ئىگىلەشلەرگە قارىغاندا، يېقىندا گوللاندىيەلىك ئىككى نەپەر سانائەت لايىھەلىگۈچى، قاغىنى تاماكا قالدۇقى تىرىش ئارقىلىق يىمەكلىك ئالماشتۇرۇشقا مەشىق قىلدۇرۇپ كۆندۈرەلەيدىغان ماشىنىدىن بىرنى لايىھەلەپ چىققان؛ بىراق، بۇ لايىھە ھەددىدىن ئارتىق غايىۋىلىشقان بولغاچقا، ھەرخىل تۈردىكى بەس مۇنازىرىلەرگە ئۇچرىغان.

   بۇ ئىككى لايىھەلىگۈچى، روبىن بىلەن باب، ئۇلارنىڭ بۇ لايىھەنى ئوتتۇرغا قويۇشتىكى ئەسلى مەقسىتى، ئامىستىردام باغچىلىرىدىكى تاماكا قالدۇقلىرى مەسىلىسىنى ھەل قىلىش. ئىككەيلەن دەسلەپتە ماشىنا ئادەمدىن پايدىلىنىپ تازىلاشنى ئويلاشقان؛ بىراق، ماشىنا ئادەم باغچا كوچىلىرىدا ماڭغاندا، پىيادىلىكلەر ۋە ۋەلىسپىت مىنگەنلەردىن ئۆزىنى قاچۇرالماسلىقتەك بىر قاتار قىيىنچىلىقلارغا دۇچ كىلىدىكەن. شۇڭا ئىككەيلەن كىيىنچە دىققىتىنى شەھەردىكى سانى زور بولغان قۇش تۈرىگە قاراتقان. ئۇلار باشتا كەپتەرنى مەشىقلەندۈرۈشنى ئويلاشقان بولسىمۇ، ئەمما كەپتەرنىڭ ئەقلى ئىقتىدارى ئادەتتىكىچە بولغاچقا، ئىككەيلەن ئەڭ ئاخىرىدا دىققىتىنى ھەم ئەقىللىق ھەم سانى كۆپ بولغان قاغىلارغا قاراتقان.

   قاغا، يەر شارىدىكى ئەڭ ئەقىللىق جانلىقلار تۈرىنىڭ بىرى؛ روبىن بىلەن باب، جورشۇئا كېلىننىڭ قاغا قۇتىسى لايىھەسىدىن پايدىلىنىپ،  ئۈسكۈنە تەخسىسىگە تاماكا قالدۇقى بىلەن يىمەكلىكنى قويساق، قاغا يىمەكلىك بىلەن تاماكا قالدۇقىنى بىر-بىرىگە باغلاشتۇرالايدۇ دەپ قارىغان. روبىن بىلەن باب ئالدى بىلەن قاغىنى مەشىقلەندۈرۈشنى پىلانلاپ، قاغىغا تاماكا قالدۇقىنى ئۈسكىنە ئىچىدىكى تەخسىگە سالسا، ئۈسكىنە ئاپتۇماتىك ھالدا يىمەكلىك چۈشۈرىدىغان قىلىپ لايىھەلىگەن. ئاخىرىدا قاغا يىمەكلىكلنى ئېلىپ كىتىپ تاماكا قالدۇقىنى قالدۇرىدۇ؛ ئۇلارنىڭ قارىشىچە، ۋاقىتنىڭ ئۆتىشىگە ئەگىشىپ، قاغا ئۈسكۈنە چۈشۈرۈپ بەرگەن يىمەكلىكنى يىيىشكە ئادەتلىنىپ، تۆت ئەتراپتىن تاماكا قالدۇقى ئىزدەشكە باشلايدۇ.