ئاقسىل تەركىبى ئىنتايىن يۇقىرى بولغان كالا گۆشى، كىشىلەرنىڭ تاماق ئۈستىلىدىكى ئەڭ كۆپ ئۇچرايدىغان يىمەكلىكلەرنىڭ بىرى. بىراق، كالا گۆشى پىشۇرغان ۋاقىتتا، نۇرغۇن كىشىلەر مۇنداق بىر مەسىلىگە ئۇچرايدۇ؛ ئۇ بولسىمۇ، قورۇغان كالاگۆشى ئوتۇندەك بىر خىل قۇرغاق چىقىدىغان بولۇپ، چايناپ يۇتماق تەسكە توختايدۇ، تەمىمۇ كۆڭۈلدىكىدەك چىقمايدۇ. ئەمىلىيەتتە، كالا گۆشىنى يۇمران ھەم يىيىشلىك قورۇيمەن دىسەك، ئازراق تاكتىكىلارنى قوللىنىشقا توغرا كىلىدۇ. بۇ سەۋەپلىك، تۆۋەندە كۆپچىلىكنىڭ دىققىتىگە، ئىنتايىن تەملىك بولغان پىياز كالا گۆشى قورىمىسى تۇنۇشتۇرۇپ ئۆتىمىز.

تەييارلاش ئۇسۇلى
    ئالدى بىلەن، كالا گۆشىنى بىردەم سۇغا چىلاپ قويىمىز؛ بۇنىڭدا تەركىبىدىكى قان سۇلىرىنى چىقىرۋەتكىلى بولىدۇ. كەينىدىن كالا گۆشىنى توغرايمىز؛ بۇنىڭدا قەلەمچە قىلىپ توغرىساقمۇ ياكى ياپراقچە ھالىتىدە توغرىساقمۇ بولىدۇ. ئەمما چوقۇم گۆش يۈز قىسمىدىكى سىزىقچىلارنى بويلىتىپ ئەمەس، بەلكى توغرىسىغا كەلتۈرۈپ توغرىشىمىز كىرەك؛ بۇنىڭدا كالا گۆشى يۇمران پىشىدۇ.

   توغراپ تەييارلىغان كالا گۆشىنى چىنىگە سېلىپ، ئۈستىگە مۇۋاپىق مىقداردا تۇز، تۇخۇمنىڭ ئېقى، شىڭچۇۋ جىياڭيۇسى، سۇدا، كىراخمال قاتارلىقلارنى قوشۇپ، تەكشى ئارىلاشتۇرىمىز؛ ئارىلاشتۇرۇپ بولغاندىن كىيىن ئۈستىگە ئازراق يىمەكلىك مېيى قۇيۇپ، يىڭى ساقلاش پىلاستىرىدا چىنىنىڭ ئېغىزىنى ھىم ئىتىپ توڭلاتقۇغا سېلىپ بىر سائەت ئەتراپىدا قويۇپ قويىمىز. بۇنىڭدا كالا گۆشى تېخىمۇ تەملىك ھەم يۇمران پىشىدۇ.

    قازاننى ئېسىپ قىزىتىپ ماي قۇيىمىز؛ ماي تۆت ئۈلۈش قىزىغاندىن كىيىن، تەييارلىغان كالا گۆشىنى سېلىپ، تىز سۈرئەتتە تارقىتىپ قورۇيمىز؛  كالا گۆشىنىڭ رەڭگى ئۆزگەرگەندىن كىيىن ئۇسۇپ ئېلىۋالساق بولىدۇ.

   قازاننى قايتا ئېسىپ ئازراق ماي قۇيۇپ، ئۇششاق توغرالغان غولپىياز مايسىسى ۋە زەنجىۋىلنى سېلىپ تەم چىقىرىمىز؛ كەينىدىن ئازراق كۆكمۇچ قىزىلمۇچ سېلىپ نەچچە مالتىلاپ قورىغاندىن كىيىن كالا گۆشىنى سالىمىز ھەمدە كەينىگە ئۇلاپلا توغراپ تەييارلىغان پىيازنى سېلىپ چوڭ ئوتتا قورۇيمىز؛ ئازراق قورۇغاندىن كىيىن تۇز قۇيۇپ تەم تەڭشەپ تەخسىگە ئۇسۇپ ئالساق بولىدۇ.