كالا گۆشى قېقى نۇرغۇن كىشىلەر كىچىكىدىنلا ياخشى كۆرىدىغان ئۇششاق يىمەكلىك؛ بۈگۈن كۆپچىلىككە ئۆيدىلا تەييارلاشقا بولىدىغان ئاچچىق كالا گۆشى قېقى تەييارلاش ئۇسۇلىنى تۇنۇشتۇرۇپ ئۆتىمىز، تەييارلاش ئۇسۇلى ئاددى بولۇپ، قانچىلىك يىگۈڭىز بولسا شۇنچىلىك تەييار قىلالايسىز.

كىتەرلىك ماتىريال:
       400گىرام كالا گۆشى، سامساق، سوقۇلغان قىزىلمۇچ، ئاق كۈنجۈت
تېتىتقۇ خۇرۇچلىرى:
       يىمەكلىك مېيى، مۇچ قىيامى، سوقۇلغان كاۋاۋىچىن

تەييارلاش ئۇسۇلى
 

      كالا گۆشىنى سۇغۇق سۇغا سېلىپ، ئوچاققا ئېسىپ بىر قاينىتىپ ئەخلەتلىرىنى چىقىرۋەتكەندىن كىيىن سۈزۈپ ئېلىۋالىمىز.

      كالا گۆشىنى سۇۋۇتقاندىن كىيىن، ئۇنى ياپراقچە شەكىلدە، ئادەتتە قورۇما قورۇشقا توغرىغاندىن ئازراق قېلىن قىلىپ توغرىۋالىمىز.

     قازانغا گۆشىنىڭ ھەممىسى چۆكۈشكىدەك ماي قويۇپ قىزىتىمىز؛ ماي 6 ئۈلۈش قىزىغاندىن كىيىن، گۆشنى بىرپارچە بىر پارچىدىن قازاندىكى مايغا سېلىپ، ئوتتۇرا ھال ئوتتا ئاستا داغلايمىز؛ كالا گۆشىنىڭ تەركىبىدىكى سۇ تەركىبى داغلىنىپ، گۆشنىڭ رەڭگى قارىيىشقا باشلىغان ھامان سۈزۈپ ئېلىۋالىمىز.

يەنە بىر قازان ئېسىپ، ئازراق ماي قۇيۇپ چانالغان سامساقنى سالىمىز.

سامساقنىڭ تەمىنى چىقارغاندىن كىيىن، داغلاپ تەييار قىلغان كالا گۆشىنى سېلىپ نەچچە ئۆرۈپ قورۇيمىز.

كەينىدىن بىر قوشۇق مۇچ قىيامى سېلىپ تەكشى ئارىلاشتۇرۇپ قورۇيمىز.

      20گىرام سوقۇلغان قىزىلمۇچ، بىر قوشۇق سوقۇلغان كاۋاۋىچىن قوشۇپ، توختىماي ئۆرۈپ قورۇپ، كالا گۆشىنىڭ تېتىتقۇ خۇرۇچلىرىغا تۇلۇق تىگىشىشىگە كاپالەتلىك قىلىمىز.

      ئاخىرىدا ئوتنى ئۆچۈرۈپ مۇۋاپىق مىقداردا ئاق كۈنجۈت سېپىپ، نەچچە مالتىلاپ تەكشى ئارىلاشتۇرۋەتسەك، بۈگۈنكى ئاچچىق كالا گۆشى قېقى تەييار بولىدۇ.