بالا تۇغۇپ ئانا بولۇش، ئىنتايىن خۇشاللىنارلىق بىر ئىش؛ ئەمما يىڭى تۇغۇتلۇق ئاياللار ئۆزىنى چوقۇم ياخشى كۈتۈشى كىرەك، بولمىغاندا ھەرخىل كىسەللىكلەرگە گىرىپتار بولۇپ قېلىپ، كىيىنچە داۋالاپ ساقايتىش تەسكە توختايدۇ. ئەگەر يىڭى تۇغۇتلۇق ئاياللار ياخشى كۈتۈنمىسە، تۆۋەندىكىدەك ئەگەشمە كىسەللىكلەر كۆرۈلۈشى مۇمكىن.
بەل ئاغرىش
   كۆپ قىسىم ئاياللار، يىڭى تۇغۇتلۇق مەزگىلىدىمۇ بالىسىغا ئۆزى قارايدۇ؛ بىراق يىڭى تۇغۇتلۇق ئايالغا نىسبەتەن، ئەڭ دىققەت قىلىشقا تىگىشلىك ئىش چارچاپ قالماسلىق بولۇپ، ئىمىتكەن ۋاقىتتا بالىنى كۆتۈرگەندىن سىرت، باشقا ۋاقىتلاردا بالىنىمۇ كۆتەرمەسلىكى، ئۇزۇن ۋاقىت ئۆرە تۇرۇش ياكى ئۇزۇن ۋاقىت يېتىۋىلىش ھەمدە بەل قىسمىغا سۇغۇق ئۆتۈپ قېلىشتىن ساقلىنىش لازىم.
   يىڭى تۇغۇتلۇق ئاياللارنىڭ بەدىنى ئاجىز، بالىياتقۇ تېخى تۇلۇق ئەسلىگە كىلىپ بولالمىغان بولۇپ، داس سۆڭەك بوغۇملىرىمۇ نىسبەتەن بوشاشقان ھالەتتە تۇرىدۇ؛ بۇنداق ئەھۋالدا ئەگەر زىيادە ھېرىپ-چارچاپ كەتكەندە، ئاسانلا بەل ئاغرىيدىغان بولۇپ قالىدۇ.

تۇغۇتتىن كىيىنكى قان ئازلىق كىسىلى
   يىڭى تۇغۇتلۇق ئاياللاردا، ئەگەر باش قېيىپ ماغدۇرسىزلىنىش، چىرايى ئۆڭگەن، ئۇيقۇ سۈپىتى ناچار، پۇت-قوللىرى مۇزلاش قاتارلىق ئالامەتلەر كۆرۈلسە، بۇ بەلكىم قان ئازلىق كىسەللىكى سەۋەبىدىن بولۇشى مۇمكىن. تۇغۇتتىن كىيىنكى قان ئازلىق كىسىلىنىڭ شەكىللىنىش سەۋەبلىرى ھەر خىل بولىدۇ؛ مەسىلەن، تۇغۇتتا قان كۆپ كىتىش، ھامىلدارلىق مەزگىلىدە ماغدۇردىن كىتىش، تۇغۇتتىن كىيىنكى بالا ئىمىتىش قاتارلىقلار. بۇنداق ئەھۋالدا، قان تۇلۇقلاشقا چوقۇم دىققەت قىلىش كىرەك؛ ئادەتتە، يىمەكلىك ئارقىلىق تۆمۈر ماددىسى تولۇقلاش ئۇسۇلىنى قوللىنىش ۋە ياكى دورا ئارقىلىق تۆمۈر ماددىسى تۇلۇقلاش ئۇسۇلى قوللىنىش ئارقىلىق، قان ئازلىق كىسىلىنى ياخشىلاشقا بولىدۇ.

بالىياتقۇ نورمال ئورنىدىن يۆتكىلىپ كىتىش
   نۇرغۇن ئاياللار، يىڭى تۇغۇتتىن كىيىن ئۇزۇن ئۆتمەيلا، ئۆزىنى يامان ئەمەس ئەسلىمگە كەلدىم دەپ قاراپ، دوختۇرخانىغا بېرىپ قايتا تەكشۈرۈش قىلغۇزمايدۇ، ئەمما بىر مەزگىل ئۆتكەندىن كىيىن بىنورماللىقنى بايقايدۇ. ئىلگىرى بىر تۇنۇشۇم، بالىسى 6ئايلىق بولغاندىن كىيىن، ئاندىن بالىياتقۇسىدا ئېغىر دەرىجىدە ئورنىدا يۆتكىلىپ كىتىش كۆرۈلگەنلىكىنى بايقاپ، دوختۇرخانىدا خېلى ئۇزۇن يېتىپ داۋالانغاندىن كىيىن ئاندىن ئەسلىگە كەلگەن. شۇڭا، يىڭى تۇغۇتلۇق ۋاقىتتا، ياخشى ھەم يىتەرلىك ئارام ئېلىش ۋە كۈتۈنۈشكە سەل قارىماڭ.