داپەنجىنى تونۇشتۇرۇپ ئولتۇرمىساممۇ كۆپچىلىكنىڭ ھەممىسىگە تونۇشلۇق. ئىشىنىمەنكى، سىز ئۆيىڭىزدە داپەنجى تەييارلاپ يەپ باققان، ھەم بۇندىن كېيىنمۇ چوقۇم شۇنداق قىلىسىز؛ شۇڭا بۈگۈن، مەن ئۆزۈمنىڭ ئائىلىدە داپەنجى تەييارلاش ئۇسۇلۇمنى سىز بىلەن ھەمبەھىرلىنىپ ئۆتمەكچىمەن.

   كىتەرلىك ماتېرىيال: توخۇ گۆشى، ياڭيۇ، كۆكمۇچ، قىزىلمۇچ، پىياز، زەنجىۋىل، سامساق
   تەم خۇرۇچلىرى: ئىستېمال مېيى، پۇرچاق بوتقىسى، ناۋات، تۇز، توخۇ تەم جەۋھىرى، شىڭچوۋ جىياڭيۇسى، شاكال بەدىيان، كاۋاۋىچىن، قاقمۇچ

تەييارلاش ئۇسۇلى
   توخۇ گۆشىنى توغرايمىز؛ ياڭيۇنى ئاقلاپ توغرايمىز؛ قىزىلمۇچ بىلەن كۆكمۇچنى چوڭراق پارچە ھالىتىدە توغرايمىز؛ زەنجىۋىل، سامساق، قاقمۇچ قاتارلىقلارنى كىچىكرەك توغرايمىز.

   قازاندا سۇ قاينىتىپ، توخۇ گۆشىنى سېلىپ قاينىتىۋالغاندىن كېيىن سۈزۈپ ئېلىپ قويىمىز. قازانغا ماي قۇيۇپ قىزىتىپ، شاكال بەدىيان، كاۋاۋىچىن، قاقمۇچ، سامساق، زەنجىۋىل قاتارلىقلارنى سېلىپ قورۇپ تەم چىقىرىمىز.

   پۇرچاق بوتقىسىنى سېلىپ قورۇپ قىزىل ماي چىقارغاندىن كېيىن توخۇ گۆشىنى سېلىپ قورۇيمىز؛ ناۋات ۋە شىڭچوۋ جىياڭيۇسى قوشۇپ، توخۇ گۆشى سارغايغىچىلىك قورۇيمىز.
   قازانغا بىر چىنە سۇ قۇيۇپ، چوڭ ئوتتا قايناتقاندىن كېيىن، كىچىك ئوتقا ئالماشتۇرۇپ 15مىنۇت دۈملەپ پىشۇرىمىز؛ 15مىنۇتتىن كېيىن ياڭيۇنى سېلىپ يەنە 15مىنۇت دۈملەيمىز.

   ۋاقىت توشقاندىن كېيىن كۆكمۇچ، قىزىلمۇچ ۋە پىيازنى سېلىپ ئارىلاشتۇرۇپ قورۇپ، چوڭ ئوتقا ئالماشتۇرۇپ قاينىتىپ سۈيىنى تۈگىتىمىز.