جاڭدۇ، ياز پەسىللىك كۆكتات بولۇپ، بازاردا ھەممىلا يەردە ئۇچرايدۇ؛ ئۇنىڭ ئۈستىگە جاڭدۇنىڭ باھاسى بەك قىممەتمۇ بولمىغاچقا، نۇرغۇن كىشىلەرنىڭ ياقتۇرۇشىغا ئىرىشكەن. گەرچە جاڭدۇنىڭ تەييارلاش ئۇسۇلى كۆپ خىل بولسىمۇ، ئەمما ئەڭ كۆپ ئۇچرايدىغىنى، يەنىلا قورۇما قورۇپ ئىستىمال قىلىشتۇر. نۇرغۇن كىشىلەر جاڭدۇ قورۇپ باققان بولسىمۇ، بىراق كۆپىنچە كىشىلەر قورۇغان جاڭدۇ چۈرۈك چىقماي يۇمشاق چىقىۋالىدۇ. ئۇنداقتا قانداق قىلىش كىرەك؟ تۆۋەندە بىز، جاڭدۇنىڭ ئاددى قورۇش ئۇسۇلىنى تۇنۇشتۇرۇپ ئۆتىمىز، ياقتۇرغايسىز.

   ئالدى بىلەن، جاڭدۇنى ئىككى ئۇچىنى كىسىپ ئېلىۋەتكەندىن كىيىن بۆلەك ھالىتىدە توغراپ، يۇيۇپ پاكىزلاپ سۈيىنى ساقىتىۋىتىپ تەييار قىلىمىز؛ مۇۋاپىق مىقداردا غولپىياز، زەنجىۋىل، سامساق تەييارلاپ، غولپىيازنى بۆلەك ھالىتىدە توغرايمىز، زەنجىۋىلنى نىپىز ياپراقچە ھالىتىدە توغرايمىز؛ سامساقنى بولسا ئۇششاق چانالما ھالىتىدە توغرايمىز. بۇندىن باشقا، ماي، تۇز، جىياڭيۇ قاتارلىق خۇرۇچ ماتىرياللىرى تەييارلايمىز.

   كەينىدىن قازاننى ئېسىپ، كۆپرەك ماي قۇيۇپ قىزىتىمىز؛ ماي قىزىغاندىن كىيىن، جاڭدۇنى سېلىپ داغلايمىز(ئەگەر بىر قېتىمدا كۆپ بولۇپ قالسا، قېتىمغا بۆلۈپ داغلىساق بولىدۇ)؛ جاڭدۇنى داغلاپ رەڭگى ساغۇچقا مايىل يىشىل رەڭگە ئۆزگەرگەندە سۈزۈپ ئېلىۋالىمىز.

   قازاننى قايتا ئېسىپ، ئازراق ماي قۇيۇپ قىزىتقاندىن كىيىن، ئاۋال زەنجىۋىل بىلەن سامساقنى سېلىپ قورۇپ تەم چىقىرىمىز؛ كەينىدىن يېسى پۇرچاقنى سېلىپ ئىككى مىنۇت ئەتراپىدا قورىغاندىن كىيىن، تۇز ۋە جىياڭيۇ قوشۇپ تەم تەڭشەيمىز ھەمدە غولپىيازنى سېلىپ 6-4مىنۇت ئەتراپىدا قورىغاندىن كىيىن تەخسىگە ئۇسۇپ ئالساق بولىدۇ.