كۆپ قىسىم ئاياللار، ھامىلدارلىق مەزگىلىدە كىچىك تەرىتى كۆپ كىلىشنىڭ ئاۋارىچىلىقىغا ئۇچرايدىغان بولۇپ، بەزىدە ھەتتا ئوسال ئەھۋالغا چۈشۈپ قالىدىغان ئىشلار بولىدۇ. ئۇنداقتا، ھامىلدار بولغاندىن كىيىن، كىچىك تەرەت قېتىم سانى نىمە ئۈچۈن كۆپىيىپ قالىدۇ؟ بۇنى قانداق قىلىپ ياخشىلىغىلى بولىدۇ؟

   پۈتكۈل ھامىلدارلىق مەزگىلىدە، كىچىك تەرەت قېتىم سانى كۆپىيىپ كىتىدىغان ئەھۋال، ھامىلدارلىق دەسلەپكى مەزگىلى ۋە ئاخىرىقى مەزگىلىدە كۆرىلىدىغان بولۇپ، بۇ ئىككى مەزگىلدە كىچىك تەرەتنىڭ كۆپىيىپ كىتىشىدىكى سەۋەپلەر ئۆز-ئارا ئوخشىمايدۇ.
ھامىلدارلىق دەسلەپكى مەزگىلىدە كىچىك تەرەتنىڭ كۆپىيىپ قېلىشىنىڭ سەۋەبى
    ھامىلدارلىق دەسلەپكى مەزگىلىدە، ھامىلدار ئايالنىڭ بەدىنىدىكى ھورمۇنلاردا ئۆزگىرىش كۆرىلىدىغان بولۇپ، داس بوشلۇقىغا قان تولۇپ، دوۋساقنى غىدىقلايدۇ، بۇ سەۋەپلىك كىچىك تەرەت كۆپلەپ قالىدۇ. بۇندىن باشقا، ھامىلدارلىق دەسلەپكى مەزگىلىدە، بالىياتقۇ تېخىچە داس بوشلۇقىدا بولغاچقا، ھامىيلىنىڭ ئۈزلۈكسىز تۈردە يىتىلىشىگە ئەگىشىپ، تەدرىجى ھالدا يوغىناپ بارغان بالىياتقۇ دوۋساقنى بېسىپ، دوۋساقنىڭ سۈيدۈك ساقلاش مىقدارىنىڭ ئازلىشىنى كەلتۈرۈپ چىقىرىدۇ؛ بۇنداق ئەھۋالدا، ھامىلدار ئايالنىڭ ھاجەتكە چىقىش قېتىم سانى تەبىئىيلا كۆپىيىپ كىتىدۇ. ئادەتتە، ھامىلدارلىق تۆتىنچى ئېيىدىن باشلاپ، بالىياتقۇ داس بوشلۇقىدىن ئۈستى تەرەپكە قاراپ يۆتكىلىپ قوساق بوشلۇقىغا ئۇرۇنلىشىدىغان بولغاچقا، بۇ ۋاقىتتا دوۋساققا چۈشكەن بېسىم ئازىيىپ، سۈيدۈك كۆپ كىلىش ئەھۋالى ياخشىلىنىدۇ.

