ئادەتتە گۆش كۇمىلىچىدىن باشقا، كۆكتاتتىن تەييارلانغان كۇمىلاچلارمۇ كىشىلەرنىڭ ياقتۇرۇپ ئىستىمال قىلىشىغا ئىرىشىدۇ. بۈگۈن كۆپچىلىككە تۇنۇشتۇرماقچى بولغان مايدا داغلانغان تۇرۇپ كۇمىلىچى، تېشى چۈرۈك ئىچى يۇمشاق بولۇپ، تۇرۇپنىڭ ئەسلىدىكى قاڭسىق تەمى يوقاپ ئىنتايىن تەملىك بولىدۇ.

   كىتەرلىك ماتىريال: سەۋزە، ئاق تۇرۇپ، ئۇن، پىنتوزا، تۇخۇم، غولپىياز
   كىتەرلىك خۇرۇچ ماتىريالى: سۇ، ئىستىمال مېيى، شىڭچوۋ جىياڭيۇسى، قارىمۇچ، تۇز

تەييارلاش ئۇسۇلى
بىرىنچى قەدەم
   يىمەكلىك ماتىرياللىرىنى تۇزلايمىز. چوڭ داستىن بىرنى تەييارلاپ، سەۋزە بىلەن تۇرۇپنى يۇيۇپ پاكىزلىغاندىن كىيىن سۈيىنى پاكىز ساقىتىۋىتىپ، قەلەمچە ھالىتىدە توغراپ داسقا سالىمىز؛ غولپىياز مايسىسىنى ئۇششاق توغراپ، ئۇنىمۇ داسقا سالىمىز. داستىكى ماتىرياللارنى تەكشى ئارىلاشتۇرغاندىن كىيىن، مۇۋاپىق مىقداردا تۇز سېپىپ ئارىلاشتۇرۇپ، 30مىنۇت تۇزلايمىز.

ئىككىنچى قەدەم
   قازان ئېسىپ سۇ قاينىتىپ، پىنتوزىنى سېلىپ قاينىتىپ، پىنتوزا يۇمشاپ پىشقاندىن كىيىن سۈزۈپ ئېلىپ ئۇششاق توغرايمىز ھەمدە داستىكى سەۋزە، تۇرۇپقا قوشىۋىتىمىز.

ئۈچىنچى قەدەم
   داستىكى تۇزلانغان يىمەكلىك ماتىرياللىرىنىڭ سۈي چىققاندىن كىيىن، ئۈستىگە تۇخۇمدىن بىرنى چېقىپ، بىرلا ۋاقىتتا مۇۋاپىق قارىمۇچ ۋە بىر قوشۇق شىڭچۇۋ جىياڭيۇسى قوشۇپ، تەكشى ئارىلاشتۇرۇپ تەم كىرگۈزىمىز.
تۆتىنچى قەدەم
   30مىنۇت توشقاندىن كىيىن، داستىكى "قىيما"غا 200گىرام ئۇن قوشۇپ، تەكشى ئارىلاشتۇرۇپ يېپىشقاق ھالەتكە ئەكىلىمىز؛ بۇ جەرياندا سۇ قوشمايمىز.

بەشىنچى قەدەم
   قازاننى ئېسىپ ماي قۇيۇپ قىزىتقاندىن كىيىن، داستا تەييارلىغان "قىيما"نى قولىمىزدا سىقىپ كۇمىلاچ ھالىتىگە ئەكەلگەندىن كىيىن، قازاندىكى مايغا سېلىپ داغلايمىز؛ كۇمىلاچنى قازانغا تاشلىغاندىن كىيىن ئۇنى ئاۋال مىدىرلاتمايمىز، ئۇ داغلىنىپ قاتقاندىن كىيىن، ئاندىن ئۆرۈپ چۆرۈپ قويساق بولىدۇ؛ كۇمىلاچ داغلىنىپ سىرتقى يۈزى سېرىق ئالتۇن رەڭگىگە كىرگەندە سۈزۈپ ئېلىپ ئىستىمال قىلساق بولىدۇ.