گۈرۈچ، تۇرمۇشىمىزدا كەم بولسا بولمايدىغان ئاساسلىق يېمەكلىك بولۇپ، ئۇنىڭ مۇھىملىق دەرىجىسىنى سۆزلەپ ئولتۇرۇش بىھاجەت.
   ئادەتتە، تۇرمۇشىمىزدا ئىشلىتىلىدىغان گۈرۈچ، دانىچىسى چوڭ ئۇزۇنچاق كەلگەن سوقىچاق گۈرۈچ ۋە دانىسى كىچىك كەلگەن يۇمىلاق گۈرۈچ ئىككى خىلغا ئايرىلىدۇ.

   يۇمىلاق گۈرۈچ، ئۇزۇقلۇقى بىلەن كەڭلىك نىسبىتى ئىككىدىن كىچىك بولغان گۈرۈچنى كۆرسىتىدۇ؛ بۇ خىل گۈرۈچنىڭ سىرتقى شەكلى، قىسقا ئەمما "تولغان" بولۇپ، قىسقىراق ئىللىپىس شەكىلى ياكى تۇخۇم شەكىلىدە بولىدۇ.

   سوقىچاق گۈرۈچنىڭ ئۇزۇنلۇقى بىلەن كەڭلىك نىسبىتى ئىككىدىن چوڭ بولۇپ، سىرتقى شەكلى ئۇزۇنچاق ئىللىپىس شەكىلىدە ياكى ئىنچىكە ئۇزۇن شەكىلدە كىلىدۇ.

   يۇقارقىسى، ئىككى خىل گۈرۈچنىڭ ئۆسۈملۈك ئىلمى جەھەتتىكى پەرقى بولۇپ، بەزىلەر سوقىچاق گۈرۈچنىڭ سىرتقى شەكلى يۇمىلاق گۈرۈچكە قارىغاندا چىرايلىق، شۇڭلاشقا باھاسىمۇ قىممەت دىيىشىدۇ. ئەمەلىيەتتە، ھەر ئىككى خىل گۈرۈچنىڭ ئۆزگىچە ئالاھىدىلىكى بار بولۇپ، ئوخشىمىغان كىشىلەرنىڭ ياقتۇرىدىغىنىمۇ ئوخشىمايدۇ؛ شۇڭا، بۇلار باھانى بەلگىلەيدىغان ئاساسلىق ئامىل ئەمەس.

ئۇزۇقلۇق تەركىبى جەھەتتىكى پەرقى
   گۈرۈچ تەركىبىدىكى ئاساسلىق ئۇزۇقلۇق ماددىلار كۆپ پەرقلىنىپ كەتمەيدىغان بولۇپ، ئاقسىل، ياغ، يېمەكلىك تالا ماددىسى، ۋىيتامىنB1، ماگنىي، تۆمۈر، سىنىك قاتارلىقلارنىڭ پەرقى چوڭ ئەمەس.
   ئىككى خىل گۈرۈچنىڭ ئۇزۇقلۇق تەركىبى جەھەتتىكى ئاساسلىق پەرق، يۇمىلاق گۈرۈچ تەركىبىدىكى ۋىيتامىنB2، ۋىيتامىنE، كالتسىي قاتارلىقلارنىڭ مىقدارى سوقىچاق گۈرۈچكە قارىغاندا كۆپ؛ ئۇزۇن گۈرۈچنىڭ بولسا، نىكوتىنىك كىسلاتا ۋە سېلىن تەركىبى، يۇمىلاق گۈرۈچكە قارىغاندا يۇقىرى.

تەم ۋە ئىشلىتىلىش جەھەتتە
   يۇمىلاق گۈرۈچنىڭ چاپلىشىش دەرىجىسى نىسبەتەن ياخشى بولۇپ، پىشۇرغاندىن كىيىن، چاپلىشىپ ئۇلىشىپ كىلىشى مۇۋاپىق بولىدۇ؛ شۇڭلاشقا، يۇمىلاق گۈرۈچ، شورۋىگۈرۈچ قاينىتىشقا ۋە مىفەن پىشۇرۇشقا ماس كېلىدۇ.
   سوقىچاق گۈرۈچنىڭ چاپلىشىش دەرىجىسى نىسبەتەن ناچار بولۇپ، پىشۇرغاندىن كىيىن گۈرۈچ دانىچىلىرى چېچىلىپ تۇرىدۇ؛ شۇڭلاشقا، سوقىچاق گۈرۈچتە پولو ياكى قورۇما تاماق تەييارلىساق، كۆرۈنۈشى چىرايلىق، تەمى ياخشى بولىدۇ.

   يۇقىرىدا ئىككى خىل گۈرۈچنىڭ پەرقىنى سۆزلەپ ئۆتتۇق. قايسىسىنىڭ ئۇزۇقلۇق قىممىتى ياخشى دېگەن مەسىلىگە كەلسەك، ئاددىيلا ئېيتقاندا، ئىككى خىل گۈرۈچنىڭ ئۇزۇقلۇق تەركىبىدە كۆپ پەرق يوق بولۇپ، ئاساسلىق پەرقى پىشۇرۇش ئۇسۇلىدا بولىدۇ.