ھامىلدارلىق ئاخىرىقى مەزگىلىدە كىچىك تەرەتنىڭ كۆپىيىپ قېلىشىنىڭ سەۋەبى
   ھامىلدارلىق دەسلەپكى مەزگىلىگە كەلگەندە، بىر تەرەپتىن بالىياتقۇ ئىنتايىن چوڭۇپ كەتكەنلىكتىن، دوۋساققا چۈشۈرگەن بېسىمى قايتىدىن ئېشىپ كىتىدۇ، شۇڭلاشقا كىچىك تەرەپ قېتىم سانى كۆپلەپ كىتىدىغان ئەھۋال كۆرىلىدۇ. يەنە بىر تەرەپتىن بولسا، ھامىلدارلىق 36-ھەپتىسىگە كىرگەندىن باشلاپ، ھامىيلىنىڭ باش قىسمى تۆۋەنگە قاراپ داس بوشلۇقىغا چۈشىدۇ؛ بۇ سەۋەپلىك دوۋساق ئۇچرايدىغان بېسىم تېخىمۇ ئېشىپ، كىچىك تەرەت كۆپلەپ قالىدىغان ئەھۋال تېخىمۇ ئېغىرلاپ كىتىدۇ. بەزىدە ھەتتا، ھامىلدار ئايال ھۆتەلگەن ياكى چۈشكۈرگەن ۋاقىتتىمۇ كىچىك تەرەتنى تۇتىۋالالماي تېمىپ سالىدىغان ئەھۋاللار كۆرۈلۈپ قالىدۇ.

سۇنى مۇۋاپىق ئىچىش
    بەزى ھامىلدار ئاياللار، ھاجەتكە چىقىش قېتىم سانىنى ئازايتىش ئۈچۈن سۇ ئىچىشنى ئازلىتىدىغان بولۇپ، بۇ خىل ئۇسۇل ھەرگىز تەشەببۇس قىلىنمايدۇ. ئەگەر ھامىلدار ئايالنىڭ بەدىنىدە سۇ كەمچىل بولۇپ قالسا، بەدەننىڭ مىتابولىزىمىغا تەسىر يىتىپ، ھامىلدار ئايالنىڭ ئۆزىنىڭ ۋە ھامىيلىنىڭ سالامەتلىكىگە پايدىسىز بولىدۇ. ھامىلدار ئايال سۇ ئىچىشنى ئازايتىۋەتسە بولمايدۇ، ئەمما توغرا ئۇسۇلدا سۇ ئىچىشنى ئۆگىنىۋىلىشى كىرەك. ھامىلدار ئايال، كۈندۈز كۈنلىرى سۇنى كۆپرەك ئىچىپ بەرسە بولىدۇ، ئەمما ئاز مىقداردا كۆپ قېتىم ئىچىش پىرىنسىپىغا ئەمەل قىلىش ھەمدە ئۇسسىغان ۋاقىتتا ئاندىن سۇ ئىچىمەن دىمەسلىك كىرەك. كەچلىكى بولسا، سۇ تۇلۇقلاشنى ئازايتساق بولىدۇ؛ بولۇپمۇ ئۇخلاشنىڭ ئىككى سائەت ئىچىدە سۇ ئىچمەسلىك تەۋسىيە قىلىنىدۇ.

ۋاقتىدا كىچىك تەرەت قىلىش
    بەزى ھامىلدار ئاياللار، ھامىلدارلىق مەزگىلىدىمۇ خىزمەتكە بارىدۇ ياكى توختىماي ھاجەتخانىغا يۈگرەشنى خالىمايدۇ؛ شۇڭا ئادەتتە كىچىك تەرىتى قىستىسا، ئۇلار سۈيدۈكنى يېغىپ، پەقەت چىداپ بولالمىغان ۋاقىتتا ئاندىن ھاجەتكە چىقىدۇ. بۇنداق ئۇسۇلنىمۇ قوللىنىشقا بولمايدىغان بولۇپ، ئەگەر سۈيدۈك يېغىش ۋاقتى بەك ئۇزۇن بولۇپ كەتسە، دوۋساقنىڭ ئىقتىدارىغا تەسىر يىتىدۇ ئېغىرراق بولغاندا، سۈيدۈك يولى ياللۇغى، ھەتتا بۆرەك ياللۇغىنى كەلتۈرۈپ چىقىرىدۇ. شۇڭا، ئادەتتە كىچىك تەرەت قىلىش تۇيغۇسى پەيدا بولغان ھامانلا، ئىرىنىمەي ھاجەتكە چىقىشى كىرەك.