ئاتا-ئانا بولۇش ئالدىدا تۇرغانلار، ھامىلدارلىق مەزگىلىدە ھەمىشە كەلگۈسىدە تۇغۇلىدىغان بالىسى ئۈستىدە نۇرغۇن خىياللارنى قىلىپ، بالام تۇغۇلسا كىمگە ئوخشايدىغاندۇ، ئاق تۇغۇلارمۇ قارىمۇ، ئېگىز ئادەم بولارمۇ پاكارمۇ دەپ ئويلاپ كېتىدۇ. بۇلارنى بىلمەكچى بولسىڭىز، تۆۋەندىكى ئىرسىيەت ئىلمى جەھەتتىكى بىلىملەرنى كۆرۈپ بېقىڭ!

ئەقلى ئىقتىدارى
   ئەقلى ئىقتىدارنىڭ بەلگىلىك دەرىجىدە ئىرسىيەت خاراكتېرى بار بولۇپ، بىرلا ۋاقىتتا يەنە مۇھىت، ئۇزۇقلۇق، مائارىپ قاتارلىق كىيىنكى مەزگىللىك ئامىللارنىڭ تەسىرىگە ئۇچرايدۇ. ئالىملارنىڭ مۆلچەرلىشىگە قارىغاندا، ئىرسىيەتنىڭ ئەقلى ئىقتىدارغا كۆرسىتىدىغان تەسىرى، تەخمىنەن %60-%50نى ئىگىلەيدىكەن؛ ئىرسىيەت جەھەتتىن ئېلىپ ئېيتقاندا، ئانىسى ئەقىللىك بولسا، تۇغۇلغان بالا كۆپىنچە ئەقىللىك تۇغۇلىدۇ، ئەگەر ئوغۇل بالا بولسا، تېخىمۇ ئەقىللىك بولىدۇ.
   بۇنىڭدىكى سەۋەب، ئىنسانلارنىڭ ئەقلى ئىقتىدارى بىلەن مۇناسىۋەتلىك بولغان گېن، ئاساسلىقى Xخروموسومغا مەركەزلەشكەن. ئاياللاردا Xخروموسومدىن ئىككىسى بار، ئەرلەردە بولسا پەقەت بىرىلا بار؛ شۇڭا ئانىنىڭ ئەقلى ئىقتىدارى، ئىرسىيەتتە تېخىمۇ مۇھىم ئورۇندا تۇرىدۇ.
تىرە رەڭگى
   ئەگەر دادا بىلەن ئانا ھەر ئىككەيلەننىڭ تىرە رەڭگى ئاق بولسا، ئۇنداقتا كۆپ سۆزلەش كەتمەيدۇ، چوقۇم تىرىسى ئاق بالا تۇغۇلىدۇ. ئەگەر پەقەت ئانىسىنىڭ ياكى دادىسىنىڭ بىر تەرەپنىڭلا تىرىسى ئاق بولسا، ئۇنداقتا بالىنىڭ تىرىسى ئانا بىلەن دادا تىرە رەڭگىنىڭ ئارىلىقىدىكى رەڭدە تۇغۇلىدۇ. ئەگەر ئانا بىلەن دادا ھەر ئىككىسىنىڭ تىرىسى قارامتۇل بولسا، ئۇنداقتا بالىمۇ ساغلاملىقنى بىلدۈرىدىغان بوغداي ئۆڭ تۇغۇلىدۇ.
قاپىقى
   ئادەتتە، ئەگەر دادىسى ياكى ئانىسى ئىككەيلەننىڭ بىرى قوش قاپاق بولسا، ئۇنداقتا بالىنىڭ قوش قاپاق تۇغۇلۇش ئېھتىماللىقى ئىنتايىن يۇقىرى بولىدۇ. ئەگەر دادا بىلەن ئانا ھەر ئىككىسى يالاڭ قاپاق بولسا، ئۇنداقتا شۈبھىسىزكى، بالىمۇ يالاڭ قاپاق تۇغۇلىدۇ.
