ئۆيدە ئارام ئالغاچ تېلىۋىزور كۆرگەن ۋاقىتلىرىمىزدا، گازىر ياكى خاسىڭ، بىزنىڭ ئەڭ ياخشى ھەمراھىمىزغا ئايلىنىدۇ. گازىر بىلەن خاسىڭ نۇرغۇن ئۆيلەردە زاپاس ساقلىنىدىغان ئۇششاق يېمەكلىك بولۇپ، بىزنىڭ بوش ۋاقىتلىرىمىزنى زىرىكمەي ئۆتكۈزۈشىمىزگە ياردەمچى بولالايدۇ.

   لېكىن، ئۇرۇقلاۋاتقان دوستلارغا نىسبەتەن، گازىر بىلەن خاسىڭنى خالىغانچە ئىستىمال قىلىشقا بولمايدۇ؛ چۈنكى، بۇ ئىككىسىنىڭ ئىچىدىكى بىرسى ئادەمنى ئۇرۇقلىتىدۇ، ئەمما يەنە بىرسى ئادەمنى سەمىرتىپ قويىدۇ. ئۇرۇقلاۋاتقان دوستلار بۇنى ۋاقتىدا بېلىۋېلىشى كېرەك.

   گازىر بىلەن خاسىڭنى ئاددىي چاغلاپ قالماڭ، بۇ ئىككى خىل يېمەكلىكنىڭ ھەر ئىككىسىدىن ياغ چەككىلەپ ئېلىشقا بولىدۇ. گازىر بىلەن خاسىڭ ئارىسىدا، گازىرنىڭ ئۇزۇقلۇق تەركىبى نىسبەتەن مول بولۇپ، ياغ تەركىبلىرى تېخىمۇ يۇقىرى، شۇڭا ئۇ يۇقىرى ئېنىرگىيەلىك يېمەكلىككە تەۋە؛ ھەر 100گىرام گازىر مېغىزى تەركىبىدە، 50گىرام ياغ تەركىبى بار بولۇپ، بۇ مىقدار، ئادەم بەدىنى بىر كۈندە ئىھتىياجلىق بولىدىغان ياغ تەركىبى مىقدارىدىن ئېشىپ كېتىدۇ. لىكىن بىز ئادەتتە، بىردەم ئولتۇرۇپ چاققان گازىر، 100گىرامدىن خېلىلا ئېشىپ كېتىدۇ.

   ئۇنىڭ ئۈستىگە، بەزى تىجارەتچىلەر گازىر مېغىزىنى تېخىمۇ تەملىك قىلىپ خېرىدار جەلپ قىلىش ئۈچۈن، گازىر مېغىزىغا شىكەر ياكى باشقا ماددىلارنى قوشۇۋىتىدۇ، بۇنىڭدا گازىرنىڭ ياغ تەركىبى تېخىمۇ يۇقىرىلاپ كېتىدۇ؛ بۇنىڭغا كۈندە يەيدىغان ئۈچ ۋاخ تامىقىمىزدىن قوبۇل قىلىدىغان ئېنىرگىيە قوشۇلسا، بەدەن ئېغىرلىقىمىز تەبىئىيلا ئېشىپ كېتىدۇ.

   لېكىن، خاسىڭ گازىرغا ئوخشىمايدۇ. خاسىڭ تەركىبىدە كۆپ خىل تويۇنمىغان ياغ كىسلاتالىرى بار بولۇپ، خاسىڭنى كۆپرەك يەپ بەرگەندە، بەدەندىكى ئېنىرگىيەنىڭ تارقىلىشى ۋە ياغلارنىڭ كۈيۈپ خورىشىنى ئىلگىرى سۈرىدۇ؛ ئۇنىڭ ئۈستىگە، خاسىڭ تەركىبىدىكى تويۇنمىغان ياغ كىسلاتالىرى، بەدەندىكى خولىستىرىننىڭ ئاجرىلىپ پارچىلىنىشىنى ۋە بەدەن سىرتىغا چىقىرۋېتىلىشىنى تىزلىتىدۇ. بۇندىن باشقا، خاسىڭ تەركىبىدە يەنە كۆپ خىل تالا ماددىلىرى بار بولۇپ، ئۈچەيدىكى ئەخلەتلەرنى تازىلاپ ئۇرۇقلاشقا پايدىلىق بولىدۇ.