ھامىلدارلىق مەزگىلىدە، ھامىيلىنىڭ ئۆسۈپ-يىتىلىشىگە ئەگىشىپ، بالىياتقۇ بارغانسىرى چوڭىيىدۇ ھەمدە قوساق ئاستى بوشلۇق ۋىنرا قان تومۇرلىرىغا بېسىم شەكىللەندۈرۈپ، قان ئايلىنىشنىڭ راۋان بولۇشىغا توسقۇنلۇق قىلىدۇ؛ بۇنداق ئەھۋالدا قان سۇيۇقلۇقى راۋان  ئايلىنالمىغانلىق سەۋەبىدىن ئۇيۇشۇپ ۋە چۆكمە شەكىللىنىپ، مەقئەت ئەتراپى ۋىنرا قان تومۇرلىرىنىڭ كېڭىيىپ ئىگىلىپ كىتىشىنى كەلتۈرۈپ چىقىرىدۇ. بۇنىڭغا ھامىلدارلىق مەزگىلىدىكى ھەرىكەت مىقدارى ئاز بولۇش ۋە بەدەن ئېغىرلىقى ئېشىشى بەك تىز بولۇش قوشۇلۇپ، ھامىلدار ئايالدا بۇۋاسىر بولۇپ قېلىش خەۋىپى تۇغۇلىدۇ.

    نۇرغۇن ھامىلدار ئاياللار، قورسىقىدىكى بالىغا تەسىر يىتىشىدىن ئەنسىرەپ، مەلھەم دورىسى ئىشلىتىشتىن قورقىدۇ. ئۇنداقتا بۇۋاسىرنى قانداق مەغلۇپ قىلىش كىرەك؟
    گەرچە ھامىلدارلىق مەزگىلى بولسىمۇ، ئەمما ھامىيلىگە تەسىر يەتكۈزمىگەن ئاساستا بۇۋاسىرغا تاقابىل تۇرىدىغان ۋە ئالدىنى ئالىدىغان نۇرغۇن ئۇسۇللار بار.
    ئەگەر، بۇۋاسىر ئۇنچە ئېغىر بولمىسا، بۇنداق ئەھۋالدا مۇھىم بولغىنى ئالدىنى ئېلىش:
    1. سۇنى كۆپ ئىچىش. ھامىلدار ئايال ئەڭ ياخشىسى، كۈندە 1700-1500مىللىلىتىر ئەتراپىدا  سۇئىچىشكە كاپالەتلىك قىلىش كىرەك.
    2. يىرىك تالا ماددىسى تەركىبى مول بولغان يىمەكلىكلەرنى كۆپرەك ئىستىمال قىلىش، ئاچچىق ھەم غىدىقلايدىغان يىمەكلىكلەرنى ئازراق ئىستىمال قىلىش كىرەك. كەرەپشە، تۇرۇپ، نەشپۈت، سۇلۇ، يىرىك گۈرۈچ قاتارلىق مىۋە-كۆكتات ۋە يىرىك ئاشلىقلارنى كۆپرەك ئىستىمال قىلىش؛ تاماقلىنىشتا مىقدارى ئاز قېتىم سانى كۆپ بولۇش پىرىنسىپىدا چىڭ تۇرۇپ، چوڭ يەپ چوڭ ئىچىشتىن ساقلىنىش لازىم.
    3. ئۇزۇن ئولتۇرۋالماسلىق لازىم. ھامىلدارلىق مەزگىلىدىمۇ مۇۋاپىق تۈردە ھەرىكەتلىنىپ چېنىقىپ بىرىش كىرەك.
    4. قەرەللىك تۈردە چوڭ تەرەت قىلىش ئادىتى يىتىلدۈرۈش. ھەركۈنى قەرەللىك ۋاقىتتا چوڭ تەرەت قىلىش، ئۇ ۋاقىتتا تەرەت قىستىمىغان تەقدىردىمۇ، يەنىلا ھاجەتخانىغا كىرىپ بىردەم ئولتۇرۇپ، ئۆزىدە بۇ خىل ئادەتنى يىتىلدۈرۈش كىرەك.
    5. ھەر قېتىملىق ھاجەتكە ئولتۇرۇش ۋاقتى 10مىنۇتتىن ئېشىپ كەتمەسلىكى كىرەك. پەقەت بولمىغاندا، بىر دەم ئولتۇرغاندىن كىيىن سىرتقا چىقىپ بىرئاز ھەرىكەت قىلغاندىن كىيىن، ئاندىن قايتا كىرىپ داۋاملىق ئولتۇرۇش.
    6. ھەركۈنى كەچلىكى چوڭ تەرەت قىلىپ بولغاندىن كىيىن، مەقئەتنى پاكىزە يۇيۇپ، ئىسسىق لۆڭگە بىلەن مەقئەتنى بېسىپ ئۇۋۇلاپ بىرىش.
    7. ئەگەر چوڭ تەرەت قۇرۇق بولۇپ، قەۋزىيەت شەكىللەنگەن بولسا ياكى شەكىللىنىش ئالامەتلىرى كۆرۈلۈشكە باشلىغان بولسا، دوختۇرلارنىڭ كۆرسەتمىسى ئاستىدا دورا ئىشلىتىپ قەۋزىيەتنى ياخشىلىسا بولىدۇ، بۇنىڭ ھامىيلىگە زىيانلىق تەسىرى بولمايدۇ.