ھامىلدار ئاياللار بىر ئېغىزدا ئىككى جاننى باقىدىغان بولغاچقا، ئادەتتىكىگە قارىغاندا كۆپرەك يەپ ئىچىدۇ. بەزى ھامىلدار ئاياللار كىچىك تەرەت قىستاپ قالسا، قورسىقىنى كۆتۈرۈپ ھاجەتكە چىقىشنى ئاۋارىچىلىق كۆرۈپ، كۈندىلىك سۇ ئىچىش مىقدارىغا چەك قويىدۇ. بۇنداق ئەھۋالغا قارىتا، قوساقتىكى ھامىيلىنىڭ پىكىرى چىقىپ قېلىشى مۇمكىن؛ چۈنكى، سۇ ھاياتلىقنىڭ مەنبىيى بولۇپ، ھامىلدار ئاياللار سۇ تەركىبىنى كۆپرەك تولۇقلىمىسا، ھامىيلىنىڭ يىتىلىشىگە تەسىر يىتىشى مۇمكىن. تۆۋەندە، ھامىيلە "ئۇسساپ قالغاندا" كۆرىلىدىغان نەچچە تۈرلۈك سىگناللارنى كۆرۈپ باقايلى.

كالپۇكلىرىنىڭ رەڭگى ئۆزگىرىپ يېرىلىپ كىتىش
    ئادەمنىڭ كالپۇكىدىكى تىرىلەر نىسبەتەن يۇمران بولۇپ، بەدەندىكى بەزىبىر بىنورماللىقلارغا قارىتا بىرقەدەر سەزگۈر كىلىدۇ. نورمال ئەھۋال ئاستىدا، ئادەمنىڭ كالپۇكى قىزىل ھەم پارقىراق كىلىدىغان بولۇپ، بۇ سۇ تەركىبلىرىنىڭ تۇلۇق، رەڭگى رويىنىڭ ياخشى ئىكەنلىكىنىڭ ئالامەتلىرى. ئەگەر ھامىلدار ئايال ئۆزىنىڭ كالپۇكلىرىنىڭ رەڭگىنىڭ ئۆڭۈپ كەتكەنلىكىنى ۋە يېرىلىپ كەتكەنلىكىنى بايقىسا، بۇ بەلكىم بەدەندە سۇ تەركىبلىرىنىڭ ئېغىر دەرىجىدە كەملەپ كەتكەنلىكىنىڭ ئالامەتلىرى بولۇشى مۇمكىن بولۇپ، ئەگەر بۇنداق ئەھۋال داۋاملىشىۋەرسە، ئاخىرىدا قوساقتىكى ھامىيلىگە تەسىر يىتىشى مۇمكىن. بۇنداق ئەھۋالدا، ھامىلدار ئايال قايناقسۇ ئىچىش ياكى سۇ تەركىبى يۇقىرى مىۋە-چىۋىلەرنى يىيىش ئارقىلىق بەدەنگە سۇ تۇلۇقلىشى كىرەك.

بالىياتقۇدا باش سۈيى ئازلاپ كىتىش
    ھامىيلە ئانىسىنىڭ قوسىقىدا باش سۈيى ئىچىدە تۇرىدىغان بولۇپ، تەدرىجى تەرەققىيات نەزىريەسى مۇتەخەسسىسلىرىنىڭ قارىشىچە، بۇ دېڭىز-ئوكيان مۇھىتىغا تەقلىد قىلىنغانلىق بولىدىكەن؛ چۈنكى، ھاياتلىق بەلكىم دېڭىز-ئوكيانلاردىن باشلانغان بولۇشى مۇمكىن ئىكەن. باش سۈيى تەركىبىدە ئەلۋەتتە سۇمۇ بار بولۇپ، ئەگەر تەكشۈرۈش جەريانىدا باش سۈيى ئازلاپ كەتكەنلىكى بايقالسا، ئۇنداقتا ھامىلدار ئايال چوقۇم بۇنىڭغا قارىتا ئىتىبار بىلەن قارىشى كىرەك؛ چۈنكى، سىزنىڭ سۇ ئىچىشنى خالىمايدىغان ئادىتىڭىز، قورسىقىڭىزدىكى ھامىيلىنىڭ ھاياتىغا تەھدىت ئېلىپ كەلگەن بولىدۇ. بۇنداق ئەھۋال ئەگەر ۋاقتىدا ياخشىلىنىشقا ئىرىشەلمىسە، ھامىيلىدە غەلىتە شەكىللىنىپ قېلىش كۆرۈلىشى مۇمكىن.

ھاجەتكە ئاز چىقىش
   بەزى ھامىلدار ئاياللار ھاجەتكە چىقىشنى ئاۋارىچىلىق كۆرۈپ، ئۆزىنىڭ سۇ ئىچىش مىقدارىغا مەقسەتلىك ھالدا چەك قويىدۇ. بۇ، شاپتۇل تىرىمەن دەپ قولىدىكى تاۋۇزنى تاشلىۋەتكەندەكلا بىر ئىش. ھامىلدارلىق مەزگىلىدە، ھامىيلە دوۋساقنى بېسىپ، سۈيدۈك يېغىپ ساقلايدىغان ئەزا بېسىمغا ئۇچراش سەۋەبىدىن، ئاسانلا كىچىك تەرەت قىستايدىغان بولۇپ قالىدۇ، بۇ نورمال ئەھۋال. بۇنداق ئەھۋالدا، ھامىلدار ئايال كۈندۈزى سۇنى يىتەرلىك دەرىجىدە ئىچىپ، كەچتە ئۇخلاشتىن بىر سائەت بۇرۇن سۇ ئىچىشنى توختاتسا، بۇنىڭدا كىچىسى كىچىك تەرەت قىستاپ ئويغىنىپ كىتىش قېتىم سانىنى بەلگىلىك دەرىجىدە ئازايتىقىلى بولىدۇ.