ئاساسى ماتېرىيالى: قوي گۆشى 300 گىرام، يۇمغاقسۈت، سامساق، كىچىك قىزىلمۇچ

   تەم خۇرۇچلىرى: تۇز، شىكەر، تېتىتقۇ، توخۇ تەم جەۋھىرى، كۈنجۈت مېيى، ئاق ئاچچىقسۇ

   تەييارلاش ئۇسۇلى: گوشنى ياپراقچە توغراپ تەييارلايمىز؛ يۇمغاقسۈتنى يۇيۇپ پاكىزلاپ بارماق ئۇزۇنلىقىدا توغرىۋالىمىز؛ سامساق ۋە كىچىك قىزىلمۇچلارنى ئۇششاق توغراپ تەييارلايمىز.

   قورۇش ئۇسۇلى: قازانغا مۇۋاپىق مىقداردا ماي قۇيۇپ، قىزىغاندا گۆشنى سېلىپ سارغايتىپ قورىغاندىن كېيىن سۈزۈپ ئېلىۋالىمىز؛ قازانغا قايتىدىن ئازراق ماي قۇيۇپ، سامساق ۋە كىچىك قىزىلمۇچنى سېلىپ قورۇپ تەم چىقارغاندىن كېيىن، يۇمغاقسۈت ۋە قوي گۆشىنى سېلىپ قورۇيمىز؛ كەينىدىن تۇز، تېتىتقۇ، توخۇ تەم جەۋھىرى، شېكەر قاتارلىقلارنى قوشۇپ تەمىنى تېتىپ، مۇۋاپىق مىقداردا كۈنجۈت مېيى ۋە ئاق ئاچچىقسۇ تېمىتىپ تەخسىگە ئۇسۇپ ئالساق بولىدۇ.

   ئەگەر شارائىت يار بەرسە، تۆمۈر تەخسىنى قىزىتىپ ۋە ئۈستىنى تاش قەغەز(شىزى) بىلەن ئوراپ، تاش قەغەز ئۈستىگە باش پىيازنى ئىنچىكە قىلىپ توغراپ يېيىلتىپ، ئۈستىگە ئاندىن قورىمىنى ئۇسۇپ ئالساق بولىدۇ. بۇنىڭدا قورىما مېھمانلارنىڭ ئالدىغا كىرگەندە، چاراسلىغان ئاۋازى مىھمانلارنى ئوزىگە جەلىپ قىلىدۇ، يۇمغاقسۈتنىڭ مەززىلىك پۇرىقى بولسا مېھمانلارنىڭ دىمىقىغا ئورۇلۇپ ئىشتىھاسىنى ئاچىدۇ.
   يۇمغاقسۈت: ئاشكۆكى دەپمۇ ئاتىلىدىغان بولۇپ، ئاشقازاننىڭ ھەزىم قىلىشى ئىقتىدارىنى ياخشىلايدۇ، ئىشتىھانى ئاچىدۇ، زۇكامنى داۋالاش ۋە بەدەن تەرلەشنىڭ ئالدىنى ئېلىش رولى بار؛ بۇندىن باشقا، تائاملارغا شۇنداق ياخشى تەم ۋە پۇراق ئېلىپ كېلىدۇ.