بالىنىڭ ئۆسۈپ-يېتىلىشى، ئۇزۇقلۇقنىڭ يېتەرلىك بولۇش بولماسلىقى بىلەن زىچ مۇناسىۋەتلىك بولۇپ، كالتسىي كەمچىللىكنىڭ بالىلارنىڭ يېتىلىشىگە ئېلىپ كىلىدىغان زىيىنى ئىنتايىن خەتەرلىك بولىدۇ. بالىدا كالتسىي كەمچىل بولسا، دوختۇرلار ياكى تەجىربىسى بار ئاتا-ئانىلار ئاسانلا بېلىۋالىدۇ؛ لېكىن بىر قىسىم يېڭىدىن ئانا بولغۇچىلارغا نىسبەتەن، كالتسىي كەمچىل بولۇشتا كۆرىلىدىغان ئالامەتلەرنى چۈشىنىپ كېتەلىشى ناتايىن. ئەمەلىيەتتە، ئەگەر بالىلاردا كالتسىي كەمچىل بولسا، تۆۋەندىكىدەك كۆرۈنەرلىك ئۈچ خىل "سىگنال" كۆرىلىدۇ.

ئۇخلىغاندا تەرلەپ كىتىش
   ئادەتتە ئۇخلىغان ۋاقىتتا، بەزىدە بالىلاردىن تەر چىقىدۇ؛ بولۇپمۇ ھاۋا ئىسسىق كۈنلەردە، نۇرغۇن ئاتا-ئانىلار بۇنى نورمال ئەھۋال دەپ قاراپ، نەزەردىن ساقىت قىلىپ قويىدۇ. ئەگەر بالىڭىز ھەمىشە تەرلىسە، ھەتتا سۇغۇق قىش كۈنلىرىدىمۇ تەرلەپ كەتسە، ئۇنداقتا بۇ ئەھۋالغا دىققەت قىلىش كېرەك. چۈنكى، بالىلارنىڭ بەدىنىدە كالتسىي كەمچىل بولغان ئەھۋالدىمۇ، ئۇلاردا ئۇخلىسا تەرلەپ، ئويغانسا تەرلەش توختايدىغان ئەھۋال كۆرىلىدۇ. ئەگەر بالىلاردا كالتسىي كەمچىل بولغانلىقى جەزىملەشتۈرۈلسە، ئاتا-ئانىلار بالىنىڭ يېمەكلىكلىرىنى مۇۋاپىق تۈردە تەڭشەپ، بالىلارنىڭ كالتسىي قوبۇل قىلىش مىقدارىنى ئاشۇرۇش كېرەك؛ بۇندىن باشقا يەنە، بالىنى مۇۋاپىق تۈردە ئاپتاپقا قاقلاپ بەرمەك لازىم.

تاماق تاللاش
   بالىدا كالتسىي ماددىسى كەمچىل بولغاندا، ئۇلاردا يەنە ئىشتىھا تۇتۇلۇش، روھى كەيپىياتى چۈشكۈن بولۇش، تارتىشىپ قېلىش، ئەتراپتىكى مۇھىتقا قىزىقماسلىق، ئەقلى ئىقتىدارى ۋە ئىممونت كۈچى تۆۋەنلەپ كېتىش قاتارلىق ئالامەتلەر كۆرىلىدۇ. ئەگەر بالىڭىزنىڭ تاماق تاللايدىغان، ھەتتا تاماق يىگۈسى كەلمەيدىغان بولۇپ قالغانلىقىنى بايقىسىڭىز، ئۇنداقتا بەلكىم، بالىنىڭ بەدىنىدە كالتسىي كەمچىل بولغان بولۇشى مۇمكىن.

بوۋاقنىڭ چىشى كىيىن چىقسا
   بوۋاقنىڭ چىش چىقىش ۋاقتى، ئىرسىيەت قاتارلىق ئامىللارنىڭ تەسىرىگە ئۇچرايدىغان بولۇپ، ئازراق كىيىن قالسا ياكى بالدۇر چىقىپ قالسا، بۇنىڭدىن بەك ئەنسىرەپ كىتىش كەتمەيدۇ. ئادەتتە، بوۋاق 6ئايلىق بولغان ۋاقىتتا سۈت چىشى چىقىشقا باشلايدۇ؛ ئەمما بوۋاق 13ئايلىق بولغاندىن كىيىن ئاندىن چىش چىقسا، ئۇنداقتا چىش چىقىش كىيىن قالغان ھېسابلىنىدۇ. ئەگەر بالا چىش چىقىش مەزگىلىدىن ئۆتۈپ كەتكەندىن كىيىنمۇ چىشى چىقمىسا ياكى چىشىنىڭ ئۆسۈشى باشقا ئوخشاش ياش مەزگىلىدىكى بالىلارغا قارىغاندا ئاستا بولسا، بۇ ۋاقىتتا ئېھتىيات قىلماي بولمايدۇ؛ چۈنكى بالىدا كالتسىي ماددىسى كەمچىل بولغانلىق سەۋەبىدىن، ئۇلارنىڭ چىشى كىچىكىپ چىققان ياكى ئۆسۈشى ئاستا بولۇپ قالغان بولۇشى مۇمكىن.