ياڭاقنىڭ ئۇزۇقلۇق قىممىتى ئىنتايىن يۇقىرى بولۇپ، ئادەم بەدىنىگە پايدىلىق بولغان تويۇنمىغان ياغ كىسلاتالىرى، لېتسىتىن، ۋىتامىنE قاتارلىقلار ئىنتايىن مول.
   تويۇنمىغان ياغ كىسلاتالىرى، قان تەركىبىدىكى خولىستىرىن، گلېتسېرىد، ۋە تۆۋەن زىچلىك ئاقسىل قاتارلىقلارنىڭ مىقدارىنى تۆۋەنلىتىپ، يۇقىرى قان بېسىم، تاجىسىمان يۈرەك كېسەللىكى، قاننىڭ ماي تەركىبى يۇقىرى بولۇش قاتارلىق كېسەللىكلەرنىڭ ئالدىنى ئالىدۇ.
   ۋىتامىنEنىڭ بولسا، ئىممونت كۈچىنى يۇقىرى كۆتۈرۈش، ئارتىرىيە قېتىشىشقا قارشى تۇرۇش، راك كېسەللىكىنىڭ ئالدىنى ئېلىش، كۆرۈش قۇۋۋىتىنى ئاسراش، "قېرىلىق دېغى" قاتارلىقلارنى يوقىتىش رولى بار. شۇنىڭ ئۈچۈن، ياڭاق، ياشانغانلارنىڭ ئەڭ ياخشى ئۇزۇقلۇق يېمەكلىكى ھېسابلىنىدۇ.

تەركىبىدە كۆپ خىل ئۇزۇقلۇق ماددىلار مول
   ياڭاق تەركىبىدە ئاقسىل ۋە كاربون سۇ بىرىكمىلىرى مول، ئادەم بەدىنىگە زۆرۈر بولغان كالتسىي، فوسفور، تۆمۈر قاتارلىق كۆپ خىل مىكرو ئىلمىنتلار ۋە مىنرالنى ئىلمىنتلار، كاروتىن، رىبوفلاۋىن قاتارلىق ۋىيتامىنلار مول بولۇپ، ياڭاقنى دائىم ئىستىمال قىلىپ بەرگەندە، بەدەنگە ئۈنۈملۈك ھالدا كۆپ خىل ئۇزۇقلۇق ماددىلارنى تولۇقلاپ بىرەلەيدۇ.
قاننى جانلاندۇرۇش
   ياڭاقنىڭ قاننى جانلاندۇرۇش رولى بار بولۇپ، بەدەندە قېپ قالغان ئۇيۇلغان قانلارنى بەدەن سىرتىغا چىقىرىشنى ئىلگىرى سۈرىدۇ؛ بولۇپمۇ ئاياللاردا قان ئۇيۇشۇۋىلىپ ھەيىز ئاغرىتىپ كېلىش، تۇغۇتتىن كېيىنكى چىللە خۇنى پاكىزە بولماسلىق قاتارلىق ئەھۋاللارغا نىسبەتەن، ياڭاقنىڭ ياخشىلاش ئۈنۈمى ئالاھىدە كۆرۈنەرلىك بولىدۇ.
ھۆتەلنى توختىتىپ كاناي قۇرغاقلىشىشنى ياخشىلاش
   دائىم ياڭاق يەپ بەرگەندە، كاناي سىلىق مۇسكۇلى تارتىشىش ئالامەتلىرىگە قارشى تۇرۇش، بەلغەمنى بوشىتىپ كاناي قۇرغاقلىشىشنى ياخشىلاش، سوغۇقتىن كېلىپ چىققان ھۆتەلنى ياخشىلاش قاتارلىق كۆپ خىل ئۈنۈملەرگە ئېرىشكىلى بولىدۇ.
بۆرەكنى قۇۋۋەتلەش
   ياڭاقنىڭ تەبىئىتى مۆتىدىل بولۇپ بۆرەك ۋە ئۆپكىنى قۇۋۋەتلەش، ھۆتەلنى توختىتىپ بەلغەمنى بوشىتىش، ئۈچەينى سىلىقلاشتۇرۇپ چوڭ تەرەتنى راۋانلاشتۇرۇش قاتارلىق ئۈنۈمى بار بولۇپ، بۆرەك ۋە ئۆپكە ئاجىزلىق سەۋەبىدىن كېلىپ چىققان ھۆتەلنى داۋالاش، ئۈچەي قۇرغاقلىشىشتىن كېلىپ چىققان قەۋزىيەت، بۆرەك ئاجىزلىقتىن كېلىپ چىققان بەل ئاغرىش ۋە كىچىك تەرەت بىنورماللىشىش قاتارلىق كېسەللىك ئالامەتلىرىنى داۋالاشقا ئىشلىتىلىدۇ.