمەكلىكنىڭ بەدەنگە پايدىلىق ئىكەنلىكىنى بىلىدۇ. بولۇپمۇ چىچەكسەيگە ئوخشاش ئۇزۇقلۇق تەركىبى مول بولغان كۆكتات، كىشىلەرنىڭ تېخىمۇ ئالقىشىغا ئىرىشكەن.

   چىچەكسەيدىن تائام تەييارلاش ئۇسۇلى گەرچە ناھايىتى كۆپ بولسىمۇ، ئەمما ئۆيدە تەييارلاشقا ماس كىلىدىغانلىرى كۆپ ئەمەس؛ بۈگۈن كۆپچىلىكنىڭ دىققىتىگە، تەييارلىماق ئاسان بولغان قۇرۇتۇپ قورۇلغان چىچەكسەي تەييارلاش ئۇسۇلىنى ئاددىيلا تۇنۇشتۇرۇپ ئۆتىمىز.
   كىتەرلىك ماتىريال: قوي گۆشى، چىچەكسەي، سامساق، زەنجىۋىل، قاقمۇچ

تەييارلاش ئۇسۇلى
   بىرىنچى قەدەمدە، چىچەكسەينى يۇيۇپ پاكىزلىغاندىن كىيىن، كىچىكرەك قىلىپ توغراپ ئىشلىتىش ئۈچۈن تەييار قىلىپ قويىمىز. گۆشنى نىپىز يالپاقلاپ توغرايمىز، سامساق ۋە زەنجىۋىلنى ئۇششاق چاناپ توغرايمىز؛ قاقمۇچنى بۆلەك ھالىتىدە توغرىۋالىمىز.
   ئىككىنچى قەدەمدە، قازانغا سۇ قويۇپ ئوچاققا ئېسىپ، سۇ قاينىغاندىن كىيىن چىچەكسەينى سېلىپ، ئازراق قايناتقاندىن كىيىن سۈزۈپ ئېلىۋالىمىز.
   ئۈچىنچى قەدەمدە، قازاننى قايتىدىن ئېسىپ، ئازراق ماي قۇيىمىز؛ ماي قىزىغاندىن كىيىن، گۆشنى سېلىپ قورۇيمىز.

   تۆتىنچى قەدەمدە، گۆش سارغايغاندىن كىيىن، سامساق، زەنجىۋىل، قاقمۇچ ۋە كاۋاۋىچىنلارنى سېلىپ قورۇپ تەم چىقىرىمىز؛ كەينىدىن چىچەكسەينى سېلىىپ قورۇيمىز؛ قورۇپ چىچەكسەينىڭ يان تەرەپلىرىدە سارغايغاندىن كىيىن مۇۋاپىق مىقداردا جىياڭيۇ قۇيۇپ داۋاملىق قورۇيمىز.
   بەشىنچى قەدەمدە، چىچەكسەي قورۇلۇپ پىشقاندىن كىيىن، تەخسىگە ئۇسۇپ ئېلىپ، ئۈستىگە توغرالغان يۇمغاقسۈتتىن ئازراق سېپىۋەتسەكلا تاماق ئۈستىلىگە ئېلىپ چىقساق بولىدۇ.

دوستانە تەكلىپ
   1. چىچەكسەينى توغرىغاندا، ئەڭ ياخشىسى چىچەكسەينىڭ شەكىل ھالىتىنى بويلىتىپ توغراش كېرەك؛ ئەگەر قالايمىقان توغرىساق، چىچەكسەي ئۇۋۇلۇپ كىتىپ، قورىمىنىڭ سۈپىتىگە تەسىر يىتىشى مۇمكىن.
   2. قورۇمىنى قورۇشتىن ئاۋال، چىچەكسەينى چوقۇم سۇدا قاينىتىپ چالا پىشۇرۋىلىش كېرەك.