تۆتىنچى ئاي كىرىپ قالغان ھازىرقى مەزگىلدە، كۆكتاتلارنىڭ تۈرىمۇ كۆپىيىدىغان بولۇپ، يىشىل كۆكتاتلار قىش پەسلىگە قارىغاندا كۆپ ئەرزانلايدۇ؛ بىراق گوللاندىيە پۇرچىقىنىڭ باھاسىدا، بىر يىلنىڭ تۆت پەسلىنىڭ ھەممىسىدە كۆپ ئۆزگىرىش كۆرۈلمەيدۇ. چۈنكى، گوللاندىيە پۇرچىقى، ئۆزى تەملىك بولۇپلا قالماي، پايدىلىق تەرەپلىرى ھەقىقەتەن ئاز ئەمەس.

    ئەتىياز كۈنلىرى، ھاۋا نىسبەتەن قۇرغاق كىلىدۇ؛ شۇڭا بۇ مەزگىلدە يىشىل كۆكتاتلارنى كۆپرەك ئىستىمال قىلىش كىرەك. بۇنىڭدا، ئاشقازان-ئۈچەيگە ئاراملىق يەتكۈزۈپلا قالماي، يەنە تېخى بەدەندىكى زەھەرلىك ماددىلارنى ھەيدەيدۇ. گوللاندىيە پۇرچىقىنىڭ تەمى ئۆزگىچە، تەييارلاش ئۇسۇلىمۇ بىرقەدەر كۆپ بولۇپ، ھەر خىل ئۇسۇللاردا ھەر خىل ماسلاشتۇرۇپ قورۇما تەييارلاشقا بولىدۇ. ئۇنىڭ ئۈستىگە گوللاندىيە پۇرچىقىنىڭ ئۇزۇقلۇق قىممىتىمۇ تۆۋەن ئەمەس. بەزىبىر ئۇرۇقلاشنى مەقسەت قىلغان كىشىلەر، ھەمىشە گوللاندىيە پۇرچىقىنى ئۇرۇقلاش يىمەكلىكى قىلىۋالىدۇ. بۈگۈن بىز كۆپچىلىكنىڭ دىققىتىگە، گوللاندىيە پۇرچىقىنىڭ ئۆزىدىلا ئايرىم قورۇما قورۇش ئۇسۇلىنى تۇنۇشتۇرۇپ ئۆتىمىز.

    ئالدى بىلەن، گوللاندىيە پۇرچىقى، تۇز، سامساق، زەيتۇن مېيى، توخۇ تەم جەۋھىرى قاتارلىقلارنى تەييار قىلغاندىن كىيىن، گوللاندىيە پۇرچىقىنىڭ ئىككى ئۇچىدىكى بېغىچىنى ئۈزىۋەتكەندىن كىيىن پاكىز يۇيۇپ تەييارلاپ قويىمىز؛ سامساقنىمۇ ئاقلاپ يۇيغاندىن كىيىن، چاناپ تەييارلايمىز.

    قازاننى ئېسىپ ماي قۇيۇپ قىزىتىمىز؛ ماي قىزىغاندىن كىيىن، چاناپ تەييارلىغان سامساقنى سېلىپ تەم چىقىرىمىز؛ كەينىدىن گوللاندىيە پۇرچىقىنى قازانغا سېلىپ، توختىماي ئارىلاشتۇرۇپ ئىككى مىنۇت قورۇيمىز؛ ئاخىرىدا مۇۋاپىق مىقداردا تۇز ۋە توخۇ تەم جەۋھىرى قوشۇپ، ئارىلاشتۇرۇپ قورۇپ تەم كىرگۈزگەندىن كىيىن تەخسىگە ئۇسۇپ ئالساق بولىدۇ.