ئامرىكىلىق ئايال روسىي.گىل ياشلىق ۋاقتىدىن باشلاپلا، ئۆزىنىڭ بەدىنىدىكى زىيادە كۆپىيىپ كەتكەن تۈكلەر ۋە ساقىلى بىلەن كۈرەش قىلىپ كەلگەن بولۇپ، ھازىر ئۇ ساقىلىنى قىرىشتىن ۋاز كەچكەندىن كىيىن، ئەكسىچە ئۆزىگە بولغان ئىشەنچىسىنى قايتىدىن تېپىۋالدى. روسىي بۇيىل 39 ياشقا كىرگەن بولۇپ، گەرچە دوختۇرلار ئىنىق دىئاگۇنوز قويالمىغان بولسىمۇ، ئەمما ئۇ ئۆزىنىڭ بىنورمال كەلگەن تاشىقى قىياپىتىنى كۆپ خالتىلىق تۇخۇمدان سىندرومى كىسەللىكى سەۋەبىدىن دەپ قارايدۇ.

    روسىي 13 ياش ۋاقتىدىن باشلاپ، ئۇنىڭ زاڭىقى، ئىككى مەڭزى ۋە ئۈستۈن كالپۇكىنىڭ يۇقىرى تەرپىگە ساقال ئۈنۈپ چىقىشقا باشلىغان. ئەينى ۋاقىتتا ئۇ ناھايىتى بىئارام بولۇپ، ساقالنىڭ ئىزناسى كۆرۈنگەن ھامان ئۇنى قىرىپ تاشلايتتى؛ چۈنكى ئۇ ئۆزىنىڭ بۇ ھالىتىنى باشقىلارنىڭ كۆرۈپ قېلىشىنى خالىمايتتى، خىجىللىق ھىس قىلاتتى.

    ئۇزۇن يىلدىن بىرى، ھەر كۈنى داۋاملىشىۋاتقان ساقال يۇڭداش، ساقال قىرىش، ھەتتا قىممەت ھەقلىق لازىر نۇرى ئوپىراتسىيەسى قاتارلىقلار ئۇنىڭ تىرىسىنى ئىنتايىن ئاجىز قىلىۋەتكەن بولۇپ، ئۇنىڭ تىرىسى ئەمدى داۋاملىق بۇنداق قىيناشلارنى كۆتۈرەلمەيتتى.

    بۇنىڭ بىلەن بىرگە، ئۇ ئۆزى ئالاقە قىلغان ئەرلەرنىڭ، دوستلىرىنىڭ ھەم ئائىلىسىدىكىلەرنىڭ، ئۇنىڭ سىرتقى قىياپىتىگە قاراپ ئولتۇرمايدىغانلىقىنى بايقاپ، ئۇنىڭدا ئەمدى قايتا ساقال قىرماسلىق ئويى پەيدا بولدى.

   ئىجتىمائى ئالاقە ۋاستىلىرىمۇ ئۇنىڭ بۇنداق ئۆزگىرىش ھاسىل قىلىشىدىكى سەۋەپلەرنىڭ بىرى ئىدى. دورا بىلەن داۋالاش ئۈنۈم بەرمىگەندىن كىيىن، ئۇ توردا ئۆزى بىلەن ئوخشاش كەچمىشلىرى بار نۇرغۇن كىشىلەر بىلەن ئۇچراشتى؛ بۇ ئۇنىڭغا ناھايىتى چوڭ بىر رىغبەتلەندۈرۈش بولدى.