ئەنخۇي ئۆلكىلىك بالىلار كېسەللىكلىرى دوختۇرخانىسى جىددىي قۇتقۇزۇش بۆلىمىنىڭ مۇدىرى، جۇڭخۇا تىبابەت ئىلمىي جەمئىيىتى ئېغىر دەرىجىدىكى بالىلار كېسەللىكى دوختۇرلىرى تارماق جەمئىيىتى جاراھەتلىنىشنى تىز قۇتقۇزۇش ۋە ئېغىر دەرىجىدىكى تاشقى كېسەللەر كومتېتىنىڭ ھەيئەت ئەزاسى شۈ ۋېيخۇا دوختۇرنىڭ تونۇشتۇرىشىچە، قورامىغا يەتكەن كىشىلەر ھېيت-بايرام كۈنلىرىدە ئېغىز خۇمارىنى چىقىرىدىغان ئۇششاق يېمەكلىكلەرنى، كىچىك بالىلارغا يىگۈزۈشكە قەتئى بولمايدىكەن؛ مەسىلەن، ئىسپىرت تەركىبى بار بولغان يېمەكلىكلەر. ئۇنىڭ دىيىشىچە، بالىلارنىڭ جىگەر ۋە بۆرەك ئىقتىدارى ئىنتايىن ئاجىز بولۇپ، ئىسپىرتنى پارچىلىيالمايدىكەن، شۇڭا ناھايىتى ئاز مىقداردا بولسىمۇ، ئۇلارنىڭ نىرۋا سېستىمىسىنى زىيانغا ئۇچرىتىدىكەن. يېقىنقى يىللاردىن بويان، چوڭلار كىچىك بالىنى ئەركىلىتىپ، ئۇلارنىڭ ئېغىزىغا ھاراق تېمىتىش سەۋەبلىك بالىنىڭ دەلدۈش بولۇپ قېلىشىنى، ھەتتا ئۆلۈپ كېتىشىنى كەلتۈرۈپ چىقارغان مىساللار ئاز ئەمەس؛ بەزى دوختۇرخانىلاردا، يەنە تېخى ئىسپىرت تەملىك شاكلاتنى ئۇقۇشماي يەپ سالغان بالىلارنى جىددىي قۇتقۇزغان ئەھۋاللار كۆرۈلگەن.

   ئىسپىرتتىن باشقا، ئادەتتە خەتەر كۆرۈلۈش ئېھتىماللىقى بىرقەدەر يۇقىرى بولغان يېمەكلىكلەردىن، گازىر، خاسىڭ قاتارلىق قاتتىق پوستلۇق يېمەكلىكلەر ۋە گودوڭ قاتارلىقلار بار. بۇ خىلدىكى يېمەكلىكلەرنىڭ بالىلارغا خەۋپ ئېلىپ كىلىشىدىكى سەۋەب، كىچىك بالىلارنىڭ چايناپ يۇتۇش ئىقتىدارى تېخى تولۇق يېتىلىپ بولالمىغاچقا، يۇقىرىدا ئېيتىلغان يېمەكلىكلەر ئاسانلا نەپەسلىنىش يولىغا كىرىپ كىتىپ، بالىنىڭ نەپەسلىنەلمەي قېلىشىنى كەلتۈرۈپ چىقىرىشى مۇمكىن.
   بۇلاردىن باشقا، كىچىك بالىلارنىڭ بەدەن ساپاسى، ئۇلارنىڭ خام يىمەكلىك، پىششىقلاپ ئىشلەنگەن مۇراببا ۋە ھەسەل قاتارلىق يېمەكلىكلەرنى يىيىشكە ماس كەلمەسلىكىنى بەلگىلەيدۇ. چۈنكى، خام يېمەكلىكلەر تەركىبىدە باكتىرىيە، پارازىنت قۇرت قاتارلىقلار بار بولۇپ، بالىلارنىڭ كېسەلگە قارشى تۇرۇش كۈچى نىسبەتەن ئاجىز بولغاچقا، ئاسانلا يۇقۇملىنىش پەيدا بولىدۇ؛ ھەسەل تەركىبىدە بولسا، بوتۇلىزىم تاياقچە باكتىرىيەسى سىپورىسى ۋە ئاياللىق ھورمۇنى بار؛ پىششىقلاپ ئىشلەنگەن مۇراببا تەركىبىدە بولسا، رەڭ ماددىسى، ئىپار قاتارلىقلار بار بولۇپ، كىچىك بالىلارنىڭ مىتابولىزىم ئىقتىدارى نىسبەتەن ئاجىز بولغاچقا، بۇ ماددىلار ئۇلارنىڭ ئىچكى ئەزالىرىغا زىيانلىق تەسىر كۆرسىتىدۇ.
   شۈ ۋېيخۇا دوختۇرنىڭ بىلدۈرىشىچە، بالىلار يەنە گازلىق ئىچىملىكلەرنى كۆپ ئىچىۋالسىمۇ بولمايدىكەن. يېقىنقى يىللاردىن بويان بالىلار دىئابىت كېسەللىكى كۆرۈنەرلىك دەرىجىدە ئېشىپ كەتكەن بولۇپ، گازلىق ئىچىملىكلەرنىڭ ئالاھىدىلىكى بولسا يۇقىرى قەنت ۋە يۇقىرى ئىنىرگىيە تەركىبلىك بولۇشتۇر. بۇنداق ئەھۋالدا، ئەگەر بالىلار گازلىق ئىچىملىكنى كۆپ ئىچسە، ئۇلاردا ئاسانلا دىئابىت كېسىلى جىددىي قوزغىلىش، جىددىي خاراكتېرلىك ئاشقازان ئاستى بېزى ياللۇغى قاتارلىق ئالامەتلەرنى كەلتۈرۈپ چىقىرىدىكەن.