ئادەتتە، بەزىدە ئۇخلىغان ۋاقتىمىزدا ئېغىزىمىزدىن سۇ ئېقىپ، ياستۇقنى ھۆل قىلىۋېتىدۇ. ئۇخلىغاندا ئېغىزدىن سۇ ئېقىشنىڭ سەۋەبلىرى كۆپ خىل بولۇپ، ئۇخلاش ھالىتى ياخشى بولماسلىق، ئېغىز بوشلۇقى كېسەللىكى، زىيادە ھاياجانلىنىش، ئاشقازان-ئۆت بىنورماللىشىش قاتارلىقلارنىڭ ھەممىسى، ئادەمنىڭ ئۇخلىغاندا ئېغىزىدىن سۇ ئېقىپ قېلىشىنى كەلتۈرۈپ چىقىرىدۇ. ئۇنداقتا، ئۇخلىغاندا ئېغىزىمىزدىن سۇ ئېقىپ قالىدىغان ئەھۋال كۆرۈلگەندە قانداق قىلىش كېرەك؟

   ئالدى بىلەن، ئۇخلاش ھالىتىمىزنى چوقۇم توغرىلىشىمىز كېرەك، ئۈستەلگە ئارتىلىپ ياكى ئورۇندۇققا يۆنىلىپ ئۇخلاشقا بولمايدۇ؛ چۈنكى، بۇ خىل ھالەتتە ئۇخلىغاندا ئېغىزىمىزدىن ئاسانلا سۇ ئېقىپ قالىدۇ. شۇڭا، ئادەتتە ئۇخلاش ھالىتىمىزنى توغرىلاپ، كارىۋاتتا تۈز يېتىپ ياكى يان تەرىپىمىزنى بېسىپ يېتىپ ئۇخلىشىمىز كېرەك.

   ئۇخلاشتىن ئاۋۋال نەرسە كېرەك يېمەسلىك ھەمدە چىشىمىزنى چوتكىلىشىمىز لازىم. ئادەتتە، كەچتە ئۇخلاشتىن ئاۋۋال چىشنى چوتكىلاپ بولغاندىن كىيىن، ئېغىز بوشلۇقىمىزنى قايتا-قايتا چايقاپ، ھېچقانداق تاتلىق ياكى تۇز تەمى قالماسلىققا كاپالەتلىك قىلىش تەۋسىيە قىلىنىدۇ.

   ئەگەر ئاستى ئۈستىدىكى چىشلىرىمىزنىڭ ئورنى نورمال بولمىسىمۇ، ئۇخلىغاندا ئېغىزدىن سۇ ئېقىپ قېلىشنى كەلتۈرۈپ چىقىرىدۇ. شۇڭا، ئەڭ ياخشىسى دوختۇرخانىغا بېرىپ غەلىتە شەكىللىك چىش بار يوقلۇقىنى تەكشۈرتۈپ بېقىش، ئەگەر بار بولسا ۋاقتىدا تۈزەش قىلدۇرۇش لازىم.

   ئۇخلىغاندا ئېغىزدىن سۇ ئېقىش مەسىلىسى، ئۆتنىڭ ئىقتىدارىدا مەسىلە كۆرۈلگەنلىكتىنمۇ بولۇشى مۇمكىن؛ شۇڭا، قوناق، چىلان، پېچەكگۈل، ھەسەل قاتارلىق ئۆت ئىقتىدارىنى ياخشىلايدىغان يېمەكلىكلەرنى كۆپرەك ئىستېمال قىلىپ سىناپ باقساق بولىدۇ.