ھەممىمىزنىڭ كۆڭلىگە ئايان، شىنجاڭدىكى توخۇلارنىڭ بىرەرسىمۇ شىنجاڭدىن ھايات چىقىپ كىتەلمەيدۇ. داپەنجى، لازىجى، جىياۋماجى، كاۋجى...
   توخۇ گۆشىنىڭ تەييارلاش ئۇسۇلى ئىنتايىن كۆپ، ئەمما ھەممىسىنى ئاساسەن تېتىپ چىققانمىز. شۇڭا بۈگۈن كۆپچىلىكنىڭ دىققىتىگە، توخۇ گۆشىنى يېڭىچە بىر تەملەشتۈرۈش ئۇسۇلىنى تونۇشتۇرۇپ ئۆتىمىز.

   كىتەرلىك ماتېرىيال: بىر تال توخۇ، زەنجىۋىل، غولپىياز
   تەم خۇرۇچلىرى: تېتىتقۇ ھارىقى، تۇز، شېڭچوۋ جىياڭيۇسى، كۈنجۈت مېيى، ئاق شېكەر

تەييارلاش ئۇسۇلى
 

توخۇ گۆشىنى قازاندىكى سۇغا سېلىپ، بىر قوشۇق تۇز ۋە مۇۋاپىق مىقداردا زەنجىۋىل، غولپىياز مايسىسى، تېتىتقۇ ھارىقى قاتارلىقلارنى قوشۇپ قاينىتىمىز.

چوڭ ئوتتا قايناتقاندىن كېيىن، لەيلەپ چىققان موزىلىرىنى سۈزۈۋىتىپ، ئوتتۇرا دەرىجىلىك ئوتتا 20 مىنۇت دۈملەپ پىشۇرىمىز.

ئەگەر چاينىسا ئېغىزغا ئۇرۇنغىدەك ئېلاستىكىلىق توخۇ گۆشى يەيمەن دېسەك، قاينىتىپ پىشۇرغان توخۇنى سۈزۈۋالغاندىن كېيىن، سوغۇق سۇغا چىلاپ سۇۋۇتىمىز.

توخۇ گۆشىنى چاناپ پارچىلايمىز.

غولپىياز مېيى تەييارلايمىز. قازانغا كۆپرەك ماي قۇيۇپ، توغرالغان غولپىياز مايسىسىنى سېلىپ، كۈيۈپ قارىدىغۇچە داغلايمىز.

قازاندىكى مايغا بىر قوشۇق زەنجىۋىل چانالمىسى، ئۈچ قوشۇق شىڭچوۋ جىياڭيۇسى، بىر قوشۇق ئاق شېكەر، بىر قوشۇق كۈنجۈت مېيى، يېرىم قۇشۇق تۇز، يېرىم پىيالە توخۇ گۆشى شورپىسى قۇشۇپ قىيام تەييارلايمىز.

چاناپ پارچىلىغان توخۇ گۆشىنى تەخسىگە ئېلىپ، ئۈستىگە تەييارلىغان قىيامنى قۇيساق، بۈگۈنكى غولپىياز مېيىدا تەملەشتۈرۈلگەن توخۇ گۆشى تەييار بولغان بولىدۇ.