لەڭپۇڭ، شىنجاڭدا كۆپ ئۇچرايدىغان يېمەكلىكنىڭ بىرى بولۇپ، ئۇششاق يېمەكلىككە تەۋە. ھاۋا ئىسسىق كۈنلىرىدە، لەڭپۇڭنى ھەممە يەردىن تاپقىلى بولىدۇ؛ لېكىن قىش مەزگىلىدە لەڭپۇڭ يىسەك، يازدىكىدەك ئۇنداق بەك خوش يېقىپ كەتمەيدۇ. شۇڭا، بۈگۈن كۆپچىلىكنىڭ دىققىتىگە، "ئىسسىق لەڭپۇڭ" تەييارلاش ئۇسۇلىنى تونۇشتۇرۇپ ئۆتمەكچىمىز.

   ئالدى بىلەن، لەڭپۇڭنى ئىككى سانتىمېتىر چوڭ-كىچىكلىكتە تۆت بۇرجەك پارچە قىلىپ توغرىۋالىمىز. ئۇندىن كېيىن، قاقمۇچ، زەنجىۋىل، غولپىياز، سامساق، پۇرچاق بوتقىسى قاتارلىق ماتېرىياللارنى تەييارلايمىز؛ غولپىيازنى يۇيۇپ بۆلەك ھالىتىدە توغرايمىز، زەنجىۋىل بىلەن سامساقنى ئۇششاق چاناپ توغرايمىز.

   قازان ئېسىپ ماي قۇيۇپ قىزىتقاندىن كېيىن، پۇرچاق بوتقىسى ۋە قاقمۇچنى سېلىپ تەم چىقىرىمىز؛ كەينىدىن سامساق، زەنجىۋىل، غولپىياز قاتارلىقلارنى سېلىپ قورۇپ تەكشى ئارىلاشتۇرۇپ، مۇۋاپىق مىقداردا سۇ قۇيىمىز؛ سۇ قايناپ چىققاندىن كېيىن، ئىككى مىنۇت ساقلاپ، خۇرۇچلارنىڭ تەمىنى پۈتۈنلەي چىقىرىمىز(لەڭپۇڭنى سېلىشتىن بۇرۇن، تۇز تەمىنى تېتىپ تەڭشىۋىلىشنى ئۇنۇتماڭ)؛ ئىككى مىنۇت توشقاندىن كېيىن لەڭپۇڭنى سېلىپ، سۈيى قايناپ يېرىمى قالغاندا، ئۇسسۇپ ئالساق بولىدۇ.(سۇنى بەك كۆپ قۇشۇۋەتمەڭ، لەڭپۇڭنى ئۇزۇن قاينىتىۋەتسىڭىز، ئىزىلىپ ئوماچ بولۇپ كېتىدۇ)

   دوستانە تەكلىپ: سوغۇق يېمەكلىكلەرنى چوقۇم ئاز ئىستېمال قىلىڭ، ئاشقازان ۋە ئۈچەيگە زىيانلىق. پەقەت ساغلام يېمەك-ئىچمەك ئادىتى ۋە مۇۋاپىق تۈردىكى ھەرىكەتلىنىش بولغاندىلا، ئاندىن ساغلام بەدەنگە ئېرىشەلەيمىز.