ئاياللار ھامىلدار بولغاندىن كېيىن، بەدىنىدە زور مىقداردا ھامىلدارلىق گورمۇنى ئاجرىلىپ چىقىپ، بالىياتقۇنىڭ يېغىلىپ تارىيىشىنى توسۇش بىلەن بىرگە، ئاشقازان-ئۈچەي يوللىرى مۇسكۇللىرىنىڭ كېرىلىش كۈچىنىمۇ ئاجىزلاشتۇرىۋېتىدۇ ۋە قىمىرلىشىنى ئاستىلىتىدۇ. ھامىلدارلىق مەزگىلىدە بالىياتقۇنىڭ چوڭىيىشىغا ئەگىشىپ، تۈز ئۈچەي بېسىلىشقا ئۇچرايدۇ؛ بۇندىن باشقا، بالىياتقۇ يوغىنىغاندىن كېيىن، قوساق قىسىم بوشلۇقىدىكى قان ئايلىنىشمۇ توسقۇنلۇققا ئۇچرايدۇ. بۇ سەۋەبلىك، ھامىلدار ئايالدا قەۋزىيەت كۆرىلىدىغان بولۇپ، بەزىدە ھەتتا ئېغىرلىشىپ، نەچچە كۈنگىچە چوڭ تەرەت كەلمەيدىغان ئەھۋاللار كۆرۈلىدۇ.

   ئۇنداقتا، ھامىلدارلىق مەزگىلىدە قەۋزىيەت كۆرۈلسە قانداق قىلىش كېرەك؟
   قەۋزىيەت ئالامەتلىرىنى يېنىكلىتىش ئۈچۈن، مۇقىم ۋاقىتتا چوڭ تەرەت قىلىش ئادىتى يېتىلدۈرۈش كېرەك. قەۋزىيەت بەك ئېغىر بولمىغان ئەھۋال ئاستىدا، ھەر كۈنى كەچلىك تاماقتىن كېيىن، يېرىم سائەت سەيلى قىلىش ئارقىلىق ھەرىكەت مىقدارىنى ئاشۇرۇش لازىم؛ بۇندىن باشقا، يېمەك-ئىچمەكنى ماسلاشتۇرۇپ ئىستېمال قىلىشقا دىققەت قىلىش كېرەك. مەسىلەن، كۈدە، يىرىك ئاشلىق، پۇرچاق مەھسۇلاتلىرى قاتارلىق تالا تەركىبى يۇقىرى بولغان يېمەكلىكلەرنى كۆپرەك ئىستىمال قىلىش، قاننىڭ قەنت مىقدارى يۇقىرى بولمىسا، مەي باغلاپ پىشقان يېمەكلىكلەر ۋە مىۋىلەرنى ئىستىمال قىلىپ بىرىش كېرەك. بۇندىن باشقا قايناقسۇنى كۆپرەك ئىچىپ بىرىش، ھەر قېتىملىق تاماق ئالدىدا ئاچا قورساققا بىر ئىستاكان سۇغۇق قايناق ئىچىپ بەرمەك لازىم. ئەگەر قاننىڭ قەنت مىقدارى يۇقىرى بولمىسا، ئازراق ھەسەل قوشۇپ ئىچىپ بەرسەك، ئاشقازان ئۈچەينى غىدىقلاپ قىمىرلىشىنى ئىلگىرى سۈرۈشكە بولىدۇ.

   بەزى ئاياللار ھامىلدار بولغاندىن كېيىن، ھەرىكەت قىلىشى قولايلىق بولمىغاچقا، كۈندىلىك پائالىيەت مىقدارى زور دەرىجىدە تۆۋەنلەپ، ئەسلىدىنلا قىمىرلاش ئازلاپ قالغان ئاشقازان ئۈچەينىڭ يېمەكلىكلەرنى ھەزىم قىلىش ئىقتىدارىنى تۆۋەنلىتىۋىتىدۇ؛ بۇمۇ ھامىلدار ئايالدا قەۋزىيەت پەيدا قىلىشنىڭ بىر سەۋەبىدۇر. شۇڭا، ھامىلدار ئايالدا مەيلى قەۋزىيەت بار بولسۇن ياكى بولمىسۇن، ھامىلدارلىق مەزگىلىدە، ھەركۈنى مۇۋاپىق تۈردە ھەرىكەت قىلىشتا چىڭ تۇرۇش لازىم.
   ئەگەر يېمەك-ئىچمەك ئارقىلىق تەڭشەش ئېلىپ بېرىش ۋە مۇۋاپىق تۈردە ھەرىكەتلىنىش بىلەنمۇ قەۋزىيەتنى ياخشىلىغىلى بولمىسا، ئۇنداقتا دوختۇرلارنىڭ كۆرسەتمىسىگە ئاساسەن، ھامىلدار ئاياللارغا ماس كېلىدىغان دورىلارنى ئىشلىتىش لازىم.