يېقىنقى بىر نەچچە يىلدىن بىرى، كۆپ قىسىم كىشىلەر تېتىتقۇ ئورنىغا توخۇ تەم جەۋھىرى ئىشلىتىدىغان بولۇپ قالدى. چۈنكى، جەمئىيەتتە، تېتىتقۇنى دائىم ئىستىمال قىلسا، چوڭ مىڭىمىزگە زىيان يەتكۈزۈپ، ئادەمنىڭ نىرۋىسىغا تەسىر قىلىدىكەن، ئەقلى ئىقتىدارىمۇ تۆۋەنلەپ، تېخىمۇ دۆتلىشىپ قالىدىكەن دىگەنگە ئوخشاش ئۆسەك سۆزلەر تارالغان ئىدى.

    ئۇنداقتا، تېتىتقۇنى كۆپ ئىستىمال قىلسا، راستىنلا چوڭ مىڭە ھۈجەيرىلىرىگە تەسىر يەتكۈزەمدۇ؟
   ئەمىلىيەتتە، تېتىتقۇ ناھايىتى بىخەتەر بولۇپ، چوڭ مىڭىگە زىيانلىق تەسىر يەتكۈزمەيدۇ. چۈنكى، تېتىتقۇنىڭ ئاساسلىق تەركىبى گلوتامىن(谷氨酸钠) بولۇپ، نۇرغۇنلىغان تەبىئى يىمەكلىكلەر تەركىبىدە بۇ خىل ماددا بار، ھەرگىز زەھەرلىك ماددا ئەمەس. دۇنيا سەھىيە تەشكىلاتىمۇ، ئاللبۇرۇنلا تېتىتقۇنى بىخەتەر يىمەكلىك تۈرىگە كىرگۈزگەن بولۇپ، خاتىرجەم ئىستىمال قىلىشقا بولىدۇ.
    تېتىتقۇنى قىزىتىپ 120سىلتسىيە گىرادوسقا يەتكۈزگەندە، ئۇنىڭ تۈزۈلىشىدە ئۆزگىرىش كۆرۈلۈپ، پروگلۇتامىن(焦谷氨酸钠)شەكىللەنگەن تەقدىردىمۇ، يەنىلا زىيانلىق ماددىغا ئۆزگىرىپ كەتمەيدۇ، پەقەت تەمى يوقاپلا كىتىدۇ.

   بىراق، تېتىتقۇنى كۆپ يەۋالغاندىمۇ، ئادەم بەدىنىگە ھېچقانداق پايدىسى يوق. چۈنكى، تېتىتقۇ تەركبىدە ناترى ئىلمىنتى بولغاچقا، تېتىتقۇنى بەك كۆپ سېلىۋەتكەندە، ناترى قوبۇل قىلىش مىقدارى ئېشىپ كىتىپ، قان تۇمۇرلارغا يامان تەسىر ئېلىپ كىلىدۇ. ناترى ماددىسىنى بەك كۆپ قوبۇل قىلىۋەتكەندە، قان تۇمۇر ھۈجەيرىلىرىدە بېسىم پەرقى شەكىللەندۈرۈپ، كۆپ مىقداردىكى سۇ تەركىبلىرىنى خورىتىۋىتىدۇ، قان بېسىمنىمۇ ئۆرلىتىۋىتىدۇ. شۇنىڭ ئۈچۈن، تېتىتقۇنى يەنىلا ئازراق ئىستىمال قىلغان ياخشى.
    قورۇما قورىغان ۋاقىتتا، ئەڭ ياخشىسى قاچىغا ئۇسسۇپ ئېلىشنىڭ ئالدىدا ئاندىن تېتىتقۇ سېلىش كىرەك. بۇنىڭدا، قورىمىغا تەم كىرىشكە كاپالەتلىك قىلغان ئاساستا، كۆپ مىقداردا سېلىۋىتىشتىن ساقلانغىلى بولىدۇ.

    توخۇ تەم جەۋھىرىنى تېتىتقۇنىڭ ئورنىغا ئىشلەتسەك مەسىلە كۆرۈلمەمدۇ؟
    ئەمىلىيەتتە، توخۇ تەم جەۋھىرى، دەرىجىسى يۇقىرىراق بولغان تېتىتىقۇ بولۇپ، ئاساسلىق تەركىبى تېتىتقۇ بىلەن ئوخشاش؛ تېتىتقۇغا توخۇ گۆشى پاراشوكى، تۇز، شىكەر ۋە باشقا پۇراقلىق ماتىرياللارنى قوشۇپ تەييارلانغان بولۇپ، كۆپ خىل تەملىك بولۇپ ئۆزگىرىدۇ.
    ئەگەر كۆپچىلىك ياقتۇرسا، توخۇ تەم جەۋھىرىنى تېتىتقۇ ئورنىغا ئىشلەتسەك پۈتۈنلەي بولىدۇ؛ بىراق، توخۇ تەم جەۋھىرىنىمۇ كۆپ ئىستىمال قىلىۋىتىشكە بولمايدۇ. چۈنكى، توخۇ تەم جەۋھىرىنىڭ ناترى مىقدارىمۇ ئوخشاشلا يۇقىرى بولۇپ، كۆپ ئىستىمال قىلىۋىلىشنىڭ ھېچقانداق پايدىسى يوق.