بۈگۈن كۆپچىلىكنىڭ دىققىتىگە، تەييارلاش ئاسان ئەمما ئۇزۇقلۇق قىممىتى يۇقىرى بولغان، تۇخۇم كۆك پۇرچاق قورىمىسى تەييارلاش ئۇسۇلىنى تونۇشتۇرۇپ ئۆتىمىز. بۇ قورۇما، ئۈچەي يوللىرىدىكى يېمەكلىكلەرنى ھەزىم قىلىپ سۈمۈرۈشكە پايدىلىق بولۇپ، قەۋزىيەتنىڭ ئالدىنى ئېلىشقا پايدىلىق. بۇندىن باشقا، بۇ قورۇمىنى دائىم ئىستىمال قىلغاندا، جىگەر تازىلىغان زەھەرلەرنىڭ بەدەن سىرتىغا چىقىرىۋىتىلىشىنى ئىلگىرى سۈرۈپ، جىگەرنى تېخىمۇ ساغلام قىلىدۇ.

   كىتەرلىك ماتېرىيال: كۆك پۇرچاق(豆角)، تۇخۇم، تۇز، شىڭچۇۋ جىياڭيۇسى
تەييارلاش ئۇسۇلى
   ئالدى بىلەن، كۆك پۇرچاقنى يۇيۇپ پاكىزلىغاندىن كېيىن، كىچىك بۆلەك ھالىتىدە توغرىۋالىمىز؛ تۇخۇمنى قاچىدىن بىرنىڭغا چېقىپ قوچۇپ تەييارلايمىز.
   كەينىدىن، قازاننى ئېسىپ مۇۋاپىق مىقداردا ئۆسۈملۈك مېيى قۇيۇپ قىزىتىمىز؛ قوچۇپ تەييارلىغان تۇخۇمنى سېلىپ قاتۇرۇپ، قاچىدىن بىرنىڭغا ئېلىپ قويۇپ تۇرىمىز؛ قازانغا يەنە ئازراق ماي قۇيۇپ قىزىتقاندىن كېيىن، توغرالغان كۆك پۇرچاقنى سېلىپ قورۇيمىز؛ كۆك پۇرچاق قورۇلۇپ يۇمشىغاندا، قاتۇرۇپ ئېلىپ قويغان تۇخۇمنى سېلىپ، تۇز ۋە جىياڭيۇ قوشۇپ تەم تەڭشىگەندىن كېيىن ئۇسسۇپ ئالساق بولىدۇ.

ئىستېمال قىممىتى
   كۆك پۇرچاق ھەممە ئېتىراپ قىلىدىغان ساغلام كۆكتات بولۇپ، تۇخۇم بىلەن ئىنتايىن ماسلىشىدۇ. كۆك پۇرچاق تەركىبىدە ۋىتامىن، كالتسىي، تۆمۈر قاتارلىق ئۇزۇقلۇق ماددىلار مول، شۇڭا قاننى قۇۋۋەتلەپ، ئۆت ۋە جىگەرنى ياخشىلاش رولىنى ئوينايدۇ. بۇندىن باشقا، كۆك پۇرچاقنىڭ تالا ماددىسى تەركىبىمۇ يۇقىرى بولۇپ، ئۈنۈملۈك ھالدا چوڭ تەرەتنى ھەيدەپ قەۋزىيەتنىڭ ئالدىنى ئالىدۇ.