ئادەم بەلگىلىك ياشقا بېرىپ يەتكەندىن كېيىن، تېرىلىرىدە قورۇقچىلار پەيدا بولۇشقا باشلايدۇ؛ بولۇپمۇ ئاياللار، كۆپ قىسىم ئاياللار 20ياشتىن كېيىن، كۆزىنىڭ قۇيرۇق قىسىملىرىدىن باشلاپ قورۇقچىلار كۆرۈلۈپ، تېرە ئەھۋالى بارغانسېرى ناچارلىشىپ كېتىدۇ. لېكىن يەنە قارايدىغان بولساق، كىنولاردا چىقىدىغان بەزى چولپانلار 50ياشقا كىرىپ قالغاندىمۇ تېرىسى ناھايىتى ياخشى ساقلانغان بولىدۇ، ئۇلار بۇنى قانداق ئەمەلگە ئاشۇرغان؟ ئەمەلىيەتتە، بىزمۇ كۈندىلىك ئاسراش قىلىشقا كۆپرەك ئەھمىيەت بەرسەك، قېرىشقا قارشى تۇرۇپ، تېرىگە قورۇقچىلار چۈشۈشنى ئاستىلىتالايمىز.

يۈز قىسىمنىڭ پاكىزلىقىنى ساقلاش
   يۈز قىسىمنى پاكىزە ساقلاش، ئاسراش قىلىشنىڭ ئالدىدىكى ئەڭ مۇھىم بىر قەدەم بولۇپ، پەقەت تېرىمىز ۋە تۈك تۆشۈكچىلىرى پاكىزە بولغاندىلا، تېر ئاسراش مەھسۇلاتلىرى ئاندىن تېرىگە تېخىمۇ ياخشى سۈمۈرۈلۈپ، ئۆز ئۈنۈمىنى كۆرسىتەلەيدۇ.

ئەتىگەن كەچتە كۆز مەلھىمى سۇۋاش
   ئادەمنىڭ ئەڭ تېز قېرىشقا باشلايدىغان قىسىمى، كۆز قىسىمدۇر؛ ئادەمنىڭ كۆز ئەتراپى قىسىمى ئەڭ ئاجىز بولىدۇ، شۇڭا ئاسانلا قورۇقچىلار پەيدا بولىدۇ، ئەگەر ھەمىشە كىچىسى ئۇخلىماي ئادەتلەنسەك، يەنە كۆز ئەتراپى قارىداپمۇ قالىدۇ. لېكىن، نۇرغۇن كىشىلەر كۆز قىسىمغا ئاسراش قىلىشقا بەك كۆڭۈل بۆلمەيدۇ. كۆز ئەتراپى كۆكىرىپ قېلىش، قورۇقچە چۈشۈش، قاپاق خالتىسى شەكىللىنىش قاتارلىق ئەھۋاللار، ئادەمنى تېخىمۇ قېرى كۆرسىتىپ قويىدىغان بولۇپ، شۇڭا ئەتىگەن كەچتە كۆز مەلھىمى سۇۋاپ، كۆز ئەتراپى تېرىسىگە ئاسراش قىلىشقا ئادەتلىنىشىمىز لازىم.

يۈز قىسىم نەملىكنى ساقلاپ تېرە قۇرغاقلىشىشنىڭ ئالدىنى ئېلىش
   كۆز مەلھىمى سۇۋاپ بولغاندىن كېيىن، يۈز قىسىم تېرىلىرىمىزنى ئاسراشقا نۆۋەت كېلىدۇ. ئادەتتە، مەيلى سىرتقا چىقىشنىڭ ئالدىدا بولسۇن ياكى ئۇخلاش ئالدىدا بولسۇن، يۈزىمىزگە ماي سۇۋاپ، تېرە قۇرغاقلىشىشنىڭ ئالدىنى ئېلىش كېرەك. بۇندىن باشقا، ھەپتىسىگە 3-2 قېتىم يۈز چاپلىقى چاپلاپ، تېرىگە چوڭقۇر قاتلاملىق نەم يەتكۈزۈشكە ئەھمىيەت بەرمەك لازىم.

ئاپتاپتا كۈيۈشتىن ساقلىنىشقا دىققەت قىلىش
   ئۇلتىرا بىنەپشە نۇرنىڭ تېرىگە بولغان زىيىنى ئىنتايىن چوڭ، تېرىمىزنى كۆيدۈرۈپ زەخىمگە ئۇچرىتىپلا قالماي، يەنە قېرىش سۈرئىتىنىمۇ تېزلەشتۈرۋىتىدۇ، تېرە سۈپىتىمۇ ناچارلىشىپ كېتىدۇ. شۇڭا، سىرتلارغا چىقماقچى بولغاندا، چوقۇم ئاپتاپتىن ساقلىنىش مەلھىمى سۇۋاپ چىقىش كېرەك.
   يۇقارقىلاردىن باشقا، تېرە ئاسراشتا بىز يەنە بالدۇر ئۇخلاپ سەھەر ئورنىدىن تۇرۇش، ھەر كۈنى سۇنى كۆپرەك ئىچىش، كۆپرەك ھەرىكەتلىنىش قاتارلىق ئۇسۇللار ئارقىلىقمۇ، قېرىپ كېتىش سۈرئىتىنى ئاستىلاتقىلى بولىدۇ.