گۈمبەمەدەك زەمبۇرۇغ يىپچە تەنچىسى ۋە ئىسپورا تەنچىسى ئىككى قىسىمدىن تەركىپ تاپىدىغان بولۇپ، زەمبۇرۇغ يىپچە تەنچىسى ئۇزۇقلۇق ئەزاسى، ئىسپورا تەنچىسى كۆپىيىش ئەزاسىدۇر؛ موگۇنىڭ ئوتتۇزئالتە مىڭ خىل جىنىس ئايرىمىسى بار بولۇپ، ئادەتتە پىشقان ئىسپورا تەنچىسى بىخلاپ زەمبۇرۇغ يىپچە تەنچىسىگە ئايلىنىدۇ.
   گۈمبەمەدەكنىڭ ئىسپورا تەنچىسى ئېچىلغان كۈنلۈككە ئوخشايدىغان بولۇپ، ئۇ زەمبۇرۇغ ياپقۇچى، زەمبۇرۇغ تۇتقۇچى، زەمبۇرۇغ قاتلىغى، زەمبۇرۇغ چەمبىرىكى، زەمبۇرۇغ ساختا يىلتىزى قاتارلىق قىسىملاردىن تۈزۈلىدۇ. تەبىئەتتە گۈمبەمەدەكنىڭ تۈرلىرى ئىنتايىن كۆپ بولۇپ، كۆپ قىسىم گۈمبەمەدەكنى ئىستىمال قىلىشقا ۋە دورا ماتىريالى ئورنىدا ئىشلىتىشكە بولىدۇ، ئەمما ئاز بىر قىسىم زەھەرلىك گۈمبەمەدەكلەر ئادەم بەدىنىگە ئوخشىمىغان دەرىجىدە زىيانلىق كىلىدۇ؛ شۇڭلاشقا ياۋا گۈمبەمەدەكلەرنىڭ تۈرىنى ئىنىق بىلمىگەن ئەھۋال ئاستىدا ئىستىمال قىلىشقا قەتئى بولمايدۇ.
خەنزۇچە ئاتىلىشى:  蘑菇
چەتئەلچە ئاتىلىشى:  mushroom
تەۋەلىكى:  زەمبۇرۇغلار دۇنياسى—بازىدلىق زەمبۇرۇغلار تىپى—گۈمبەمەدەك كەنجى تىپى—بازىدىيىلىك زەمبۇرۇغلار سىنىپى—ئوخشاش بازىدىيە كەنجى سىنىپى—قالپاقلىق زەمبۇرۇغ ئەترىتى—گۈمبەمەدەك كەنجى ئەترىتى—گۈمبەمەدەك ئائىلىسى—گۈمبەمەدەك كەنجى ئائىلىسى—گۈمبەمەدەك ئۇرۇقدىشى

ئۇزۇقلۇق قىممىتى
     گۈمبەمەدەك تەركىبىدە ئاقسىل، ياغ، قەنت تۈرىدىكىلەر، يىرىك تالا ماددىسى، ناترىي، كالىي، كالتسىي، فوسفور، تۆمۈر، مىس، سىنىك، مانگان، فىتور، پولىساخارىد، فولىن كىسلاتاسى، نىكوتىنىك كىسلاتاسى، كاروتىن، ۋىيتامىن B1، ۋىيتامىن B2، ۋىيتامىن B6، ۋىيتامىن C، ۋىيتامىن E، ۋىيتامىن K، بىئوتىن قاتارلىق ماددىلار ۋە ئالانىن، گىلوتامىك كىسلاتا قاتارلىق ئامىنو كىسلاتالار بار؛ گۈمبەمەدەك تەركىبىدىكى ياغ تۈرلىرى ئىچىدە لىنون كىسلاتاسى نىسبەتەن كۆپ، ماي كىسلاتاسى نىسبەتەن ئاز بولۇپ، بۇندىن باشقا يەنە ياپونيىلىك تەتقىقاتچىلار گۈمبەمەدەك تەركىبىدىن، PS-K دەپ ئاتىلىدىغان بىر خىل پولىساخارىدلىق راكقا قارشى تۇرغۇچى ماددا چەككىلەپ ئالغان.

دورىلىق ئۈنۈمى
    1. گۈمبەمەدەك قۇياش نۇرىنى سۈمۈرگەندىن كىيىن، ئۇنىڭ تەركىبىدىكى ئالاھىدە بىر خىل ماددا، ۋىيتامىن D غا ئۆزگىرىدىغان بولۇپ، ئادەم بەدىنى تەرپىدىن قوبۇل قىلىنغاندىن كىيىن، بەدەن ئورگانىزىمىنىڭ ئىممونىت كۈچىنى ئاشۇرۇش رولىنى ئوينايدۇ.
    2. بىرازىلىيەدىكى مەلۇم بىر تەتقىقات ئورگىنى گۈمبەمەدەكتىن بىر خىل ماددا چەككىلەپ ئالغان بولۇپ، بۇ خىل ماددىنىڭ ئاغرىق پەسەيتىش ۋە تىنچلاندۇرۇش رولى بار ئىكەن.
    3. گۈمبەمەدەكتىن چەككىلەنگەن سۇيۇقلۇقنى تەجىربە قىلىش ئارقىلىق ئۇنىڭ يۆتەل توختىتىپ بەلغەمنى بوشىتىش ئۈنۈمى بارلىقى بايقالغان.
    4. ياپونيىلىك تەتقىقاتچىلار گۈمبەمەدەكتىن راكقا قارشى تۇرغۇچى ماددا چەككىلەپ ئالغان بولۇپ، بۇ خىل ماددا راك ھۈجەيرىلىرىنىڭ ئۆسۈپ پەيدا بولۇشىنى ئۈنۈملۈك توسايدىكەن ھەمدە توسۇش ئۈنۈمى يىشىل چاي تەركىبىدىكى راكقا قارشى تۇرغۇچى ماددىنىڭ 1000ھەسسىسىگە توغرا كىلىدىكەن.
    5. گۈمبەمەدەك تەركىبىدىكى يىرىك تالا ماددىلىرىنىڭ ئۈچەينىڭ سۇ تەركىبىنى ساقلاش ھەمدە ئارتۇق خولىستىرىن ۋە ئارتۇق قەنت تەركىبىنى سۈمۈرۈش رولى بار بولۇپ، قەۋزىيەت، ئۈچەي راكى، ئارتىرىيە قېتىشىش قاتارلىق كىسەللىكلەرنىڭ ئالدىنى ئالىدۇ.
    6. گۈمبەمەدەك تەركىبىدە زور مىقداردا مىنرالنى ماددىلار، ۋىيتامىن تۈرى، ئاقسىل قاتارلىقلار بار بولسىمۇ، ئەمما ئۇنىڭ ئىنىرگىيە مىقدارى ناھايىتى تۆۋەن بولۇپ، كۆپ يەپ بەرسىمۇ ئادەمنى سەمىرتمەيدۇ.