چۆچۈرە، كۆپ قىسىم كىشىلەر ياقتۇرۇپ يەيدىغان بىر خىل تائام بولۇپ، ئۇنىڭ جۇۋاۋا بىلەن ئوخشىمايدىغان يىرى، جىلىتى نىپىز قىيمىسى كۆپ، شۇڭا تېخىمۇ تەملىك. ئۇنىڭ ئۈستىگە جۇۋاۋىنى لازا ئاچچىقسۇغا قوشۇپ ئىستىمال قىلىمىز، چۆچۈرىنى بولسا سۈيى بىلەن قوشۇپ ئىچىمىز. لېكىن، چۆچۈرىنىڭ سۈيى چوقۇم ياخشى چىقىشى كېرەك، بۇنىڭدا چۆچۈرە تېخىمۇ تەملىك بولىدۇ.

   ئادەم بىلەن ئادەمنىڭ تەم خاھىشى ئوخشىمايدۇ، بەزىلەر چۆچۈرىنىڭ سۈيىنى تۇزلۇقراق قىلىپ ئىچىشنى ياخشى كۆرىدۇ، يەنە بەزىلەر بولسا تۇز تەمىنى سۇسراق قىلىپ ئىچىشنى ياخشى كۆرىدۇ. چۆچۈرىنىڭ سۈيىنى، تۇزدىن باشقا يىمەكلىك ۋە خۇرۇچ ماتېرىياللىرىنى ئىشلىتىپ تەڭشەپ، تەمى ئېغىزدا قالغۇدەك چۆچۈرە تەييارلاشقا بولىدۇ ۋە ياكى سۆڭەك قاينىتىپ، چۆچۈرىنى سۆڭەك شورپىسىغا سېلىپ پىشۇرساقمۇ بولىدۇ.

   ئادەتتە، چۆچۈرە سۈيىنى تەڭشەشتە ئىشلىتىلىدىغان كۆپ ئۇچرايدىغان ماتېرىياللاردىن، يۇمغاقسۈت، شىڭچۇۋ جىياڭيۇسى، توخۇ تەم جەۋھىرى، كۈنجۈت مېيى، پەمىدۇر، يۇۋبەسەي، غولپىياز مايسىسى قاتارلىقلار بار.

   كونكىرتنى ئۇسۇل جەھەتتە، ئەگەر سۆڭەك شورپىسىغا سېلىپ پىشۇرماقچى بولساق، سۆڭەك قايناپ پىشاي دەپ قالغان ۋاقىتتا، چۆچۈرىنى سېلىپ پىشۇرساق بولىدۇ؛
   ئەگەر يۇۋ بەسەي، شوخلا قاتارلىقلارنى قوشۇپ، چۆچۈرە سۈيىنى رەڭلىك ھەم تەملىك چىقسۇن دېسەك، چۆچۈرىنى قاينىغان سۇغا سېلىپ بولۇپلا، يۇۋبەسەي بىلەن شوخلىنى قازانغا سېلىپ، چۆچۈرە بىلەن بىللە قاينىتىپ پىشۇرساق بولىدۇ.
   ئەگەر چۆچۈرە سۈيىگە يۇمغاقسۈت ياكى غولپىياز مايسىسى قوشماقچى بولساق، يۇمغاقسۈت ياكى غولپىياز مايسىسىنى ئالدىنئالا ئۇششاق توغراپ تەييارلىۋىلىپ، چۆچۈرىنى پىشىپ ئۇسۇپ ئېلىشنىڭ ئالدىدا، توغرالغان غولپىياز مايسىسى ياكى يۇمغاقسۈتنى قازانغا سېلىپ، بىر مالتىلاپ ئارىلاشتۇرۇپ، قازان قايناپ چىققاندىن كىيىن ئۇسۇپ ئالساق بولىدۇ.