كۆزلىرى
   كۆزلىرى چوڭ بولۇشنىڭ ئىرسىيەت ئامىلى تېخىمۇ كۈچلۈك بولۇپ، دادا ياكى ئانا ئىككى تەرەپنىڭ بىرسىنىڭ كۆزى چوڭ يەنە بىرسىنىڭ كۆزى كىچىك بولغان تەقدىردىمۇ، بالىنىڭ كۆزلىرى چوڭ تۇغۇلۇش ئېھتىماللىقى يەنىلا بىر قەدەر يۇقىرى بولىدۇ.

قاڭشىرى
   بۇرنى چوڭ ھەم ئېگىز، بۇرۇن تۆشۈكچىسى كەڭرى بولغان ئالاھىدىلىكنىڭ ئىرسىيەت ئامىلى بىر قەدەر كۆرۈنەرلىك. دادا ياكى ئانىنىڭ ئىچىدە بىرسىنىڭ قاڭشىرى تۈز بولسا، بالىغا ئىرسىيەت قالدۇرۇش ئېھتىماللىقى يۇقىرى بولىدۇ. بۇرۇن ئىرسىيىتى قورامىغا يەتكۈچە سوزۇلۇپ بارىدىغان بولۇپ، كىچىك ۋاقتىدا بۇرنى پاناق بولغان تەقدىردىمۇ، قورامىغا يەتكەندە يەنە قاڭشىرى ئېگىز بولۇپ ئۆزگىرىشى مۇمكىن.
بوي ئېگىزلىكى
   بالا ئېگىز چوڭ بولامدۇ بولمامدۇ، بۇنىڭدا دادا ۋە ئانا ھەر ئىككىسىنىڭ تەسىرى بار؛ بوي ئېگىزلىكنى بەلگىلەيدىغان ئامىللارنىڭ %35تى دادىدىن، %35تى ئانىدىن كېلىدۇ. باشقا ئامىللار، يېمەك-ئىچمەك ئادىتى، ھەرىكەت قىلىپ چېنىقىش ئادىتى قاتارلىقلارنى ئۆز ئىچىگە ئالىدۇ.
سېمىز ئۇرۇقلۇقى
   دادا ياكى ئانا ھەر ئىككىسى ئۇرۇق بولسا، تۇغۇلغان بوۋاقمۇ كۆپىنچە ئۇرۇق ئادەم بولىدۇ. ئەگەر دادا ۋە ئانا ھەر ئىككىسى سېمىز بولسا، ئۇنداقتا تۇغۇلغان بالىنىڭ سېمىز چوڭ بولۇش نىسبىتى %53كە يېتىدۇ. ئەگەر دادا بىلەن ئانا ئىككىسىنىڭ ئىچىدىكى پەقەت بىرسىلا سېمىز بولسا، ئۇنداقتا بالىنىڭ سېمىز چوڭ بولۇش نېسبىتى پەقەت %13لا بولىدۇ. 
چاچ
   پەينەكلىك، پەقەت ئوغۇل بالىغىلا ئىرسىيە قېلىپ قىز بالىغا ئىرسىيەت قالمايدۇ. مەسىلەن، دادا پەينەك بولسا، ئوغلىغا ئىرسىيەت قالدۇرۇش ئېھتىماللىقى %50 بولىدۇ؛ ھەتتا، ئانا تەرەپنىڭ دادىسى پەينەك بولسىمۇ، ئۆزىنىڭ پەينەكلىكىنى قىزىنىڭ ئوغلىغا ئىرسىيەت قالدۇرۇش ئېھتىماللىقىمۇ %25بولىدۇ.
خاراكتېر
   پىسخىكا ئىرسىيەت ئىلىمىنىڭ قارىشىچە، بالىنىڭ خاراكتېرىنىڭ %50تى ئىرسىيەتتىن كېلىدۇ، قالغان يېرىمى بولسا كىيىنلىك تەرەققىياتتىن، يەنى بالىلار تۇرغان مۇھىت، ئائىلە كەيپىياتى، تەربىيەلەش ئۇسۇلى، ھەتتا ئولتۇراق شارائىتى ۋە يېمەك-ئىچمەك ئادىتى قاتارلىقلاردىن كېلىدۇ.