ئىمىتىش مەزگىلى كەلگەندە، نۇرغۇن ئانىلار بالىسىنى قانداق ئىمىتىش ھەققىدە ئەنسىرەشكە باشلايدۇ. بىراق، نۇرغۇن ئاياللارنىڭ تۇنجى ئانا بولۇشى بولغاچقا، نۇرغۇن نەرسىلەرنى چۈشەنمەيدۇ ھەم بىلمەيدۇ. بۇنداق ئەھۋالدا، بەزىدە ئۆزىمۇ بىلمەستىن بوۋىقىغا زىيان يەتكۈزۈپ قويىدىغان ئەھۋاللار كىلىپ چىقىشى مۇمكىن. مەسىلەن، ئىمىتىش مەزگىلىدە ھاراق ئىچىش ۋە تاماكا چىكىش دىگەنگە ئوخشاش قىلمىشلار، بوۋاققا زىيانلىق تەسىر ئەكىلىدىغان قىلمىشلاردۇر. بۇندىن باشقا، بوۋاقنىڭ سالامەتلىكى ئۈچۈن، تۆۋەندىكى بىر نەچچە خىل ۋاقىتتىمۇ، بوۋاقنى ئىمىتىشكە بولمايدۇ.

قاتتىق ھەرىكەتلىنىشتىن كىيىن بوۋاقنى ئىمىتىشكە بولمايدۇ
   نۇرغۇن ئاياللار، تۇغۇتتىن كىيىن بەدەن شەكلىنى ئەسلىگە ئەكىلىش ئۈچۈن، ھەرىكەتلىنىپ چېنىقىشنى تاللايدۇ. ئەمىلىيەتتە، بۇنىڭ ھېچقانداق خاتاسى يوق؛ بىراق، قاتتىق ھەرىكەت قىلغاندىن كىيىن، كەينىدىن ئۇلاپلا بالىنى ئىمىتىشكە بولمايدۇ. چۈنكى، قاتتىق ھەرىكەتلىنىشتىن كىيىن ئانىنىڭ تېنىدە بىر خىل كىسلاتالىق ماددا ئاجرىلىپ چىقىدىغان بولۇپ، بۇ خىل ماددا ئانا سۈتىنىڭ تەمىگە ۋە سۈپىتىگە تەسىر يەتكۈزىدۇ. شۇڭلاشقا، ئادەتتە قاتتىق ھەرىكەتلىنىش ئېلىپ بارغاندا، ئەڭ ياخشىسى ئىككى سائەتتىن كىيىن ئاندىن بوۋاقنى ئىمىتىش كىرەك.

سىرتتىن قايتىپ كىلىپلا بوۋاقنى ئىمىتىشكە بولمايدۇ
    ئىمىتىدىغان بالىسى بار ئاياللارمۇ ئىجتىمائى ئالاقە ياكى خىزمەتتىن مۇستەسنا بولالمايدۇ. بىراق، سىرتتىن قايتىپ كەلگەندىن كىيىن، بوۋاقنى ئىمىتىشكە ئالدىرماسلىق كىرەك. چۈنكى، ئانا سىرتتىن قايتىپ كەلگەندە، سىرتقى مۇھىتتىن نۇرغۇنلىغان باكتىرىيە ۋىرۇسلارنى بىللە ئېلىپ قايتىپ كىلىدىغان بولۇپ، بۇ ۋاقىتتا بالىنى ئىمىتكەندە، بوۋاقنى كىسەل قىلىپ قويۇش خەۋپى تۇغۇلىدۇ. شۇڭا، ئانىلار سىرتتىن قايتىپ كەلگەندىن كىيىن، ئەڭ ياخشىسى ئۈستى-بېشىنى بىر تازىلىۋىتىپ، ئاندىن بوۋاقنى ئىمىتىش كىرەك.