ھازىر، كىشىلەر قارىماققا يىمەك-ئىچمەك جەھەتتە بارغانسىرى دىققەت قىلىدىغان بولۇپ كەتكەندەك كۆرۈنسىمۇ، ئەمما يەنىلا نۇرغۇنلىغان ياشلارنىڭ يىمەك-ئىچمەك ئادىتى تەرتىپسىز بولۇپ، ئۇششاق يىمەكلىكلەرنى كۆپ يەۋىلىپ تاماق يىگۈسى كەلمەيدىغان، ياكى قورسىقى ئاچسا خالىغانچە بىر نەرسىلەرنى يەپ بولدى قىلىدىغان ئەھۋاللار دائىم كۆرۈلۈپ تۇرىدۇ. بىراق شۇنى بىلىشىمىز كىرەككى، بەزى يىمەكلىكلەرنى ئاچ قوساققا يىيىشكە بولمايدۇ، بولمىغاندا، ئاشقازان ۋە ئۈچەيگە قايتۇرۋالغۇسىز زىيانلىق تەسىرلەرنى ئېلىپ كىلىدۇ.

تاتلىق ياڭيۇ
    گۈرۈچ ئېشىغا قارىغاندا، تاتلىق ياڭيۇنىڭ ئىنىرگىيە تەركىبى نىسبەتەن تۆۋەن بولۇپ، ئۇرۇقلاشنى مەقسەت قىلغانلار كۆپىنچە تاتلىق ياڭيۇنى ئاساسلىق يىمەكلىك ئورنىدا ئىستىمال قىلىپ، قوسىقى ئاچقان ۋاقىتتا بىۋاستىلا تاتلىق ياڭيۇ يەيدۇ. بىراق، تاتلىق ياڭيۇنى ئاچ قوساققا يىيىشكە بولمايدۇ؛ چۈنكى، تاتلىق ياڭيۇ تەركىبىدىكى تاننىن ۋە يىلىم ماددىسى، ئاشقازان ئۈچەينىڭ تېخىمۇ كۆپ ئاشقازان كىسلاتاسى ئىشلەپچىقىرىشىنى كەلتۈرۈپ چىقىرىپ، ئاسانلا بەزىبىر بىئاراملىقلارنى كەلتۈرۈپ چىقىرىدۇ. ئۇنىڭ ئۈستىگە، تاتلىق ياڭيۇنى بىۋاستە ھەزىم قىلىشتىن شەكىللەنگەن كاربون تۆت ئوكسىد گازى ئاسانلا قوساق كۆپۈشنى كەلتۈرۈپ چىقىرىدۇ. شۇڭا، تاتلىق ياڭيۇنى بەزىبىر مىۋە-كۆكتاتلار بىلەن ماسلاشتۇرۇپ ئىستىمال قىلىش كىرەك.

بانان
    بانان كۈندىلىك تۇرمۇشتا كۆپ ئۇچرايدىغان بىر خىل ساغلاملىق مىۋىسى بولۇپ، نۇرغۇن كىشىلەر ئىشقا بارغاندىمۇ سومكىسىغا بىر ئىككى بانان سېلىۋىلىپ، خىزمەت ئارىلىقىدا يەيدۇ. بىراق، بانان گەرچە ياخشى يىمەكلىك بولسىمۇ، ئەمما ئۇنى ئاچ قوساققا يىيىشكە ماس كەلمەيدۇ. چۈنكى، باناننى بەدەنگە سۈمۈرۈلۈپ ئىشلىتىلىشى ئىنتايىن ئاسان بولۇپ، ئاچ قوساققا يىگەن ۋاقىتتا، ئاشقازان ئۈچەينىڭ قىمىرلىشىنى تىزلىتىۋىتىدۇ؛ ئەمما ئاچ قوساق ئەھۋال ئاستىدا ئۈچەي يولىدا باشقا يىمەكلىك بولمىغاچقا، يۇقارقى ئەھۋال ئاشقازان ۋە ئۈچەيگە بەلگىلىك زىيانلىق تەسىر ئېلىپ كىلىدۇ. ئۇنىڭ ئۈستىگە، باناننىڭ تەركىبىدە كالىي ماددىسى ئىنتايىن مول بولۇپ، ئاچ قوساققا بانان ئىستىمال قىلغاندا، بەدەندىكى كالى مىقدارى قىسقا مۇددەت ئىچىدە يۇقىرى ئۆرلەپ كىتىپ، ساغلاملىققا زىيانلىق تەسىر ئېلىپ كىلىدۇ.

كالا سۈتى
   نۇرغۇن كىشىلەر ئەتىگىنى ئورنىدىن تۇرۇپلا كالا سۈتى ئىچىشنى ياخشى كۆرىدۇ؛ بەزىدە ۋاقىت يىتىشمەي قالسا، باشقا نەرسە يىيىشكە ئۈلگۈرمەي، بىۋاستە كالا سۈتى ئىچىپلا ناشتا قىلغانغا ھىساب قىلىدۇ. ئەمىلىيەتتە، كالا سۈتىنى ئايرىم يالغۇز ئىچكەندە، بەدەنگە ئۇزۇقلۇق يەتكۈزۈشى تازا ياخشى بولمايدۇ، ئەكسىچە ئاچ قوساققا كالا سۈتى ئىچكەندە، كالا سۈتىنى ئىنىرگىيەگە ئالماشتۇرۇپ خورىتىۋىتىدۇ. شۇنىڭ ئۈچۈن، كالا سۈتى ئىچكەن ۋاقىتتا، مۇۋاپىق مىقداردا ئۇن يىمەكلىكلىرىنى قوشۇپ ئىستىمال قىلىش كىرەك. بۇنىڭدا، كالا سۈتى تەركىبىدىكى ئاقسىللار، ئەڭ زور دەرىجىدە ئادەم بەدىنى تەرپىدىن قوبۇل قىلىنىدۇ.