چاچ يۇيۇش، ئاددى ھەم ئادەتتىكىچە بىر ئىش، لېكىن ئادەمنىڭ ساغلاملىقى بىلەن زىچ مۇناسىۋەتلىك! بەزىبىر ياشلار، ئەتىگىنى ئورنىدىن تۇرۇپلا چاچ يۇيۇشنى ياخشى كۆرىدۇ، چۈنكى ئۇلارغا نىسبەتەن، سىرتقى ئوبرازى ھەممىدىن مۇھىم. لېكىن سىز بىلەمسىز، چاچنى ئەتىگىنى يۇيۇش بىلەن كەچتە يۇيۇشنىڭ قايسىسى بەدەنگە بەكرەك زىيانلىق؟

ئەتىگىنى چاچ يۇيۇشنىڭ زىيانلىق تەرىپى
   سەھەردە ئەمدى ئورنىمىزدىن تۇرغان ۋاقىتتا، قان ئايلىنىش تېخى نورمال ھالەتكە قايتىپ كېلىپ بولالمىغان بولۇپ، قان ئايلىنىش نىسبەتەن ئاستا بولىدۇ؛ بۇ ۋاقىتتا چاچنى يۇغاندا، باش تېرىسى نىسبەتەن سەزگۈر بولغانلىق سەۋەبىدىن، سۇنىڭ غىدىقلىشى نەتىجىسىدە، بەدەندىكى قان ئايلىنىش بىراقلا تېزلىشىپ كېتىدۇ. بولۇپمۇ سوغۇق قىش كۈنلىرىدە، ئۆي ئىچى بىلەن ئۆي سىرتىنىڭ تىمپىراتۇرىسى نىسبەتەن چوڭ بولغاچقا، ئەگەر چاچ تولۇق قۇرۇپ بولالماي تۇرۇپ سىرتقا چىقساق، ئاسانلا سوغۇققا توڭۇپ زۇكام بولۇپ قالىمىز. شۇڭا ئەڭ ياخشىسى، ئەتىگىنى ئورنىمىزدىن تۇرۇپلا چاچ يۇيۇشتىن ساقلانماق لازىم.

ئاخشىمى چاچ يۇيۇشنىڭ پايدىسىز تەرىپى
   كەچ سائەت ئوندىن سەھەر سائەت ئىككىگىچە بولغان ئارىلىق، باش تېرىمىزنىڭ ھۈجەيرىلىرىنىڭ قايتا تۇغۇلۇش مەزگىلى ۋە پائالىيەتچان مەزگىلى؛ بۇنىڭ بىلەن بىرگە، بۇ مەزگىل يەنە، بەدەن ئورگانىزىمى ئۆزىنى ياخشىلاپ ئوڭشايدىغان مۇھىم مەزگىلدۇر. بىز ئەگەر بۇ ۋاقىت بۆلىكىنىڭ ئالدىدا بېشىمىزنى يۇساق، باش تېرىسى ھۈجەيرىلىرىنىڭ قايتا تۇغۇلۇشىنى ئىلگىرى سۈرۈشكە بولىدۇ. شۇنىڭ ئۈچۈن، ئادەتتە چۈشتىن كېيىن سائەت بىردىن كەچ سائەت ئونغىچە بولغان ئارىلىقتا بېشىمىزنى يۇساق بىر قەدەر ياخشى بولىدۇ. لېكىن دىققەت قىلىشقا تېگىشلىك بولغىنى، كەچتە بېشىمىزنى يۇغان ۋاقىتتا، چېچىمىزنىڭ ئۇخلاشتىن بۇرۇن قۇرۇپ بولۇشىغا يىتەرلىك ۋاقىت قالدۇرۇشقا دىققەت قىلىش لازىم.

چاچ يۇغاندا دىققەت قىلىشقا تېگىشلىك ئىشلار
   1. باشنى يۇغاندا تىرناق بىلەن تاتىلىماسلىق كېرەك؛ تىرناقتا نۇرغۇنلىغان باكتىرىيەلەر بار، ئەگەر باش تېرىسى تىتىلىپ كەتسە، ئاسانلا ياللۇغ پەيدا قىلىدۇ.
   2. بىر تەرەپتىن باش يۇيۇپ بىر تەرەپتىن چاچ تاراشتىن ساقلىنىش لازىم.
   3. چاچنى يۇيۇپ بولۇپلا سىرتقا چىقىشتىن ساقلىنىش كېرەك. تەتقىقاتلاردا بايقىلىشىچە، چاچ ئۇچرايدىغان ئۇلتىرا بىنەپشە نۇر، يۈز قىسىمنىڭ ئىككى ھەسسىسىگە توغرا كېلىدىغان بولۇپ، چاچنى يۇيۇپلا سىرتقا چىقساق، بىنەپشە نۇرنىڭ تەسىرىدە، چاچ ئاسانلا زىيانغا ئۇچراپ كېتىدۇ. شۇڭلاشقا، ئەگەر سىرتقا چىقماقچى بولسىڭىز، ئەڭ ياخشىسى كۈنلۈك تۇتۇۋىلىشىڭىز ياكى قالپاق كىيىۋىلىشىڭىز لازىم.