بالىلار ئۈچ ياشقا كىرىشتىن بۇرۇن كىم بىلەن ئۇخلىسا شۇنىڭغا بەكرەك ئامراق كىلىدۇ ھەمدە شۇنىڭ ھەرىكەت ئادەتلىرى ۋە خارەكتىر ئالاھىدىلىكىنى تارتىدۇ؛ شۇنىڭ ئۈچۈن، بالىلارنىڭ كىم بىلەن ئۇخلىشىنىڭ ئۇلارنىڭ مىجەز-خارەكتىرىگە كۆرسىتىدىغان تەسىرى ئىنتايىن چوڭ. بالىلار ئۈچ ياشقا كىرىشتىن ئىلگىرىكى ۋاقىت، ئۇلاردا بىخەتەرلىك تۇيغۇسى يىتىلىشتىكى ھالقىلىق مەزگىل بولۇپ، ئاتا-ئانىلارنىڭ بالىسىنىڭ قەلبىدىكى ئورنىنى ھېچكىم باسالمايدۇ. بىراق ھازىر، نۇرغۇنلىغان ئاتا-ئانىلار ناھايىتى ئالدىراش بولغاچقا، بالا بېقىش ۋەزىپىسى چوڭلارنىڭ زىممىسىگە يۈكلىنىپ قالىدۇ. بىراق، بۇنداق قىلىش راستىنلا ياخشى بولامدۇ؟

كىچىكىدىن ئانىسى بىلەن بىللە ئۇخلايدىغان بالىنىڭ خارەكتىرى تېخىمۇ مۇنەۋۋەر كىلىدۇ
   مەيلى ئوغۇل بولسۇن ياكى قىز بولسۇن، ئانىسىغا كۆڭلى ئەڭ يېقىن كىلىدىغان بولۇپ، بالىلار ئەڭ ياردەمسىز قالغان ئەھۋالدا، ھەمىشە ئانىسىنى ئىزدەيدۇ. بالا بىلەن ئانا ئوتتۇرسىدا، جىسمانى ۋە روھى جەھەتتىكى تەبىئى باغلىنىش بار بولىدۇ. چۈنكى، بالىنىڭ ئانىسىغا بولغان تايىنىش تۇيغۇسى قوساقتىكى ۋاقتىدىنلا باشلىنىدىغان بولۇپ، بالا تېخى قوسىقىدىكى ۋاقتىدىلا، ئۇلار بىر تەن ھىسابلىنىدۇ؛ بالىياتقۇدىكى باش سۈيى ئىچىدە تۇرغان قاراڭغۇ مۇھىتتا، بالا ئۆزىنى شۇنداق بىخەتەر ھىس قىلىدۇ. شۇڭا، بالا تۇغۇلۇپ بالىياتقۇ مۇھىتىدىن ئايرىلغان ۋاقىتتا، ئانىسىنىڭ پەپىلىشىگە مۇھتاج بولىدىغان بولۇپ، ئانىسى بىلەن بىۋاستە تىگىشىش ئارقىلىق ئاندىن قايتىدىن بىخەتەرلىك تۇيغۇسىغا ئىرىشەلەيدۇ.
   ئانا بالىسىغا ھەمرا بولۇپ ئۇخلىغان ۋاقىتتا، ئۇخلاشتىن بۇرۇنقى ۋاقىتا ئۇلارنىڭ ھىسيات ئالماشتۇرىدىغان ئەڭ ياخشى مەزگىلى بولۇپ، گەرچە بۇ ۋاقىتتا بالا تېخى گەپ قىلىشنى بىلمىسىمۇ، ئەمما ئانىسىغا ئىنكاس قايتۇرالايدىغان بولۇپ، بالىنىڭ بۇ ۋاقىتتىكى ھەرىكەتلىرىدىن ئۇلارنىڭ قانداق خارەكتىر شەكىللەندۈرۈشكە يۈزلەنگەنلىكىنى كۆرىۋىلىشقا بولىدۇ؛ ئانىلارمۇ بالىسىنىڭ خارەكتىر ئالاھىدىلىكىنىڭ يۈزلىنىشىنىڭ ياخشى يامانلىقىغا قاراپ، ئۇنىڭغا قارىتا توغرا تەرەپكە قاراپ يىتەكلەش ئېلىپ بارسا بولىدۇ. ئۇنىڭ ئۈستىگە، بالىلار ئانىسى بىلەن ئۇخلىسا ناھايىتى كۈچلۈك بىخەتەرلىك تۇيغۇسىغا ئىرىشەلەيدۇ، ئانىسى بىلەن پاراڭلاشقاندا خۇشاللىق ھىس قىلىدۇ. كىچىكىدىن بۇنداق بىخەتەرلىك تۇيغۇسى ئىچىدە چوڭ بولغان بالىلار، كەلگۈسىدە ئۆزىگە تېخىمۇ ئىشىنىدىغان چوڭ بولىدۇ.

ئانا بالا مۇناسىۋىتى ياخشى ئەمەس بالىلارنىڭ ئىچكى دۇنياسى غېرىپلىققا تولغان ھەم سۇغۇق مىجەز كىلىدۇ
   كىچىكىدىن باشلاپ ئاتا-ئانىسى بىلەن مۇناسىۋىتى ياخشى ئەمەس چوڭ بولغان بالىلار، ئۇلارنىڭ ئىچكى دۇنياسى چوقۇم ئىنتايىن غېرىپ كىلىدۇ. چۈنكى، ئۇلار كىچىك ۋاقتىدا ئاتا-ئانىسىنىڭ كۈيۈنىشىنى ئارزۇ قىلىدۇ، ئۇلار پەقەت ئاتا-ئانىسى بىلەنلا پاراڭلىشالايدۇ. بىراق، ھازىر نۇرغۇن ئاتا-ئانىلار ئالدىراش بولغاچقا، ئارام ئېلىشقا ۋاقىت چىقىرىش ئۈچۈن، بالىسىنى كارتون فىلىم كۆرۈشكە بۇيرۇيدۇ. بۇنداق قىلىشنىڭ ئەڭ چوڭ زىيانلىق تەرىپى، بالا تېلىۋىزور كۆرۈشكە خۇمار بولۇپ قالىدۇ ھەم ئاتا-ئانىسى بىلەن بولغان مۇناسىۋىتى يېراقلاپ كىتىدۇ. بۇنىڭ ئەڭ كۆرۈنەرلىك بولغان ئالاھىدىلىكى، ھازىرقى بەزىبىر ئالى مەكتەپ ئوقۇغۇچىلىرىغا ئوخشاش، بىرەر ئىككى ئايدىمۇ ئۆيىگە بىرەر قېتىم تېلفون قىلىپ قويمايدۇ، ھەتتا ئۆيىگە قايتىش ۋاقتى كەلسە ئازراقمۇ ھاياجانلىنىپ سالمايدۇ. بۇلارنىڭ ھەممىسى، ئۇلارنى كىچىكىدىن ئانىسى يېنىدا تۇرغۇزۇپ بېقىپ چوڭ قىلمىغانلىقتىن بولىدۇ.