ياشنىڭ ئۆزلۈكسىز ئېشىشىغا ئەگىشىپ، ھەربىر ئادەم قېرىشتىن ئىبارەت مەسىلىگە دۇچار بولىدۇ. گەرچە بەزىبىر قىممەت يۈز مەلھەملىرى ۋە دورىلىرى، ئىشلەتكەندىن كىين تىرىنى ياشلىقىنى ساقلاش ئۈنۈمى كۆرسەتسىمۇ، ئەمما سىز يەنە يىمەكلىكلەر ئارقىلىقمۇ بەدەننىڭ قېرىپ كىتىشىنى ئاستىلىتىش ۋە تىرىنى ياشارتىش ئۈنۈمىگە ئىرىشەلەيسىز.
   ئادەتتە، ئوكسىدلىنىشقا قارشى تۇرۇش ماددىلىرى، ۋىيتامىنC، D، E، K قاتارلىق ماددىلار، خولىن ۋە فولىن كىسلاتا قاتارلىق تەركىبلىرى بار يىمەكلىكلەر، ھۈجەيرە قاتلىمىدىن سىزنىڭ بەدەن ئورگانىزىمىزنىڭ ياش ھالىتىنى ساقلىيالايدۇ. بۇ خىل يىمەكلىكلەر يەنە راك كىسەللىكىگە گىرىپتار  بولۇش خەۋپىنى تۆۋەنلىتىدىغان بولۇپ، بۇنىڭ بىلەن بىرگە يەنە يۈرەك قان تۇمۇر كىسەللىكلىرىنىڭ ئالدىنى ئالىدۇ. ئۇنداقتا بۇ خىل يىمەكلىكلەردىن قايسىلار بار؟

قارا شاكىلات
   تەتقىقاتلاردا ئىسپاتلىنىشىچە، كاكائو تالقىنى(可可粉) تەركىبىدە بەزىبىر ئوكسىدلىنىشقا قارشى تۇرغۇچى ماددىلار بار بولۇپ، تىرىنى ئۇزۇقلاندۇرۇپ قۇۋۋەتلەشكە پايدىلىق ئىكەن. ئەگەر سىز ھەركۈنى ئازراقتىن قارا شاكىلات يەپ بەرسىڭىز، ئۇنداقتا بەلگىلىك مەزگىل ئۆتكەندىن كىيىن، تىرىڭىزنىڭ ئىلگىركىدەك ئۇنداق يىرىك ئەمەسلىكىنى بايقايسىز ھەمدە تىرىڭىزنىڭ ئاپتاپتا كۈيۈشكە قارشى تۇرۇش ۋاقتى تېخىمۇ ئۇزىرايدۇ.
    كاكائو تالقىنى ئىستىمال قىلىشنىڭ يەنە بىر ياخشى تەرىپى، ئۇ قان ئايلىنىش سېستىمىسىنى ياخشىلاپ، بۇ ئارقىلىق تىرىگە تېخىمۇ كۆپ مۇھىم ئۇزۇقلۇقلارنى تەمىنلەپ بىرىدۇ.
   ئەمما، قارا شاكىلات ئىستىمال قىلغاندا، ئەڭ ياخشىسى تەركىبىدىكى كاكائو مىقدارى %70دىن يۇقىرى بولغانلىرىنى ئىستىمال قىلىش كىرەك. قارا شاكىلاتنىڭ قەنت مىقدارى نىسبەتەن تۆۋەن بولۇپ، بۇ سىزنىڭ ساغلاملىقىڭىز ئۈچۈن پايدىلىق بولىدۇ. چۈنكى، ئەگەر بەدەنگە قوبۇل قىلغان قەنت مىقدارى بەك كۆپ بولۇپ كەتسە، بەدەندىكى كوللاگىنلىق ئاقسىلنى پارچىلىۋىتىدۇ.

شوخلا
   شوخلىنىڭ تەمى ياخشى، پايدىلىق ئۈنۈملىرى كۆپ. سىز شوخلا ئىستىمال قىلغاندا، كۆپ مىقداردىكى ۋىيتامىنCغا ئىگە بولىسىز؛ ۋىيتامىنC بولسا، كوللاگىنلىق ئاقسىلنىڭ ئۆسۈپ كۆپىيىشىنى ئىلگىرى سۈرۈپ، قورۇقچە چۈشۈش ۋە قېرىپ كىتىشكە قارشى تۇرۇش ئۈنۈمى كۆرسىتىدۇ.
   بىراق تېخىمۇ مۇھىم بولغىنى، شوخلا تەركىبىدە كاروتىن، كىسانتوفىل، لىكوپىن قاتارلىق كاروتىن تىپىدىكى يۇقىرى ئۈنۈملۈك ئوكسىدلىنىشقا قارشى تۇرغۇچى ماددىلار، تىرىنى قۇياش نۇرىنىڭ زىينىغا ئۇچراشتىن ساقلايدۇ. بۇ يەردە ئەسكەرتىپ ئۆتۈشكە تىگىشلىكى شۇكى، ئەگەر يىمەكلىك تەركىبىدىكى كاروتىن تۈرىدىكى ماددىلارنى بەدەنگە تۇلۇق سۈمۈرۈلسۇن دىسەك، ئۇنداقتا مەلۇم خىل ياغلار بىلەن بىرلىكتە ئىستىمال قىلىش كىرەك.

ياڭاق
   ياڭاق تەركىبىدە زور مىقداردا تويۇنمىغان ياغ كىسلاتالىرى بار، بولۇپمۇ Omega-6 ۋە Omega-3 تويۇنمىغان ياغ كىسلاتا تەركىبى ئىنتايىن يۇقىرى. بۇندىن باشقا يەنە، ئوكسىدلىنىشقا قارشى تۇرغۇچى ماددىلاردىن ۋىيتامىنE، ۋىيتامىنC ۋە سېلىن قاتارلىقلار بار. ياڭاق، ياغلارنىڭ بەدەنگە سۈمۈرلۈشىنى ئىلگىرى سۈرۈپ، تىرىنىڭ قۇرغاق بولۇپ قېلىشىنىڭ ئالدىنى ئالىدۇ ھەمدە چىراي گۈزەل لەشتۈرۈش رولىنى ئوينايدۇ.