بالىلارغا ۋاقىتتىن ئۈنۈملۈك پايدىلىنىشنى ئۆگىتىش، تولىمۇ زۆرۈردۇر. نۇرغۇنلىغان ئاتا-ئانىلار، بالىسىنى "تېزراق بولۇشقا" سۈيلەشكە ئادەتلەنگەن، لېكىن ئۇلار بالىسىنى تېزراق ئۆسۈپ-يېتىلىشكە ئالدىراتقانسېرى، بالىسىنىڭ "ئەقىلگە كىرىشى" تېخىمۇ ئاستىلاپ كېتىدۇ، بۇ نېمە ئۈچۈن؟ چۈنكى، بالىلار ۋاقىتنى چوڭلارنىڭ، مەن بىلەن ئالاقىسى يوق دەپ ئويلاپ قالغان. ئاتا-ئانا بولۇش سۈپىتىمىز بىلەن، بىزنىڭ بالىلارغا ۋاقىتقا رىئايە قىلماسلىق ۋە ۋاقىتنى ئىسراپ قىلىشنىڭ ئاقىۋىتىنى چۈشەندۈرۈپ قويۇش مەسئۇلىيىتىمىز بار.

   ئۇنداقتا، بالىلارنىڭ ۋاقىت باشقۇرۇش ئادىتىنى قانداق يېتىلدۈرۈش كېرەك؟
ئىش قىلىش ۋاقتىنى بەلگىلەش
   بالىلارنىڭ تاپشۇرۇق ئىشلىشىگە قارىتا، ئۇلارغا چوقۇم ۋاقىت بەلگىلەپ بىرىپ، ئۇلارنىڭ بەلگىلەنگەن ۋاقىت ئىچىدە ئورۇنلاپ بولۇشىغا تۈرتكە بولىشىمىز لازىم. بۇنىڭدا، ئۇلار بەلگىلەنگەن ۋاقىت ئىچىدە دىققىتىنى مەركەزلەشتۈرۈش بىلەن بىرگە، ۋاقىتنى قەدىرلەشنى ئۆگىنىپ، بەلگىلەنگەن ۋاقىت يىتىپ كەلسىلا ئۆزلىكىدىن تاپشۇرۇق ئىشلەيدىغان بولىدۇ. ئەگەر ئۇ، ئۆزىنىڭ يوقىلاڭ باھانە-سەۋەبلىرى تۈپەيلى بەلگىلەنگەن ۋاقىت ئىچىدە تاپشۇرۇقنى ئورۇنلاپ بولالمىسا، ئۇنداقتا ئۇنىڭغا تاپشۇرۇقنى ۋاقتىدا ئىشلەپ بولالمىغانلىقنىڭ ئاقىۋىتىنى تونۇتۇش ياكى مەكتەپ ئۇسۇلى بويىچە ئۇنىڭغا جازا بىرىش لازىم.

ۋاقىتنى پىلانلاشنى ئۆگىتىش
   بالىلارغا بىر كۈنلۈك ۋاقتىنى ئورۇنلاشتۇرۇشنى ئۆگىتىش لازىم. ئەلۋەتتە، بىر كۈن ۋاقىت بالىلارغا نىسبەتەن بەك ئۇزۇن ھېسابلىنىشى مۇمكىن، بۇنىڭدا ئاۋۋال بىر سائەتتىن باشلىساق بولىدۇ؛ بالىغا ئاۋۋل بىر سائەت ۋاقىت بىرىپ، ئۇنىڭ قانداق ئورۇنلاشتۇرىدىغانلىقىنى كۆرۈپ باققاندىن كېيىن، ئۇنىڭغا بۇ بىر سائەتتىن ئۈنۈملۈك پايدىلىنىش ھەققىدە كۆرسەتمە بەرسەك ياكى ئۆگىتىپ قويساق بولىدۇ.

ۋاقىتنى قەدىرلەش
   بالىلارغا ۋاقىت ھەققىدە ئېيتىلغان بەزىبىر ھېكمەتلىك سۆزلەرنى ئۆگىتىپ، ھەر كۈنى قايتا-قايتا تەكرارلىغىلى سالساق، ئۇلاردا ۋاقىتنىڭ قىممەتلىكى توغرۇلۇق بىر خىل ئىدىيە شەكىللىنىدۇ. ئىككىنچىدىن، بەلگىلەنگەن ۋاقىت بويىچە ئىش كۆرمىگەندە، جازاغا ئۇچرايدىغانلىقى ياكى مەسئۇلىيەتنى زىممىسىگە ئېلىشى لازىم بولىدىغانلىقىنى چۈشەندۈرۈش كېرەك. بۇ ئۇسۇلنى بەلگىلىك ۋاقىت داۋاملاشتۇرغاندىن كېيىن، بالىلاردا مەيلى تۇرمۇش جەھەتتە بولسۇن ياكى ئۆگىنىش جەھەتتە بولسۇن، زور ئۆزگىرىش يۈز بەرگەنلىكىنى بايقىيالايمىز.