ھامىلدارلىق مەزگىلىدە، ھامىلدار ئايالنىڭ قوسىقى يوغىنىغاندىن سىرت، ئۇلاردا يەنە نۇرغۇنلىغان بىئاراملىق ئالامەتلىرى كۆرىلىدۇ؛ مەسىلەن، كۆڭلى ئاينىپ ياندۇرۇش، كىچىك تەرەت قېتىم سانى كۆپىيىش، سۇلۇق ئىششىق قاتارلىقلار. بۇلارنىڭ ئىچىدە بەزى ئۆزگىرىشلەر نورمال ئەھۋال بولسىمۇ، ئەمما يەنە بەزىلىرى ھامىيلىگە خەۋپ يەتكەنلىك سىگنالى بولۇشى مۇمكىن. شۇڭا، ھامىلدارلىق مەزگىلىدە تۆۋەندىكى نەچچە خىل ئالامەتلەر كۆرۈلسە، ھامىلدار ئايال كۆپلەپ دىققەت قىلىشى كىرەك.

قورسىقى قاتتىق ئاغرىش
    ھامىلدارلىق دەسلەپكى مەزگىلىدە، نۇرغۇن ھامىلدار ئاياللاردا قوسىقى ئاغرىيدىغان ئەھۋاللار كۆرىلىدۇ؛ بىراق، بەزىدە بۇ نورمال ئەھۋال ھىسابلانسىمۇ، ئەمما بەزىدە بىز ئالاھىدە دىققەت قىلىشىمىز كىرەك. ئەگەر ھامىلدار ئايالدا يىنىك دەرىجىدىكى قوساق ئاغرىقىلا كۆرۈلۈپ باشقا بىئاراملىق ئالامەتلىرى كۆرۈلمىسە، بۇ كۆپىنچە نورمال ئەھۋال بولۇپ، بۇنىڭدىن ئەنسىرەش كەتمەيدۇ. بىراق، ئەگەر ھامىلدار ئايالدا قاتتىق دەرىجىدە قوساق ئاغرىقى كۆرۈلسە، ھەمدە بۇنىڭغا قان كىتىش قوشۇلۇپ بىللە كۆرۈلسە، ئۇنداقتا بۇ بەلكىم بالا چۈشۈپ كىتىشنىڭ ئالدىدىكى ئالامىتى ياكى بالىياتقۇ سىرتىدا ھامىلدار بولغانلىقنىڭ ئالامىتى بولۇشى مۇمكىن. بۇنداق ئەھۋالدا، دەرھال دوختۇرخانىغا بېرىپ تەكشۈرتۈش كىرەك.
قان كىتىش
    ھامىلدارلىق مەزگىلىدە، قان مېڭىپ كىتىشمۇ دائىم كۆرىلدىغان ئالامەتلەرنىڭ بىرى بولۇپ، بىراق بۇمۇ ئوخشاش بولمىغان ئەھۋاللارغا ئايرىلىدۇ. ئەگەر ھامىلدار ئايالدا ئاز مىقداردا قان مېڭىپ كىتىش كۆرۈلسە ۋە باشقا بىئاراملىق ئالامەتلىرى كۆرۈلمىسە، بۇ نورمال ئەھۋال بولۇپ، ھامىلدار ئايال كۆپرەك ئارام ئېلىپ بەرسىلا چوڭ مەسىلە كۆرۈلمەيدۇ. بىراق ئەگەر، قان مېڭىپ كىتىش مىقدارى بىرقەدەر كۆپ، ئۇنىڭ ئۈستىگە قوساق قىسمىدا قاتتىق ئاغرىش كۆرۈلسە، ئۇنداقتا بۇ بەلكىم ئالدىن بىشارەتلىك بالا چۈشۈپ كىتىش، بالىياتقۇ سىرتىدا ھامىلدار بولۇش قاتارلىقلارنىڭ ئالامىتى بولۇشى مۇمكىن. بۇ ۋاقىتتىمۇ ئوخشاشلا دەرھال دوختۇرخانىغا بېرىپ تەكشۈرتۈش كىرەك.

ھامىيلىنىڭ مىدىرلىشىدا بىنورماللىق كۆرۈلۈش
    ئادەتتە، ھامىلدارلىق يەتتىنچى ئېيىغا كەلگەن ۋاقىتتا، ھامىلدار ئايالنىڭ ھامىيلىنىڭ مىدىرلاش قېتىم سانىنى سانىشى تەۋسىيە قىلىنىدۇ؛ چۈنكى، ھامىيلىنىڭ مىدىرلاش قېتىم سانى ۋە قاتتىقلىق دەرىجىسى، ھامىيلىنىڭ ئۆسۈپ-يىتىلىشى بىلەن مۇناسىۋەتلىك بولىدۇ. ئادەتتە، 12سائەت ئىچىدىكى مىدىرلاش قېتىم سانى 100-30 ئارلىقىدا بولسا، ياكى بىر سائەت ئىچىدە ئۈچ قېتىمدىن يۇقىرى بولسا نورمال بولىدۇ. ئەگەر ھامىيلىنىڭ مىدىرلاش قېتىم سانى تۇيۇقسىز ئازلاپ كەتسە ياكى كۆپىيىپ كەتسە، بۇ ھامىيلىگە ئوكسىگىن يىتىشمىگەنلىكنىڭ ئالامىتى بولۇشى مۇمكىن. شۇڭا بۇنداق ئەھۋال بايقالغاندىمۇ ۋاقىتدا دوختۇرخانىغا بېرىپ تەكشۈرتۈش كىرەك.