بالىلىرىغا بېلىق مېيى بېرىدىغان ئاتا-ئانىلار ئۈمىدسىزلىنىپ قالىدىغان بولدى، چۈنكى ئەنگلىيەنىڭ بىر تۈرلۈك يېڭى تەتقىقاتىدا بايقىلىشىچە، كۈندە ئومېگا 3 ياغ كىسلاتاسىنى يېيىشنى داۋاملاشتۇرسىمۇ، بالىلارنىڭ ئەستە تۇتۇش قابىلىيىتى ۋە ئوقۇش ئىقتىدارىنى يۇقىرى كۆتۈرمەيدىكەن.

    ئەنگلىيە ئوكسفورد داشۆسىنىڭ تەتقىقاتچىلىرى يەتتە ياشتىن توققۇز ياشقىچە بولغان 376 بالا ئۈستىدە تەجرىبە ئېلىپ بارغان. بۇ بالىلار ئايرىم-ئايرىم 84 باشلانغۇچ مەكتەپتىن كەلگەن بولۇپ، ئوقۇش ئىمتىھانى نەتىجىسى جەھەتتە ھەممىسى دېگۈدەك مەكتەپ بويىچە ئەڭ ناچار بولغان تۆتتىن بىر قىسىم ئوقۇغۇچى ئىچىدە ئىكەن. تەتقىقاتچىلار سىناققا قاتناشقان يېرىم بالىغا ئومىگا 3 ياغ كىسلاتاسىنى بەرگەن، يەنە بىر قىسىم بالىغا ئارام بەرگۈچى دورا بەرگەن.  

    16 ھەپتىدىن كېيىن، ئۇلار بۇ بالىلارنىڭ ئۆگىنىش ئەھۋالىغا سىناق ئېلىپ بارغان، ئەمما ئۇلار ئومىگا 3 ياغ كىسلاتاسى يېگەن بالىلارنىڭ ئەستە تۇتۇش قابىلىيىتى ۋە ئوقۇش ئىقتىدارىنىڭ ئۇنى يېمىگەن بالىلاردىن كۈچلۈك بولمىغانلىقىنى بايقىغان.

    بۇنىڭدىن ئىلگىرىكى تەتقىقاتلاردا ئومىگا 3 ياغ كىسلاتاسى نېرۋا توقۇلمىلىرىنىڭ يېتىلىشىنى ئىلگىرى سۈرىدۇ، ئۇيقۇنى ياخشىلايدۇ، دېيىلگەن. يېڭى تەتقىقات نەتىجىسى بۇ ھۆكۈمنى ئاغدۇرۇپ تاشلىدى. بۇنىڭغا قارىتا بەزى مۇتەخەسسىسلەر بېلىق مېيىنىڭ ئۈنۈمى ئادەملەرگە قاراپ ئوخشاش بولماسلىقى مۇمكىن، شۇڭا بۇنى ئىچكىرىلەپ تەتقىق قىلىشقا توغرا كېلىدۇ، دەپ قارىغان. مەزكۇر تەتقىقاتقا قاتناشقان ئەنگلىيە بىرمىڭخام داشۆسىنىڭ پىروفېسسورى مونتگومېرى مۇنداق دېدى: «ئاتا-ئانىلار بالىلىرىنىڭ ئۆگىنىش نەتىجىسىنى يۇقىرى كۆتۈرۈشنى ئويلىسا، پۇلنى دەل جايىغا سەرپ قىلىشى كېرەك، مېنىڭ تەكلىپىم، كۆپرەك پۇلنى بالىنى يېتەكلەشكە خەجلەش بېلىق مېيى سېتىۋالغاندىن ياخشى».