يەرشارى كىلىماتى ئۆزلۈكسىز ئىللىپ، دېڭىز يۈزى بارغانسىرى يۇقىرى ئۆرلەۋاتقان بۈگۈن كۈندە، نۇرغۇن كىشىلەر كۈنلەرنىڭ بىرىدە ئۆيىنى سۇ بېسىۋىلىشتىن ئەنسىرەيدىغان بولۇپ قالدى. يېقىندا، ئاركۇپ ناملىق بىر شىركەت، سۇ ئۈستىدە لەيلەيدىغان بىر يۈرۈش  ئۆي لايىھەلەپ چىققان ھەمدە كىلەركى ئايدا فىلورىدا شىتاتىدا ئۆتكۈزىلىدىغان كىمە كۆرگەزمىسىدە كۆرگەزمىگە قويۇشنى پىلانلىغان.

   بۇ ئۆيگە قۇياش نۇرىدىن پايدىلىنىپ ئىنىرگىيە تەمىنلىنىدىغان بولۇپ، ئۆز-ئۆزىنى پۈتۈنلەي تەمىنلەپ كىتەلەيدىكەن؛ بۇنىڭ بىلەن بىرگە، بۇ ئۆي يەنە قۇيۇنغا قارشى تۇرالايدىكەن ھەمدە يامغۇر سۈيىنى يېغىپ تازىلاپ، ئىچىملىك سۇ ۋە تۇرمۇشتا ئىشلىتىدىغان سۇغا ئايلاندۇرالايدىكەن.

   بۇ ئالى دەرىجىلىك ئۆيدە تۆت ياتاق ئۆي بار بولۇپ، ئومۇمى كۆلىمى تەخمىنەن 404كۋادىرات مىتىر كىلىدىكەن. بۇ خىل ئۆيدە ئولتۇرسا، ئادەتتىكى ئۆيگە ئوخشاش ئارامبەخىش ھىس قىلىشقا، ياكى موتۇرلۇق كىمىگە ئوخشاش دېڭىزدا ئۈزۈپ يۈرۈشكە، ۋە ياكى تىنچ ھالدا پورتتا توختىپ قويۇشقا بولىدىكەن.

   بۇندىن باشقا، ئۆيگە سەپلەنگەن سۇيۇقلۇق بېسىمىدىن پايدىلىنىدىغان ئاپتۇماتىك ئۆرلەپ-تۆۋەنلەش سېستىمىسى، ئۆي سۇ يۈزىدە "توختاپ"تۇرغان ۋاقىتتا ئۇنىڭ مۇقىملىقىنى ساقلايدىكەن ھەمدە ئەڭ يۇقىرى بولغاندا ئۈچ مىتىر ئېگىزلىككە كۆتۈرۈلۈپ، ئۆينى دېڭىز دولقۇنىنىڭ ھۇجۇمىدىن ساقلىيالايدىكەن.

   بۇ بىر يۈرۈش ئۆي، ھازىر گەرچە پەقەت فىلورىدا شىتاتى جەنۇبىدىكى دېڭىز رايونى ئۈچۈنلا لايىھەلەنگەن بولسىمۇ، ئەمما ئاركۇپ شىركىتىنى بىلدۈرىشىچە، ئۇنى پۈتكۈل يەرشارى مىقياسىدا ئوخشاشلا نورمال ئىشلىتىشكە بولىدىكەن. ئەلۋەتتە، ئىشلىتىلىش ئۇسۇلى كۆپ خىللىشىشقا يۈزلەنگەن بولۇپ، ئەڭ دەسلەپكى ئولتۇراق ئۆيدىن باشلاپ، ساياھەت تۇرالغۇسى، تاماقخانا، كۆڭۈل ئېچىش ئۆيى قاتارلىقلارنى ئۆز ئىچىگە ئالىدىكەن.