يەسلى ئوقۇتقۇچىلىرىنىڭ ئاتا-ئانىلارغا دىيىشنى ئويلايدىغان نۇرغۇن گەپلىرى بار بولۇپ، تۆۋەندىكى ئون تۈرلۈك تەكلىپنى، ئۇلار ئاتا-ئانىلارغا بىلدۈرۈشنى ھەممىدىن بەك ئۈمىد قىلىدۇ.

   1. سىز ئەگەر ھەر كۈنى ئىشقا كېچىكىپ قېلىشتىن ئەنسىرەپ، بالىڭىزنى ئالدىراش ھالدا يەسلىگە ئاپىرىپ قويسىڭىز، بۇنداق قىلمىشىڭىز بالىغا جىددىيلىشىش تۇيغۇسى ھېس قىلدۇرۇپ قويىدۇ. ئازراق ۋاقتىڭىزنى چىقىرىپ، بالىڭىزنىڭ ئورۇنلىشىۋىلىشىغا ياردەملىشىشىڭىز كېرەك؛ ئەگەر مەلۇم بىر كۈنى چۈشتىن كىيىن، سىز ناھايىتى ئالدىراش بولۇپ كەتسىڭىز، بىزگە ئالدىنئالا تېلفون قىلىپ، بىزنى خەۋەرلەندۈرۈپ قويىشىڭىز كېرەك.
   2. بالىنى يەسلىگە ئېلىپ كەلگەندە، ئۇنىڭغا بەك قىممەت باھالىق ياخشى كىيىملەرنى كېيگۈزمەڭ؛ بولمىغاندا، ئەگەر ئۇلار ئېھتىياتسىزلىقتىن كىيىملىرىگە رەڭ تۆكۈپ بەرسە(بۇ خىل ئەھۋالنىڭ يۈز بىرىش نىسبىتى %99.9بولىدۇ)، ئۇلاردا ئوڭۇشسىزلىق تۇيغۇسى شەكىللىنىپ قالىدۇ.
   3. كىچىك بالىلار ئادەتتە، ئۆزىنىڭ ئويۇنچۇقلىرىنى باشقىلار بىلەن ھەمبەھىرلىنىشنى ياخشى كۆرمەيدۇ؛ ئۇنىڭ ئۈستىگە، كىچىك دوستلارنىڭ ئورتاق ئوينىشى ئۈچۈن، يەسلى ئاللىبۇرۇنلا بىر تۈركۈم ئويۇنچۇقلارنى تەييار قىلىپ قويغان.
   4. ئەگەر سىزنىڭ بالىڭىزنىڭ زاكىسى ئىشلىتىلىپ بولسا، بىز باشقا بالىلارنىڭكىنى ئۆتنە ئېلىپ ئىشلىتىپ تۇرساق، بۇ ئادىل بولمايدۇ؛ ئۇنىڭ ئۈستىگە، پەقەت ئۆزى ئېلىپ كەلگىنىلا، ئاندىن ئۇلارنىڭ رازمىرىغا ماس كېلىدۇ.
   5. بالىڭىز يەسلىگە بىللە ئېلىپ كىلىدىغان نەرسىلەرگە، بالىنىڭ ئىسمىنى يېزىپ ئەسكەرتىپ قويۇڭ؛ بەزىدە، بىز ھەممە بالىلارنىڭ نەرسىلىرىنى ئېنىق ئايرىپ بولالمايمىز.
   6. بالىڭىزنى يەسلىگە ئەكىلىپ قويغاندىن كېيىن، ئۇلار بىلەن كۈلۈمسىرەپ تۇرۇپ خوشلىشىڭ. بالىڭىزنى بىر كۈن كۆرەلمەيدىغانلىقىڭىزنى ئويلىغاندا، كۆڭلىڭىز چوقۇم بىئارام بولىدۇ، ئەمما بۇلارنى بالىڭىزغا بىلدۈرمەڭ. چۈنكى، ئەگەر سىز بالىنى ئەكىلىپ قويۇپ قايتىدىغان ۋاقىتتا كۆڭلىڭىزنىڭ يېرىم بولغانلىقىنى سىرتقا ئىپادىلەپ چىقارسىڭىز، بالىلار كۆڭلى تېخىمۇ بەكرەك يېرىم بولۇپ، سىزدىن ئايرىلىشنى خالىماي قالىدۇ.
   7. بالىلارنىڭ ھەمىشە خۇشال-خۇرام، كەيپىياتى ياخشى ھالەتتە تۇرىۋەرمەيدىغانلىقىنى تونۇپ يىتىشىڭىز كېرەك. بالىڭىز ئۆيدىكى ۋاقىتتىمۇ كەيپىياتى ناچار بولۇپ قالىدىغان ۋاقىتلىرى بار بولغان ئىكەن، ئۇنداقتا يەسلىدىمۇ ئوخشاش بولىدۇ. بىراق، يەسلىدىكى كۆپ قىسىم ۋاقىتتا بالىنىڭ كەيپىياتى ناھايىتى خۇشال بولغان ئىكەن، ئۇنداقتا ئۇنىڭ بەزىبىر ۋاقىتلاردا خاپا بولۇپ قېلىشىغا قارىتا بەك سەزگۈر بولۇپ كەتمەڭ.
   8. ئىمكان قەدەر ۋاقىتقا رىئايە قىلىڭ. ئەگەر سائەت بەشتە ئىشتىن چۈشىدىغان بولساق، بالىنى ئالغىلى سائەت ئالتە بولغاندا، ھەتتا ئۇنىڭدىنمۇ كىيىن كىلىشتىن ئىمكان قەدەر ساقلىنىشىڭىزنى ئۈمىد قىلىمىز؛ چۈنكى، بىزمۇ ئۆيىمىزگە ۋاقتىدا قايتىپ بېرىشنى ئۈمىد قىلىمىز.
   9. بىز سىزگە قالدۇرغان باغاقچىنى ياكى قالدۇرغان سۆزلىرىمىزنى ئىمكان بار ۋاقتىدا كۆرۈڭ؛ بۇنىڭدا ئادەتتە مۇھىم ئۇچۇرلار بار. مەسىلەن، يەسلى، يېغىن ئېچىش ياكى بالىلارنى ساياھەتكە ئېلىپ چىقىشنى پىلانلىغان بولسا، ئەڭ ياخشىسى ئالدىنئالا تەييارلىق كۆرۈپ قويىشىڭىز لازىم بولىدۇ.
   10. ئۆيىڭىزدە، يەسلىنىڭ تەلىپى بىلەن بىردەكلىكنى ساقلاڭ. ئەگەر سىز ئۆيدە، بالىلارنىڭ ئويۇنچۇقلىرىنى قالايمىقان تاشلاپ قويۇشىغا رۇخسەت قىلسىڭىز، بىز يەسلىدە بۇنداق قىلىشقا يول قويمىساق، بالىلار نېمە قىلىشىنى بىلەلمەي قالىدۇ.